A kɛ i kuntilenna ye ka Bibulukalan ɲɛminɛ
1 Yesu Krisita y’a fɔ ko: “Aw ka aw ɲɛw kɔrɔta ka forow filɛ. Suman kɔgɔra, a tigɛ tuma sera ka ban.” (Yuhana 4:35) Siga t’a la ko Yesu ka o kuma fana bɛnnen don Kretiɛn cidenyabaarakɛlaw ka cogoya ma bi.
2 Mɔgɔ kɔnɔnajɛlen minnu b’a fɛ ka kalan Jehowa ka siraw la, olu bɛ sɔrɔla halisa. O ye kɛnɛkanko ye ni an ye kalanden kuraw hakɛ jateminɛ minnu bɛ batise san o san. N’i b’a fɛ tiɲɛ na ka Bibulukalan ɲɛminɛ, i bɛ se ka mun kɛ?
3 A kɛ i kuntilenna ye: Ka Bibulukalan daminɛ ani k’o ɲɛminɛ tuma bɛɛ, i ka fɔlɔ ka o kɛ i kuntilenna ye. N’i bɛ foro cidenyabaara la tuma min na, i kuntilenna to i hakili la. Ikomi ci min dira anw Kretiɛnw ma, waajuli ani mɔgɔw kalanni sen bɛ o la, o kosɔn an kelen-kelen bɛɛ ka kan k’a ɲini ka dɔ fara an ka kɛta kan Bibulukalan ɲɛminɛni baara la.—Mat. 24:14; 28:19, 20.
4 Fɛn wɛrɛ minnu ka kan ka to an hakili la: Ka Ala deli ni an dusukun bɛɛ ye, o ye wajibi ye Masaya weleweledalaw bɛɛ ma. Tuma dɔw la, an bɛ mɔgɔw sɔrɔ minnu ye Ala deli walisa ka dɛmɛ sɔrɔ alako ta fan fɛ. Ni Jehowa y’an kɛ baarakɛminɛn ye ka o mɔgɔ suguw ye ani k’u kalan, o ye dugawuba ye an bolo dɛ!—Ag. 2:7; Kɛw. 10:1, 2.
5 An balimamuso dɔ ye Jehowa deli walisa ka Bibulukalan sɔrɔ. O kɔfɛ, sɛbɛndennin min tɔgɔ ye ko Voulez-vous en savoir plus sur la Bible ? (n’o ye ko: yala i b’a fɛ ka dɔ fara i ka dɔnniya kan Bibulu ko la wa?) a ye o caman bila kɛnɛkan a ka baarakɛyɔrɔ la. Muso dɔ ye o kelen ta. A kɛlen kɔ ka a kuuru bɛɛ kalan, ladɛrɛsiw dira yɔrɔ min na, a y’a daminɛ k’o yɔrɔ lafa. Ka muso to o lafali la, an balimamuso kumana a fɛ, wa, a sera o cogo la ka Bibulukalan daminɛ.
6 An weleweledala ɲɔgɔn minnu bɛ se kosɛbɛ Bibulukalanw daminɛcogo ni u ɲɛminɛcogo la, olu bɛ se k’i dɛmɛ i k’i kuntilenna sɔrɔ ka Bibulukalan ɲɛminɛ. Jehowa deli a k’i dɛmɛ ka Bibulukalan kelen sɔrɔ, wa, fɛn o fɛn bɛ yen minnu bɛ se k’i dɛmɛ k’i kuntilenna sɔrɔ, i ka baara kɛ ni o fɛnw ye. Laala, yan ni dɔɔnin cɛ, i bɛna nisɔndiya sɔrɔ ka Bibulukalan ɲɛminɛ.