Jehowa Seerew ka san 2008 Kafoba ka jamalajɛ
1. (a) Paul ye laadilikan min di Heburu Kretiɛnw ma, munna o ye kɔrɔtɔko kɛrɛnkɛrɛnnen ye min bɛnnen bɛ bi? (Heburuw 10:24, 25 kalan) (b) Ko nata jumɛn de b’an bolo ka Paul ka laadilikan waleya?
1 Ciden Paul ye dusu don Heburu Kretiɛnw kɔnɔ u ka ɲɔgɔn lajɛ ani ka ɲɔgɔn laadi, “janko” n’u ɲɛ b’a la ko Matigi ka don surunyara. (Heb. 10:24, 25) Taamasyɛnw bɛ ka caya minnu b’a jira ko Paul tun kan bɛ “don” min ma o bɛ ka surunya kosɛbɛ. O la sa, an kɔrɔtɔlen don ka cogow sɔrɔ walisa anw n’an balimakɛw n’an balimamusow ka ɲɔgɔn lajɛ alako ta fan fɛ kalan kama min bɛ se k’an ɲɛminɛ nin “laban donw” na minnu farati bɛ ka bonya ka taa a fɛ. (2 Tim. 3:1) O cogo bɛna di an ma san 2008 kafoba ka jamalajɛ nataw la.
2. (a) Munna a nafa ka bon kosɛbɛ ka na jamalajɛ tile saba kuuru bɛɛ la? (b) Cogo jumɛn na an ka kan ka daminɛ ka labɛnw kɛ walisa ka na jamalajɛ la?
2 Na jamalajɛ tile saba kuuru bɛɛ la: An bɛ dusu don i kɔnɔ, i ka na jamalajɛ tile saba kuuru bɛɛ la. N’an ma “ɲɔgɔn lajɛli dabila,” an tɛna kalan nafama si jɛn. (Heb. 10:25) N’a bɛ se ka kɛ dɔrɔn i ka daminɛ k’i labɛn. Misali la, yala i y’a daminɛ ka wari mara walisa ka se ka taransipɔri, dumuni ani fɛn nafama wɛrɛw wari sɔrɔ wa? A ka ɲi i k’i ka patɔrɔn ladɔnniya joona walisa fɛɛrɛ minnu bɛnnen bɛ, a ka se ka o fɛɛrɛw tigɛ. Jamalajɛ bɛna kɛ tuma min na, n’i denw bɛna taa lakɔli la o waati la, i y’a boloda ka min kɛ, i ka u ka karamɔgɔw ladɔnniya o la. A fɔ u ye ko jamalajɛ ye aw ka bato kɔnɔko dɔ ye aw bɛ min kɛ tuma bɛɛ. I bɛ se ka da a la ko Jehowa bɛ duba i ka cɛsiriw ye, bawo i ye Masaya kunkankow bila jɔyɔrɔ fɔlɔ la.-Mat. 6:33.
3. Sira jumɛnw fɛ an bɛ se ka jira ko an b’an janto mɔgɔ wɛrɛw la?
3 Mɔgɔ wɛrɛw dɛmɛ u ka na o la: Paul y’a ɲini a balimakɛw fɛ fana u k’u “janto ɲɔgɔn na.” (Heb. 10:24) Yala i ka jɛkulu ka gafe kalan na, balimakɛw ani balimamuso dɔw mago bɛ dɛmɛ na walisa ka na jamalajɛ kɛyɔrɔ la wa? I bɛ se ka i ka Bibulu kalandenw dɛmɛ walisa u ka na jamalajɛ la i fɛ, hali n’u bɛna tile kelen dɔrɔn de la? I ka denbaya kɔnɔmɔgɔ minnu tɛ Jehowa seerew ye, i ye min boloda jamalajɛ ko la, i ka u ladɔnniya o ko la, k’u wele olu n’i ka na ɲɔgɔn fɛ. Kanuya b’i bila ka cɛsiri minnu kɛ, o bɛ se ka na ni dugawuw ye, i ma sigi ni minnu ye.
4. An ka kan ka mun kɛ n’an mago bɛ kunnafoni na jiginyɔrɔ ko la jamalajɛ kɛyɔrɔ wɛrɛ la min tɛ jamalajɛ ye an ka jɛkulu bilala ka taa min na?
4 N’i bɛna taa jamalajɛ wɛrɛ la min tɛ jamalajɛ ye i ka jɛkulu bilala ka taa min na, i bɛ se ka kunnafoni sɔrɔ jiginyɔrɔ ko la, n’i bɛ lɛtɛrɛ ci jamalajɛ biro ka ladɛrɛsi la min bɛ Demande de chambre pour cas particuliers sɛbɛnfura kɔfɛ. O sɛbɛnfuraw bɛna ci sɔɔni jɛkulu sɛbɛnnikɛlaw ma. Walisa ka jaabi sɔrɔ, i k’a lajɛ n’a y’a sɔrɔ i ye tɛnburu nɔrɔ lɛtɛrɛ foroko dɔ la i ka ladɛrɛsi bɛ min na ka o ni sɛbɛnfura ci ɲɔgɔn fɛ.
5. An ka kan k’an hakili to fɛn jumɛnw na Demande de chambre pour cas particuliers sɛbɛnfura ko la?
5 Mago Kɛrɛnkɛrɛnnenw: Ni weleweledala dɔ ye dɛmɛ ɲini walisa ka jiginyɔrɔ sɔrɔ, jɛkulu ka waajulibaara komite ka kan k’a latigɛ ni weleweledala bɛ se ka Demande de chambre pour cas particuliers Sɛbɛnfura lafa. Sani jɛkulu sɛbɛnnikɛla ka o sɛbɛnfura ci jamalajɛ biro ma, kunnafoni minnu bɛ o sɛbɛnfura kɔnɔ ani Utikalo tile fɔlɔ san 2008 lɛtɛrɛ min ɲɛsinnen bɛ maakɔrɔ kulu bɛɛ ma, u ka kan ka olu lajɛ fɔlɔ.
6. (a) N’an nana jamalajɛ la, an bɛ se ka nɔrɔ da Jehowa kan sira jumɛnw fɛ? (b) An balimakɛw taamacogo ɲuman kosɔn, mun kumaw de fɔra lotɛli dɔ baarakɛlaw fɛ?
6 Kɛwale ɲumanw: N’an tugura Jehowa ka ci fɔlen na ka ɲɔgɔn lajɛ walisa k’a bato, o bɛna ‘an nafa.’ Min nafa ka bon kosɛbɛ, o ye ko a bɛ cogow di an ma ka bonya da Jehowa tɔgɔ kan. (Esa. 48:17) An ka “kɛwale ɲumanw bɛ . . . jira kɛnɛ kan” mɔgɔ caman ɲɛ na kafoba ka jamalajɛ la, wa, o kɛwale ɲumanw bɛ dɔw bila ka u dusukunnataw fɔ. (1 Tim. 5:25) An ka jamalajɛ kɛra dugu minnu na san caman kɔnɔ, olu dɔ la kelen na, lotɛli tigi dɔ y’a fɔ ko: “Jehowa seerew ni u ka jamalajɛw kɔrɔ ye min ye an bolo, mɔgɔ caman kumana o kan. Aw ka mɔgɔw ye forobayɔrɔw saniya cogo min na, an y’o ye. U ye mɔbili jɔyɔrɔw ko cogo min na, an ye o fana ye. A b’an nisɔndiya ko aw bɛ anw fɛ yan an ka lakɔli bilatuma na. An jigi b’a la ko aw bɛna to ka na an fɛ san nataw kɔnɔna na.” Lotɛlitigi dɔ wɛrɛ kɛlen kɔfɛ k’a fɔ a ye gɛlɛya minnu sɔrɔ ni kulu wɛrɛw ni u kuntigiw ye, a kumana balimakɛw kan k’a jira ko tuma min na u tun bɛ a ka lotɛli la, u tun muɲunen bɛ, wa, min tun bɛ fɔ u ye, u tun bɛ sɔn o ma. A ko: “Mɔgɔ minnu bɛ na an ka lotɛli la, an b’a fɛ olu bɛɛ ka kɛ i ko Jehowa Seerew.” An balimakɛw taamacogo de nana ni nin kumaw ye ani o ɲɔgɔnna wɛrɛw ye minnu ye nisɔndiya lase Jehowa an ka Ala ma.
7. K’an tulomajɔ porogaramu kalan kelen-kelen bɛɛ la, Matiyu 4:4 y’o nafa jira cogo jumɛn na?
7 Yesu ko “kuma minnu bɛɛ bɛ bɔ Ala da la”, an ka ɲɛnamaya yɛrɛ bɛ bɔ olu lamɛnni na. (Mat. 4:4) An ka san o san jamalajɛw la, Jehowa bɛ alako ta fan fɛ “dumuni” di “a waati latigɛlen na,” min labɛnna “Jɔnkɛ dannamɔgɔ hakiliman” fɛ. (Mat. 24:45) Baara caman de kɛra walisa ka o alako ta fan fɛ dumuniba labɛn ani k’o di. Jehowa y’a janto an na ni kanuya ye cogo min na, an bɛ se k’an ka waleɲumandɔn jira o ko la n’an bɛ na jamalajɛ la, k’an tulomajɔ porogaramu kalan kelen-kelen bɛɛ la.