Masaya bɛ jigiya min di an ma, an k’o fɔ mɔgɔw ye
1 Nin don laban gɛlɛnw na, jigi tɛ mɔgɔ caman na diɲɛ kɔnɔ. (Efɛ. 2:12) Ni hakilintanya ye, dɔw y’u ka dannaya da nafolomafɛnw kan, diɲɛ kuntigiw kan, bi dɔnniya kan, ani o ɲɔgɔnna ko wɛrɛw kan. Nka, an nisɔndiyalen don ko jigiya jɔnjɔn b’an na siniko ta fan fɛ, wa, o jigiya bɛ an dusukun na i ko “banamini. A sigilen sinsinnen don”!—Heb. 6:19.
2 Ala ka Masaya bɛna mara kɛ tuma min na, dugukolo bɛna yɛlɛma ka kɛ alijinɛ ye. An ka mɔgɔ kanulen minnu sara, olu bɛna lakunun. (Kɛw. 24:15) Faantanya, tilenbaliya, bana, kɔrɔya ani saya tɛna kɛ tun. (Zab. 9:18; Mat. 12:20, 21; Jir. 21:3, 4) O kow ye Jehowa ka layidu dɔw de ye minnu bɛna tiimɛ sɔɔni. An jigi bɛ ko jumɛn de kan, n’an b’o makɔnɔna kɛrɛnkɛrɛnnenya la ni nisɔndiya ye?
3 Kibaru duman fɔ: Masaya bɛ jigiya min di an ma, an man kan ka o jigiya dan an yɛrɛ ma. Ala kanuya ani an mɔgɔɲɔgɔn kanuya b’an bila ka Yesu ladege ani “ka kibaru duman fɔ faantanw ye, . . . ka jɔnw ni kasolamɔgɔw hɔrɔnyali ani fiyɛntɔw ɲɛw yɛlɛli ko welewele da, ka mɔgɔ degunnenw bɔ tɔɔrɔ la ka u bila hɛrɛ sira kan.” (Luka 4:18) Ciden Paul ye kibaru duman fɔ sugu kɛnɛ kan, ani mɔgɔw bɛ sɔrɔ yɔrɔ o yɔrɔ la. Paul tun bolodegunnen bɛ kosɛbɛ cidenyabaara la. (Kɛw. 18:5) Paul tun bɛ cidenyabaara kɛ ni cɛsiri ye cogo min na, n’an bɛ o ladege, o bɛna an bali “nin diɲɛ hami kow ni nafolo lafilibanciya” kana an jigiya kɛ fɛn ye min jɛlen tɛ tun.—Marka 4:19.
4 Masaya bɛ jigiya min di an ma, o tɛna tiɲɛ n’an ye mɔgɔw sɔrɔ minnu b’a jira ko kibaru duman man di u ye, minnu tɛ nafa bɛrɛ don Masaya cikan na, walima minnu b’an kɛlɛ cogo jɛlen na. An “ka to an jigi fɔlen kan ka nɔrɔ a la kosɛbɛ.” (Heb. 10:23) ‘Kibaru duman maloya tɛ an na fewu.’ (Rom. 1:16) Ikomi an bɛ min fɔ, an b’a jira ko an dalen bɛ o la tigitigi, ko an timinan ka di fana, laala o bɛna laban ka dɔw bila k’an lamɛn.
5 Hali ni a bɛnnen don k’a jira mɔgɔw la ko diɲɛ cogo tiɲɛnen bɛ Bibulu ka kiraya kuma tiimɛni de jira, o bɛɛ n’a ta an tɛ mɔgɔw ye minnu bɛ bɔnɛ weleweleda. Nka, an ka cidenyabaara sinsinnen bɛ jigiya kan, Masaya bɛ min di an ma, n’o ye Ala ka Masaya kibaru duman ye. An ka kibaru duman wajuli kɛ cogo la min b’a jira ko an dalen bɛ o la tigitigi ani ni timinandiya ye ‘walisa jigi jɛlen dafalen ka sɔrɔ an kɔnɔ fo a laban.’—Heb. 6:11.