Vivez en gardant à l’esprit le jour de Jéhovah, n’o ye ko an k’an ka ɲɛnamaya kɛ ka Jehowa ka don to an hakili la
1 “Matigi ka diminya donba surunyara. A surunyara, a bɛ teliya ka na.” (Sof. 1:14) Kitabu 12 minnu bɛ Heburukan Sɛbɛnniw laban na, olu sɛbɛnbagaw ni Sofoni ye u ka ɲɛnamaya kɛ ka Jehowa ka don to u hakili la. N’an bɛ o sɛbɛn fiyɛlenw sɛgɛsɛgɛ an ka jɛkulu ka gafe kalan la, i ko a jiralen bɛ cogo min na gafe kɔnɔ min tɔgɔ ye ko Vivez en gardant à l’esprit le jour de Jéhovah, o bɛna an dɛmɛ an k’an labɛn o siranba don kama.-Sof. 2:2, 3.
2 Fɛn minnu bɛ o gafe ani gafe tɔw bɔ ɲɔgɔn na: Taamasiyɛn minnu bɛ Kiraya kitabu 12 kɔnɔ, olu kɔrɔ ye min ye, Le jour de Jéhovah gafe tɛ i sinsin o kan. A tɛ o kitabuw 12 ɲɛfɔ tɛmɛsira ni tɛmɛsira. Nka, o sɛbɛn fiyɛlenw bɛ se k’an dɛmɛ cogo min na an ka diɲɛlatigɛ kɔnɔ don o don, gafe bɛ o de ɲɛfɔ. K’a to an hakili la ko Jehowa ka don ye kɔrɔtɔko ye, o ka kan k’a ye an ka ko latigɛtaw ni an ka ko kɛtaw bɛɛ la kun min na, a b’i sinsin o fana kan. Nin fɛnw ɲɛfɔlen bɛ a kɔnɔ: Denbayako, an ni an Seere ɲɔgɔnw cɛsira kow, an ka ɲɛnajɛ suganditaw, an ka cidenyabaara ani an ka ko latigɛtaw an ka baara ko ta fan fɛ.
3 Gafe tilayɔrɔba fɔlɔ bɛ kunnafoni di an ma kira 12 ni u ka sɛbɛnw kan. U tun ye jɔni ye? Cogoya jumɛnw de bɛ yen bi, minnu ni olu ka waati cogoyaw ye kelen ye? Tilayɔrɔba 2 nan b’i sinsin Jehowa n’a jogoɲumanw kan. O kiraw bɛ faamuyali jumɛn di an ma Jehowa ni a jogo kan? Tilayɔrɔba 3 nan b’i sinsin an yɛrɛ taamacogo kan ani an ni tɔw cɛsira kan. An ka kɛwalew fɛ an bɛ se ka kodiya Ala ye don o don cogo jumɛn na? An bɛ se k’an ka ɲɛnamaya kɛ nisɔndiya la cogo min na k’an to Jehowa ka don makɔnɔni na, tilayɔrɔba 4 nan b’o ɲɛfɔ.
4 I labɛn kabini sisan walisa i ka nafa sɔrɔ a la: A latigɛ kabini sisan ka nafaba bɔ o gafe kalan na, o min bɛna daminɛ san 2008 Utikalo tile 4 dɔgɔkun na. A boloda ka na jɛkulu ka Gafe kalan na dɔgɔkun o dɔgɔkun. Kalan kelen-kelen bɛɛ labɛn ɲɛmajɔ la. Bibulu tɛmɛsiraw lajɛ walisa k’a dɔn kun min na u bɛ kalansen kɔnɔ. I bɛ ka min kalan, i ka taasi o la, k’i yɛrɛ ɲininka ko, ‘Ne bɛ se ka nin kunnafoni waleya cogo jumɛn na ne ka so kɔnɔ, lakɔli la, baarakɛyɔrɔ la, ne ka cidenyabaara la ani ne ni balimakɛw ni balimamusow cɛ Kretiɛnya sira la?’ I labɛnnen ka na gafe kalan na ka ɲɛfɔli kɛ walisa ka ɲɔgɔn jija dannaya la.-Rom. 1:12.
5 An bɛ Ala deli walisa le jour de Jéhovah gafe sɛgɛsɛgɛli k’an labɛn kabini sisan. O la sa, ikomi Jehowa ka don “ka bon, siranba don” don, an bɛna “se a kɔrɔ.” O don surunyara kosɛbɛ yɛrɛ de.-Joɛl 2:11.