Sɔn-ni-sɔn gafeninw dili bɛ se ka yɛlɛma cogo min na ka kɛ Bibulukalanw ye

1. Ni an ye sɔn-ni-sɔn gafeninw di mɔgɔw ma, an kuntilenna ye mun ye?

¹ Sibiridonw fɛ, tuma caman na an bɛ La Tour de Garde ni Réveillez-vous ! sɛbɛnw jira mɔgɔw la an ka cidenyabaara kɔnɔna na. Nka, o ye fɛn fɔlɔ dɔrɔn de ye an kuntilenna sɔrɔli la ka mɔgɔ kɔnɔnajɛlenw kalan tiɲɛ ko la. Nin hakilila nata minnu filɛ nin ye, olu b’a jira an na an bɛ se ka Qu’enseigne la Bible sɛbɛn di mɔgɔ ma cogo min na n’an seginna ka na bɔ a ye, ani ka Bibulukalan daminɛ a kun. Nin hakililaw bɛ se ka yɛlɛma ka bɛn i ka waajulikɛyɔrɔ ma, ani k’a fɔ i yɛrɛ ka kuma fɔcogo la. I bɛ se ka baara kɛ ni hakilila wɛrɛw ye ni o bɛ nɔ bɔ e yɛrɛ bolo.

2. An bɛ se ka baara kɛ ni Qu’enseigne la Bible gafe ɲɛ fɔlɔw ye cogo jumɛn na walisa ka Bibulukalan daminɛ?

² Baara kɛ ni gafe ɲɛ fɔlɔw ye: N’i seginna ka na, i bɛ se k’a fɔ ko: “Ne ye gafenin minnu di i ma, olu bɛ an ɲɛsin Bibulu de ma. A lajɛ, kun min na a nafa ka bon ka Bibulu kalan.” Esayi 48:17, 18; Yuhana 17:3 walima Bibulu tɛmɛsira bɛnnen wɛrɛ kalan. O kɔfɛ, Qu’enseigne la Bible gafe jira i barokɛɲɔgɔn na, k’a ɲɔgɔn kelen di a ma. I bɛ se ka taa a fɛ nin cogo la:

◼“Bibulu bɛ jigiya jɔnjɔn de di an ma siniko kan.” Gafe ɲɛw 4-5 jira i baarakɛɲɔgɔn na, k’a ɲininka ko: “Nin layidu ninnu na, e b’a fɛ ka a jumɛn de tiimɛni ye?” Ni a y’o fɔ, tilayɔrɔba min bɛ o ɲɛfɔ, o ta k’a jira a la, wa, ni a sɔnna, baro surun kɛ a fɛ o tilayɔrɔba dakun kelen walima fila kan.

◼Walima i bɛ se k’a fɔ ko: “Ɲininkaliba minnu bɛ diɲɛlatigɛ kow kan, Bibulu bɛ olu jaabi di an ma.” Gafe ɲɛ 6nan jira a la, k’a ɲininka ni a y’a sɔrɔ a delila k’a yɛrɛ ɲininka nin ɲininkaliw dɔ la kelen na minnu bɛ gafe ɲɛ dugumana na. Ni a y’o fɔ, tilayɔrɔba min bɛ o ɲininkali jaabi, i ka o ta, ka baro surun kɛ o dakun kelen walima o dakun fila kan.

◼Walima i bɛ se ka tilayɔrɔba dɔ tɔgɔw jira a la, k’a ɲininka barokun jumɛn de ka di a ye. Ni a ye o barokun fɔ i ye, tilayɔrɔba min bɛ o barokun ɲɛfɔ, i ka o ta, k’a jira a la Bibulukalan bɛ kɛ cogo min na.

3. Cogo jumɛn na an bɛ se ka Bibulukalan daminɛ an kɛlen kɔ ka sɔn-ni-sɔn gafeninw di an barokɛɲɔgɔn ma minnu bɛ kuma (a) diɲɛ gɛlɛyaw juguyako kan? (b) denbaya ko kan? (c) Dannaya min bɛ se ka da Bibulu kan?

³ Ɲininkali dɔ lawuli i nako fɔlɔ la: A cogo dɔ ye ka i barokɛɲɔgɔn labɛn ko i bɛna segin ka na bɔ a ye kabini i nako fɔlɔ la. N’i barokɛɲɔgɔn sɔnna sɔn-ni-sɔn gafeninw na, ɲininkali dɔ lawuli, ka layidu ta ko i bɛna o ɲininkali jaabi n’i seginna ka na. I jija walisa e ni i barokɛɲɔgɔn ka bɛn don dɔ kan i na segin ka na bɔ a ye min na, wa, i ka ko bɛɛ kɛ ka na o don na. (Mat. 5:37) N’i seginna ka na, i tun ye ɲininkali min lawuli siɲɛ fɔlɔ la, i barokɛɲɔgɔn hakili jigin o la. O kɔfɛ, cogo surun na, jaabi kalan Qu’enseigne la Bible gafe kɔnɔ, ka baro surun kɛ o kan. Qu’enseigne la Bible gafe dɔ di a ma walisa i bɛ min kalan ale yɛrɛ ka se ka o ye gafe kɔnɔ. Bibulukalan bɛ daminɛ cogo min na, o misali dɔw filɛ:

◼I ye sɔn-ni-sɔn gafenin min di, ni o bɛ kuma diɲɛ gɛlɛyaw juguyako kan, i bɛ se k’a fɔ ko: “Bibulu bɛ jaabi min di nin ɲininkali kan, n’o ye ko Ala bɛna yɛlɛma jumɛnw don dugukolo ko la?, an bɛ se ka baro kɛ o kan siɲɛ wɛrɛ.” N’i seginna ka na, gafe ɲɛw 4-5 jira i barokɛɲɔgɔn na. Walima i bɛ se ka nin ɲininkali lawuli: “Yala kasaaraw ye Ala sago de ye wa?” N’i seginna ka na, gafe tilayɔrɔba fɔlɔ, a dakun 7-8 jira i barokɛɲɔgɔn na.

◼I ye sɔn-ni-sɔn gafenin min di, ni o bɛ kuma denbaya ko kan, sani i ka taa, i bɛ se ka nin ɲininkali lawuli, “Dukɔnɔmɔgɔ kelen-kelen bɛɛ bɛ se ka mun kɛ walisa ka hɛrɛ bonya denbaya kɔnɔ?” N’i seginna ka na, i ka baro kɛ tilayɔrɔba 14nan dakun 4nan kan.

◼I ye sɔn-ni-sɔn gafenin min di, ni o bɛ kuma dannaya kan min bɛ se ka da Bibulu kan, i bɛ se ka nin ɲininkali lawuli aw ka baro nata kama: “Yala Bibulu ye tiɲɛ ye dɔnniya sira la wa?” N’i seginna ka na, baro kɛ tilayɔrɔba 2nan, dakun 8nan kan.

4. An ka kan ka mun kɛ ni an barokɛɲɔgɔn ma sɔn Qu’enseigne la Bible gafe la?

⁴ I ka baro kelen-kelen bɛɛ laban na, ɲininkali dɔ lawuli min ka kan ka jaabi n’i seginna ka na. I bɛ kalan min kɛ i barokɛɲɔgɔn kun, ni o kɛra kalan ye min bɛ kɛ tuma bɛɛ, i ka baro kɛ Qu’enseigne la Bible gafe kan, k’a ta a daminɛ na fo ka na se a laban na. N’i barokɛɲɔgɔn banna Qu’enseigne la Bible gafe la dun? I bɛ se halisa ka to ka na sɔn-ni-sɔn gafeninw di a ma, ka barow kɛ a fɛ Bibulu kan. Ikomi i bɛ ka i cɛsiri k’a dɛmɛ walisa kibaru duman ka diya a ye, laala, a mɛn o mɛn a bɛ se ka sɔn Bibulukalan ma.

5. Munna an ka kan k’a ɲini ka fɛn wɛrɛ kɛ min tɛ dan sɔn-ni-sɔn gafeninw dili dɔrɔn ma?

⁵ La Tour de Garde ni Réveillez-vous ! bɛ se ka to mɔgɔ b’a ŋaniya k’a dɔn Bibulu bɛ mɔgɔ kalan min la tigitigi. O la sa, mɔgɔ minnu sɔnna sɔn-ni-sɔn gafeninw na, i jija kɛrɛnkɛrɛnnenya la ka Bibulukalanw daminɛ u kun. O cogo la, Yesu ye ci minnu fɔ an ye, n’o ye ka mɔgɔw ‘kɛ a ka kalandenw ye . . . ka u kalan,’ an bɛna tugu o ciw la.—Mat. 28:19, 20.