An ka seereya kɛ du-ni-du
1 Zuluyekalo tile fɔlɔ san 1893 La Tour de Garde (Angilɛkannama) ye du-ni-du cidenyabaara nafa jira. A ko: “Mɔgɔ minnu degelen bɛ Tiɲɛ jɛnsɛnni na, olu bɛna sɔn a ma ko ka du-ni-du waajuli baara kɛ ni L’AURORE DU MILLÉNIUM ye, o ye, bi waati la, tiɲɛ jɛnsɛncogo ye, min ka fisa ka taa ka segin ni a jɛnsɛn cogo tɔw bɛɛ ye.” Diɲɛ kɔnɔ, du-ni-du waajuli nana kɛ fɛn ye Jehowa Seerew bɛ faranfasi min fɛ. Ikomi jamana dɔw la, ka mɔgɔw sɔrɔ u ka so, o bɛ ka gɛlɛya ka taa a fɛ, yala nafa bɛ du-ni-du waajuli fɛɛrɛ la hali sa wa?
2 A sinsinnen bɛ Bibulu kan, wa, nafa b’a la: Ka seereya kɛ du-ni-du, o sinsinnen bɛ Bibulu kan. Yesu y’a fɔ a ka kalanden 70 ye ko u fila-fila ka taa mɔgɔw ka duw kɔnɔ. (Luka 10:5-7) Yesu salen kɔfɛ, a ma mɛn, Bibulu y’a fɔ Yesu ka kalandenw ko la ko: “Don o don, ka u to Alabatosoba kɔnɔ ani mɔgɔw ka duw kɔnɔ, u ma mɔgɔw kalanni ni Krisita Yesu Kibaru Duman fɔli dabila.” (Kɛw. 5:42) Ciden Paul fana ye mɔgɔw kalan ni timinandiya ye sow bɛɛ kelen-kelen kɔnɔ walima du-ni-du.—Kɛw. 20:20.
3 Ka seereya kɛ du-ni-du, o b’a la ka kɛ kibaru duman jɛnsɛn cogo bɛɛ la fisaman ye hali bi. Ale sababu la an bɛ to ka mɔgɔw “ɲini” ni fɛɛrɛ sigilen ye, mɔgɔ minnu ka kan n’a ye, wa o ɲinini bɛ kɛ ko ɲɛnabɔlen ye. (Mat. 10:11) Tuma caman na, mɔgɔw lafiyalen don kosɛbɛ ni u bɛ so. Ni an bɛ kuma mɔgɔw fɛ ɲɛ-ni-ɲɛ—an b’u kumakan mɛn, k’u ɲɛda cogoyaw ye ani k’a kɔlɔsi fɛn minnu bɛ u lamini na—o b’a to an b’a faamu fɛn minnu nafa ka bon u bolo kosɛbɛ, ani fɛn minnu ye u haminankow ye. Tuma caman na, o bɛ cogo di an ma fana ka mɛn baro la u fɛ, an tɛ se ka cogo min ɲɔgɔn sɔrɔ.
4 Yɛlɛma don waatibolodacogow la: A tun ka di ciden Paul ye ka yɛlɛmaw don a ka waatibolodacogow la “Kibaru Duman kosɔn.” (1 Kɔr. 9:23) Laala an fana bɛ se ka yɛlɛma don an ka waatibolodacogo la, walisa ka waajuli kɛ mɔgɔw ka teli ka sɔrɔ so waati min na, i n’a fɔ tile bantuma, dɔgɔkun labanw na, walima kɔnzew la. I ma mɔgɔw minnu sɔrɔ u ka so, i ka o bɛɛ sɛbɛn, k’i jija ka segin ka na o yɔrɔw la don wɛrɛ la dɔgɔkun kɔnɔ, walima waati wɛrɛ la o don kelen na.
5 Hali mɔgɔ minnu tɛ kɛnɛbagatɔw ye kosɛbɛ, olu fana bɛ se ka u sen don du-ni-du waajuli la. Laala, an bɛ se ka kow sigi sen kan, ka o mɔgɔ suguw ta an fɛ ka taa waajuli kɛ sow la minnu lasɔrɔli ka nɔgɔn. O la, u bɛ baara kɛ ka kɛnyɛ ni u cogo ye, ni lafiya ye. An balimamuso dɔ bɛ yen min ninakili bɛ to k’a degun. A bɛ se ka so kelenpe de kɛ lɛrɛ tilancɛ o lɛrɛ tilancɛ. O bɛɛ n’a ta, a wasara u kɛlen ka a sen don waajuli baara la ni waajulikɛkulu ye.
6 Mɔgɔ caman minnu bɛ iko saga jogo ta fan fɛ, olu bɛ ka sɔrɔ ka taa a fɛ da-ni-da waajulibaara senfɛ. Weleweledala dɔ ye da dɔ kɔnkɔn minkɛ, a fɔra a ye ko: “Don. Ne b’a dɔn i ye mɔgɔ min ye. Ne tun bɛ ka Ala deli walisa a ka mɔgɔ ci ne ma ka ne dɛmɛ. O kɔfɛ, ne ye da kɔnkɔnkan mɛn. Ala ye ne lamɛn, ka i ci ne ma.” Du-ni-du seereya bɛ ka nɔ minnu bɔ, olu b’a jira ko Jehowa bɛ ka duba a waajulikɛfɛɛrɛ ye. (Mat. 11:19) A latigɛ ka du-ni-du seereya kɛ i ka cidenyabaara kɔnɔko basigilen dɔ ye.
[Study Questions]
1. Du-ni-du cidenyabaara bɛ ɲininkali jumɛn lawuli? Mun na?
2. Mun b’a jira ko du-ni-du seereya sinsinnen bɛ Bibulu kan?
3. Ka seereya kɛ du-ni-du, o nafa dɔw ye jumɛnw ye?
4. An bɛ se ka mun kɛ walisa du-ni-du seereya ka nɔ bɔ kosɛbɛ?
5. Mɔgɔ minnu tɛ kɛnɛbagatɔw ye, olu bɛ se ka u sen don du-ni-du baara la cogo di?
6. Mun na an ka kan ka du-ni-du seereya kɛ an ka cidenyabaara kɔnɔko basigilen dɔ ye?