An ka kan ka to timinandiya la cidenyabaara la

¹ K’a ta san 1992 ma fo ka na se bi ma, san o san Jehowa Seerew y’u timinandiya ka lɛrɛ minnu kɛ Masaya waajuli ni kalandenw kɛli baara la diɲɛ bɛɛ kɔnɔ, o lɛrɛ ka ca ni lɛrɛ miliyari kelen ye. An y’an ta min kɛ o dakabanabaara la, hali ni o ka dɔgɔ, o b’an nisɔndiya haali!—Mat. 28:19, 20.

² Siga t’a la ko foli ni tanuli bɛɛ bɛ Jehowa de ye, ale min y’an dɛmɛ an ka cidenyabaara la nin “waati gɛlɛnw” kɔnɔna na. (2 Tim. 3:1) Ni an ka kan k’an ta kɛ ni timinandiya ye o baara nafama na ka taa a fɛ, mun de ɲininen bɛ an fɛ?

³ An ka timinandiya bɛ bɔ fɛn minnu na: Ala kanuyaba ani an mɔgɔɲɔgɔn kanuyaba min b’an na, ani ŋaniya min b’an dusukun na ka an ka ɲɛnamaya kɛ ka bɛn an ka yɛrɛbakundili ma, o kow bɛ dusu don an kɔnɔ an ka Masaya baara la. (Mat. 22:37-39; 1 Yuh. 5: 3) Kanuya b’an bila an ka sɔn ka an yɛrɛ degun walisa ka se ka an ta kɛ kosɛbɛ waajuli baara la.—Luka 9:23.

⁴ An k’an jija walisa ka to timinandiya la: Sendonbaga, an jugu bɛ ko bɛɛ de kɛ walisa ka dɔ bɔ an ka timinandiya la cidenyabaara la. A bɛ baara kɛ ni nin ko damadɔw de ye walisa k’an dusu tiɲɛ: Ni waajulikɛyɔrɔ mɔgɔw tɛ nafa don kibaru duman na, o ko; diɲɛ ɲɛnajɛkow, gɛlɛya minnu bɛ an da la don o don, o kow, ani ni dɔ bɛ ka bɔ an ka kɛnɛya la, o jɔrɔ fana.

⁵ O la sa, an ka kan ka an cɛsiri kosɛbɛ walisa an ka to timinandiya la. A nafa ka bon an bolo ka an “ka kanuya fɔlɔ” bonya. Walisa ka o kɛ, an ka kan ka Bibulu, Ala ka Kuma kalan tuma bɛɛ, ka taasi o la. Jehowa bɛ fɛn o fɛn fana di an ma “Jɔnkɛ dannamɔgɔ hakiliman” sababu fɛ, walisa ka an ka dannaya kologɛlɛya, an ka baara kɛ kosɛbɛ ni o fɛnw bɛɛ ye.—Jir. 2:4; Mat. 24:45; Zab. 119:97.

⁶ I ko Bibulu kirayakumaw b’a jira ka jɛya cogo min na, Jehowa ka don bɛ ka surunya teliya la, don min na a bɛna mɔgɔjuguw hakili. (2 Pi. 2:3; 3:10) Ka o ko to an hakili la cogo jɛlen na, an ka an cɛsiri kosɛbɛ ka to timinandiya la cidenyabaara la, ka an sen don kosɛbɛ Masaya waajuli ni kalanden kɛli baara la, o min bɛ ka kɛ diɲɛ yɔrɔ bɛɛ la.