Mɔgɔ jigitigɛlenw dusu saalo
1 Hadamadenw ka tariku kɔnɔna na, mɔgɔw mago ma deli ka kɛ dususaalo la i n’a fɔ bi. N’an bɛ tugu an ɲɛmɔgɔ ni an ka Masakɛ Krisita Yesu kɔ, an fana ka baara kɛ ka “mɔgɔ jigitigɛlenw jigi tugu.”—Esa. 61:1.
2 An bɛ mɔgɔw dusu saalo cogo min na: Walisa ka mɔgɔw dusu saalo, ni an bɛ ka cidenyabaara kɛ, an ka kuma fɔcogo ka kan ka bɛn ani ka dusu don mɔgɔw kɔnɔ. Diinɛ kalansira minnu tɛ tiɲɛ ye ani kojugu minnu bɛ ka kɛ diɲɛ kɔnɔ, n’an tɛ kuma kosɛbɛ olu kan, tiɲɛ min bɛ Bibulu kɔnɔ ani Ala ka layidu minnu bɛ mɔgɔw dusu saalo, olu bɛna kɛ an ka baro fanba ye. O kɔrɔ tɛ ko an ma kan ka kuma Harmagedɔn kan. An ka ci ye ka nin kow fɔ mɔgɔw ye: “Matigi na a ka ɲumaya jira a ka mɔgɔw la san min na, ka o welewele da. Matigi na a mɔnɛbɔ a juguw la don min na, ka o fana welewele da,” ka mɔgɔjugu “laadi walisa a ka kɔsegin k’a ka sira juguw bila.” Nka, ka mɔgɔw lasɔmi Harmagedɔn ko la ani ka ɲɛfɔli kɛ a kɔlɔlɔw kan, o kɔrɔ tɛ k’an bɛ sinsin o kow kan fo mɔgɔw tɛ miiri tun Ala ka Masaya Kibaru Duman la.—Esa. 61:2; Eze. 3:18; Mat. 24:14.
3 Da ni da la: Ka mɔgɔw sɔrɔ minnu jigitigɛlen don k’a sababu kɛ bana ye, u diyanyemɔgɔ dɔ ka saya ye, tilenbaliyaw ye, walima wariko gɛlɛyaw ye, o ye ko ye an bɛ min ye tuma caman na. Ikomi an ye Krisita ladegebagaw ye, an bɛ mɔgɔ minnu sɔrɔ cidenyabaara la, u ‘hinɛ bɛ don’ an na, wa, an b’a jira u la ko an bɛ u faamu. (Luka 7:13; Rom. 12:15) Hali ni an bɛ Bibulu kalansira kelen walima fila kalan an barokɛɲɔgɔn ye minnu bɛ a ka gɛlɛya kan, an ka kan k’a jira ko an bɛ “lamɛnni kɛ joona,” k’a to o cogo la a ka se k’a kɔnɔnata fɔ. (Yak. 1:19) An kɛlen kɔ k’a lamɛn, o b’an labɛn koɲuman ka se k’a dusu saalo.
4 N’a bɛnnen don tuma min na an ka baro kɔnɔna na, an bɛ se k’a fɔ ko: “Ne b’a fɛ ka Bibulu kɔnɔ kuma dɔw jira i la minnu bɛ dusu don mɔgɔw kɔnɔ.” An barokɛɲɔgɔn bɛ se ka hakilila fɛn o fɛn fɔ min tɛ tiɲɛ ye, an kana a ɲini ka olu bɛɛ latilen. Nka, an ka kan k’an sinsin fɛn min kan, o ye ka dusu don a kɔnɔ ani k’a dusu saalo ni Bibulu kɔnɔ kuma ye walisa a ka dusu sɔrɔ. O sira la, barokun min bɛ Comment raisonner à partir des Écritures gafe ɲɛw 119-122 la ko “ Encouragement ” (n’o ye ka dusu don mɔgɔ kɔnɔ), aw bɛ se k’o lajɛ. Walima i bɛ se ka sɛbɛndennin di i barokɛɲɔgɔn ma min tɔgɔ ye ko De l’aide pour les déprimés (Dɛmɛ ka ɲɛsin mɔgɔ dusu tiɲɛnenw ma), wa, a kɔnɔkuma minnu bɛ dusu don mɔgɔw kɔnɔ, aw ka o lajɛ ɲɔgɔn fɛ.
5 Cogow ɲini ka mɔgɔw dusu saalo: Yala i bɛ i sigiɲɔgɔn, i baarakɛɲɔgɔn, i kalandenɲɔgɔn walima i somɔgɔ dɔ dɔn min mago bɛ dususaalo la wa? Munna i tɛna i jija ka taa bɔ o mɔgɔw ye u ka so, k’a kɛ i kuntilenna ye k’u dusu saalo ni Bibulu kɔnɔkumaw ye? N’i b’a dɔn kun min na u mago bɛ dusu saalo la, i bɛ se ka i labɛn o mago kɛrɛnkɛrɛnnen kama. Walisa ka mɔgɔw dusu saalo, dɔw bɛ lɛtɛrɛw walima telefɔni ci u ma. An mɔgɔɲɔgɔn kanuya lakika min bɛ an dusukun na, o bɛna an bila k’a jira ko an bɛ hinɛ u la, wa, dususaalo min bɛ bɔ Bibulu kɔnɔ, ka o fana lase u ma.—Luka 10:25-37.
6 Tiɲɛ na, mɔgɔ minnu ka mɔgɔw banna, an cira ka olu dusu saalo, mɔgɔ minnu dusu tiɲɛnenw don, ka dusu don olu kɔnɔ ani ka jigiya di u ma ko sini bɛna diya kosɛbɛ. O de ye dususaalo ye, mɔgɔ mago bɛ min na diɲɛ yɔrɔ bɛɛ la. Ala ye fɛn ɲuman minnu layidu ta, ka kuma o kan ni nisɔndiya ye, o bɛna dususaalo ni jigiya di mɔgɔ kɔnɔnajɛlenw ma. An ka an hakili to a la tuma bɛɛ ka mɔgɔ jigitigɛlenw jigi tugu, n’o ye ko ye mɔgɔw mago bɛ min na.