An k’a jira mɔgɔw la ko an bɛ u fɛ —An ka waajuli kɛ an kana mɔgɔ bɔ mɔgɔ la
1 Yeli fɛn dɔ la, ciden Yuhana ye mɛlɛkɛ dɔ pantɔla ye sankolo cɛmancɛ la, min bɛ ka kibaru duman banbali fɔ “siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” ye. (Jir. 14:6) Yala an bɛ mɛlɛkɛ ladege, ka waajuli kɛ k’a sɔrɔ an ma mɔgɔ bɔ mɔgɔ la wa? Hakilila dɔw bɛ se ka na an na minnu tilennen tɛ, k’a sɔrɔ an ma a dabɔ a kama. An bɛ mɔgɔ minnu ye, miiriya min b’an na ka ɲɛsin olu ma, o bɛ se ka nɔ bila an ka kibaru ɲɛfɔcogo la u ye. O kosɔn, ni an bɛ ka waajuli kɛ mɔgɔw ye minnu ni an bɔyɔrɔ tɛ kelen ye, an ka kan k’a jira ko an bɛ u fɛ tiɲɛ na.
2 I ka waajulikɛyɔrɔ cogo jateminɛ: Yala mɔgɔw bɔra jamana fan wɛrɛw la walisa ka na sigi aw ka waajulikɛyɔrɔ la wa? An ka teli ka o mɔgɔ suguw kɛ bolokɔfɛ mɔgɔw ye. Mun na? Bawo kan minnu bɛ fɔ tuma caman na an ka sigida waajulikɛyɔrɔ la, u fanba tɛ o kanw mɛn. Aw k’a bɔ aw yɛrɛw la ka o mɔgɔ suguw ɲini, k’aw jija k’olu dɔn ka ɲɛ. U magow ye mun ye? A ka di u ye ka baro kɛ fɛn jumɛnw kan? U jɔrɔnankow ye mun ye? U ka teli ka mɔgɔw bisigi ni ko jumɛnw ye? I jija ka Masaya cikan ɲɛfɔ ka bɛn o kow ma. (1 Kɔr. 9:19-23) Iko ciden Paul, an ka kan k’a dɔn ko a wajibiyalen don an ma ka kibaru duman fɔ an ka waajulikɛyɔrɔ mɔgɔ kelen-kelen bɛɛ ye. Mɔgɔ minnu lamɔcogo ni an lamɔcogo tɛ kelen ye, mɔgɔ minnu bɛ kan wɛrɛw fɔ ani minnu ye nafolotigi ye, olu bɛɛ sen bɛ o mɔgɔw la.—Rom. 1:14.
3 O bɛɛ n’a ta, i bɛ se cogo di ka waajuli kɛ mɔgɔ ye min tɛ i ka kan fɔ? Baara kɛ koɲuman ni Une bonne nouvelle pour des gens de toutes nations gafedennin ye. I bɛ se fana ka sɛbɛndennin wɛrɛw walima gafenin damadɔw ta i bolo kanw na minnu bɛ fɔ ka caya i ka waajulikɛyɔrɔ la. (San 2003 Zuluyekalo An ka Masaya Cidenyabaara ɲɛ 4nan, a dakunw 2-3 lajɛ.) Ka fara o kan, weleweledala dɔw ye u cɛsiri ka foli kɛcogo ni kibaru duman fɔcogo nɔgɔn dɔ dege kan wɛrɛw la. A ka di mɔgɔw ye ka mɔgɔ wɛrɛ ye min bɛ k’a jija ka kuma u fɛ u yɛrɛw ka kan na, hali ni o tigi tɛ bɛrɛ dɔn. O bɛ se k’u sama ka na kibaru duman fan fɛ.
4 Jehowa ladege: Ni an bɛ kuma mɔgɔw fɛ minnu bɔyɔrɔ tɛ kelen ye, an bɛ an ka Ala Jehowa ladege, ale min tɛ mɔgɔ bɔ mɔgɔ la, ale min “b’a fɛ mɔgɔw bɛɛ ka kisi ka se ka tiɲɛ dɔn.”—1 Tim. 2:3, 4.