Minnu ye waajulibaara jɔ, an kana ɲinɛ olu kɔ
1. Mun na an ka kan k’a ɲini ka dusu don an balimaw kɔnɔ minnu ye waajulibaara jɔ?
1 Yala i bɛ balima dɔ dɔn min ye waajulibaara jɔ wa? I b’a sɔrɔ a tɛna jɛkulu kɔnɔ tun, laala, a ye sira bila. I bɛ se ka bɛn ni o mɔgɔ dɔ ye, n’i bɛ ka cidenyabaara kɛ du ni du. An ka kan k’a to an hakili la, k’o tigi ye halisa an balima ye alako ta fan fɛ. An b’a fɛ ka an ka kanuya jira a la, k’a dɛmɛ a ka segin ka na jɛkulu kɔnɔ, ani an niw Gɛnna ni u Kɔlɔsibaga ma.—1 Pi. 2:25.
2. An bɛ se ka dusu don an balima kɔnɔ min ye waajulibaara jɔ, cogo jumɛn na?
2 An k’a jira ko an bɛ hami u la: Ka telefɔni ci dɔ ma min ye waajulibaara jɔ, walima ka taa bɔ a ye, k’a sɔrɔ an ma mɛɛn kuma na, o bɛ se k’a jira o tigi la ko an ma ɲinɛ a kɔ. An bɛ se ka mun fɔ? An bɛ se ka dusu don a kɔnɔ, ni an b’a to dɔrɔn a ka dɔn ko an bɛ miiri a la. An ka baro ka kɛ tuma bɛɛ fɛn ye min ka di, ani min bɛ dusu don a kɔnɔ. (Fil. 4:8) An bɛ se ka fɛn dɔ fɔ min ɲɛfɔra lajɛ dɔ la a ma mɛɛn. An bɛ se fana k’a wele lajɛ dɔ la, walima jamalajɛ nata dɔ la, k’a jira a la ko an bɛna sigiyɔrɔ bila a ye an kɛrɛfɛ, walima ko an bɛ a nacogo ko ɲɛnabɔ.
3. An balimamuso dɔ nana waajulibaara daminɛ kokura cogo jumɛn na?
3 An balimamuso dɔ tun ye waajulibaara jɔ a ka ca ni san 20 ye. An balimamuso wɛrɛ y’a sɔrɔ waajulikɛyɔrɔ la. Hali ni an balimamuso min ye waajulibaara jɔ, o ma sɔn Bibulu kalan ma, an balimamuso min y’a ye, o tora ka na bɔ a ye, ka sɔn-ni-sɔn gafenin kuraw di a ma. Kafoba ka jamalajɛ kɔfɛ, an balimamuso ye jamalajɛ yɔrɔ koloma dɔw fɔ a ye. An balimamuso min tun ye waajulibaara jɔ, o labanna ka waajulibaara daminɛ kokura.
4. An balima min ye nali daminɛ kokura jɛkulu ka lajɛw la, an ka kan k’o minɛ cogo jumɛn na?
4 Ni dɔ seginna ka na: An balima min ye waajulibaara jɔ, ni o ye lajɛw nali daminɛ kokura, an ka kan k’a minɛ cogo jumɛn na? Yesu ka kalanden minnu tun y’a to yen waati dɔ la, Yesu ye olu minɛ cogo jumɛn na? Yesu y’a fɔ u ma ni kanuya ye ko a “balimakɛw,” a y’a jira fana ko a dalen bɛ u la. A ye baara nafama belebele yɛrɛ di u ma ka kɛ. (Mat. 28:10, 18, 19) Waati dɔɔnin dɔrɔn o kɔfɛ, kalandenw tun cɛsirilen bɛ kibaru duman fɔli la, u ma o “dabila.”—Kɛw. 5:42
5. Kow fɔ minnu na an ka kan ka maakɔrɔw ɲininka fɔlɔ, sanni an k’a fɔ ko an bɛ an balima dɔ dɛmɛ min ye waajulibaara jɔ.
5 Sanni an k’a fɔ an balima dɔ ye min ye waajulibaara jɔ, ko an bɛ Bibulu kalan kɛ a kun, walima sanni an k’a ɲini an balima dɔ fɛ min ye waajulibaara jɔ a mɛɛnna, k’a k’an bilasira cidenyabaara la, an ka kan ka maakɔrɔw ɲininka fɔlɔ, walisa k’a dɔn ni o bɛ se ka kɛ. Ni an ni weleweledala dɔ bɛnna waajulikɛyɔrɔ la min ye waajulibaara jɔ, an ka kan k’o fɔ maakɔrɔw ye walisa u ka se k’o tigi dɛmɛ cogo la min ka kan.
6. An bɛ se ka nisɔndiya jumɛn sɔrɔ an balimaw dɛmɛni na, minnu ye waajulibaara jɔ?
6 Iko Bibulu b’a jira ka jɛya cogo min na, mɔgɔ minnu bɛ boli kɛ fo ka se a laban na, olu dɔrɔn de bɛna kisi. (Mat. 24:13) O kosɔn, mɔgɔ minnu binna, walima minnu ye sira bila, an k’an jan to olu la. Ni an bɛ muɲu ka Jehowa ka kanuya jira, an kɛtɔ ka jira u la ko an bɛ u kanu tiɲɛ na, laala, an bɛna nisɔndiya sɔrɔ k’a ye ko u ye baara senuma daminɛ kokura an kɛrɛfɛ.—Luka 15:4-10.