A’ ye taa a fɛ k’aw jigi da Jehowa kan walima ka a makɔnɔ

¹ Esayi y’a sɛbɛn ko “Matigi ye Ala tilennen ye,” walima kiri Ala ye. A ko mɔgɔ “minnu jigi dalen bɛ a kan, olu ye dubadenw ye” walima minnu b’a makɔnɔ. (Esa. 30:18b) Ala ye kiri minnu bin a juguw kan, k’a ka baarakɛla kantigiw kisi, olu maana caman ɲɛfɔlen bɛ Bibulu kɔnɔ. O maana suguw bɛ Jehowa batobagaw kalan fɛn jumɛnw na bi? An bɛ se ka mun kɛ sisan walisa k’an labɛn Jehowa “ka donba juguman” kama? (Joɛl 2:31, 32) An ka Kafoba ka Jamalajɛ natɔla min tɔgɔ ye ko “Kisili ka surun,” o bɛna an bila k’an hakilijakabɔ o ɲininkaliw kan, ani ka an yɛrɛ sɛgɛsɛgɛ. A bɛna an dɛmɛ fana ka to Jehowa makɔnɔni na.

² Fɛɛrɛw tigɛ sisan: Walisa an ka nafaba sɔrɔ alako ta fan fɛ kalan na min labɛnna ni kanuya ye, fo an ka na kalan bolodalenw bɛɛ la. Labɛn o labɛn ka kan ka kɛ, walisa e yɛrɛ ni i ka denbaya ka se ka na tile saba bɛɛ la, a daminɛ sisan i ka olu kɛ. O bɛ kɛ hakilitigiya ye. (Nt. 21:5) Misali la, yala i y’a daminɛ ka wari mara taransipɔri ni dumuni ani ko nafama wɛrɛw kama wa? Ka tile damadɔw kɔnze ɲini i ka patɔrɔn fɛ; i n’i furuɲɔgɔn min tɛ Seere ye, aw ka jɛ ka kuma i ka ko latigɛlenw kan; ka siyɔrɔ maminɛ lotɛli la walima ka Demande de logement pour cas particuliers (CO-5) sɛbɛn lafa, ani ka Bibulu-kalandenw dɛmɛ u ka na tile saba bɛɛ la, o fɛn bɛɛ sen bɛ i ka labɛnw na. I kana o ko nafama ɲɛnabɔli bila ka sumaya fo jamalajɛ waati ka se. Nka, i ka o kow fɔ Jehowa ye i ka delili la, i ka da a la ko “a na i ka ko ɲɛnabɔ.”—Zab. 37:5; ko kɛlen min ɲɛfɔlen bɛ san 2003 Annuaire ɲɛ 197, d. 3-ɲɛ 198, dakun 1, o lajɛ.

³ Mago kɛrɛnkɛrɛnnenw: Ntalenw 3:27 b’a fɔ ko: “Mɔgɔ min ka kan ni dɛmɛni ye, ni a dɛmɛni se bɛ i ye, i kana ban ka ko ɲuman kɛ o ye.” Jamalajɛ ta fan fɛ, an bɛ se cogo di ka ko ɲuman kɛ mɔgɔw ye? Weleweledala minnu kɔrɔla, minnu ye lujuratɔw ye, minnu bɛ waajuli baara la waati dafalen na, ani mɔgɔ wɛrɛw mago bɛ se ka kɛ dɛmɛ na taransipɔriko la walima jatigilako la. O mɔgɔ suguw somɔgɔw de fɔlɔ bɛ jɔ ni u magow ye. (1 Tim. 5:4) Ni u somɔgɔw tɛ se k’u dɛmɛ, u kretiɛnɲɔgɔnw ka kan ka se k’u dɛmɛ. (Gal. 6:10) Gafe-kalan lakɔlɔsibagaw ka kan k’a sɛgɛsɛgɛ mago kɛrɛnkɛrɛnnen bɛ u ka kulu kɔnɔmɔgɔ minnu na, ka kɔn joona ka o ko ɲɛnabɔ sanni jamalajɛ ka se.

⁴ Taamacogo ɲuman bɛ bonya da Ala kan: Ni an camanba b’an lajɛ kafoba ka jamalajɛw la, an taamacogo bɛ kɛ seereya ye mɔgɔw bolo. O bɛ mun waajibiya an ma? Kafo ka jamalajɛ bɛ kɛ dugu min na, ni an bɛ o lotɛliw la, o dumunikɛyɔrɔw la walima jagokɛyɔrɔ wɛrɛw la, an ni minnu bɛ gɛrɛ ɲɔgɔn na, olu ka kan ka nisɔndiya sɔrɔ k’a sababu kɛ an ka kretiɛnya jogow ye, i n’a fɔ muɲuli, sabali, ani yɛrɛminɛ, ani ko an ye mɔgɔw ye minnu ka ko kɛcogo bɛrɛ bɛnnen don. (Gal. 5:22, 23; Fil. 4:5) An bɛɛ ka kan ka kanuya sugu min jira, o ye kanuya ye min “tɛ ko bɛnbali kɛ, a t’a yɛrɛ nafa ɲini. A tɛ dimin joona.” Hali ni gɛlɛyaw walima tɔɲɔlikow nana, an bɛna ko “bɛɛ kɛ Ala bonyali kosɔn.”—1 Kɔr. 10:31; 13:5.

⁵ Finidoncogo ani kun dilancogo bɛrɛ bɛnnen: An kelen-kelen bɛɛ bɛ se ka an ta kɛ walisa mɔgɔw ka miiriya ɲuman sɔrɔ an ko la, ni an b’an yɛrɛ tanga finidoncogo ni kun dilancogo ma minnu dama tɛmɛnen don, walima minnu bɛ yɛrɛlabila jira. An bɛna an yɛrɛ tanga o finidoncogo ni kun dilancogo ma ni an bɛ taa jamalajɛ la walima ni an bɛ na ka bɔ o yɔrɔ la, ni an bɛ ka dɛmɛ don jamalajɛ kɛyɔrɔ labɛnni na ani ni an bɛ jamalajɛ kɛnɛ kan ka kalan lamɛn. Ikomi an ye Ala ka baarakɛlaw ye, fɛn fɔlɔ min nafa ka bon an bolo, o ye a tɔgɔ bonya ye, ani an t’a fɛ a tɔgɔ ka tiɲɛ, an yɛrɛ diyanyekow walima an yɛrɛ ka lafiya tɛ. K’a lajɛ ni u ka denbaya yecogo bɛrɛ bɛnnen don tuma bɛɛ ani ni o kɛra ni hakili ye o koɲɛ bɛ dutigiw de kan.—1 Tim. 2:9.

⁶ O cogo kelen na, bonya ka ye an yecogo la lafiyawaatiw kɔnɔna na lotɛliw la, bitikiw kɔnɔ ani dumunikɛyɔrɔw la o fana nafa ka bon. An bɛ fini minnu don ka taa kafoba ka jamalajɛ la, a bɛnnen don fana an ka olu ɲɔgɔnna don ni an bɛ taa dumuni kɛ yɔrɔ wɛrɛw la, kalanw bannen kɔfɛ. Ni an bɛ badigi to an ka fini na, o bɛ sira dayɛlɛ an ye ka senfɛ seereya kɛ.—2 Kɔr. 6:3, 4.

⁷ Mɔgɔ minnu labɛnnen bɛ ka u yɛrɛ di: K’a fɔ ko mɔgɔ minnu bɛna kafoba ka jamalajɛ la, olu bɛna nisɔndiya ni nafa sɔrɔ hakilila dumuni na ani u bɛ cogow sɔrɔ ka jɛɲɔgɔnya don u balimaw fɛ walisa ka ɲɔgɔn barika bonya, o ɲininkali kun tɛ yɛrɛ. An ka nisɔndiya bɛna bonya kosɛbɛ ni an b’a bɔ an yɛrɛ la ka an sen don baara la min ka kan ka kɛ walisa kafoba ka jamalajɛ ka ɲɛ kosɛbɛ. (Kɛw. 20:35) Kafoba ka jamalajɛ komite minnu bɛ sigida la, olu bɛna a ɲini sɔɔni mɔgɔw ka u dɛmɛ o baara la. Yala an bɛ se ka an yɛrɛ labila o baara kama wa?—Zab. 110:3.

⁸ Esayi kɔnna k’a fɔ ko “Matigi [Jehowa] bɛ aw makɔnɔ, walisa a ka nɛɛma . . . kɛ aw ye. A na wuli ka hinɛ aw la.” (Esa. 30:18a) Ka Jehowa waleɲumandɔn a ka hinɛ ko la, ani a ka ɲumanya ko la, an ni ɲumanya min man kan, o ka kan k’an bila k’a bonya an taamacogo fɛ ani an yecogo fɛ ni an bɛ ɲɔgɔn dalajɛ an ka jamalajɛw la. Kafoba ka jamalajɛ min tɔgɔ ye ko “Kisili ka surun” o ka kɛ sababu ye ka nɔɔrɔ da Jehowa kan, ani k’an dɛmɛ an ka to a makɔnɔni na.

[Study Questions]

1. Kafoba ka jamalajɛ tɔgɔ ye mun ye? Mun na o bɛnnen bɛ?

2. An bɛ se k’a jira cogo di ko an ka kafoba ka jamalajɛ nafa ka bon an bolo kosɛbɛ?

3. Mago kɛrɛnkɛrɛnnen bɛ mɔgɔ minnu na, olu ka ko bɛ ɲɛnabɔ cogo di?

4. Jehowa ka jamakulu bɛ kafoba ka jamalajɛ kɛ dugu min na, u ka kan ka jogoɲuman jumɛnw jira o dugu kɔnɔ?

5. An ka finidoncogo ni an kun dilancogo fɛ, an bɛ se ka bonya da Jehowa kan cogo jumɛn na?

6. Mɔgɔw b’an ye ka danbe min to an na jamalajɛ waatiw la, mun na o yecogo kelen ka kan ka to an na lafiyawaatiw la?

7. Sira jumɛn fɛ an bɛ se ka dɔ fara jamalajɛ natɔla nisɔndiya kan?

8. Cogo jumɛn na an bɛ se ka an jeniyɔrɔ fin kafoba ka jamalajɛ kɛkoɲuman ni a nisɔndiya la? (Yɔrɔ lajɛ min tɔgɔ ye “An k’an hakili to Kafoba ka jamalajɛ kunkanko ninnu na.”)

[Box on page 6]

An k’an hakili to Kafoba ka jamalajɛ kunkanko ninnu na

◼ Kalan kɛwaatiw: Kalan bɛna daminɛ sɔgɔma 9:​30, tile saba bɛɛ la. Jamalajɛ kɛyɔrɔ daw bɛna yɛlɛ 8:00. Miniti damadɔw sanni kalan ka daminɛ, kalan ɲɛminɛbaga bɛ taa i sigi jama ɲɛ fɛ. O tuma b’a sɔrɔ Masaya fɔli bɛ sen na. An kelen-kelen bɛɛ sigilen ka kan ka sɔrɔ an sigiyɔrɔ la o waati la walisa kalan ka se ka daminɛ ni bonya ye. Kalan bɛna kuncɛ wulada fɛ 17:15 Jumadon na, 17:05 Sibiridon na, ani 16:10 Karidon na.

◼ Mobilijɔyɔrɔ: Ikomi tuma caman na, mobilijɔyɔrɔ tɛ kɛnɛba kojugu ye, o kosɔn mɔgɔ caman ka kan ka jɛ ka na mobili kelen na, sanni mɔgɔ kelen walima mɔgɔ fila dɔrɔn ka na mobili kelen na.

◼ Sigiyɔrɔ marali: Sigiyɔrɔ bɛ se ka mara mɔgɔ minnu dɔrɔn ye, o ye mɔgɔw ye minnu ni aw bɛ na ɲɔgɔn fɛ mobili kelen na, walima aw ni minnu bɛ so kelen kɔnɔ.

◼ Tilelafanako: A ɲininen bɛ aw fɛ, aw ka na ni aw ka tilelafana ye aw bolo, sanni aw k’a fɔ ko a bɛ bɔ jamalajɛ kɛyɔrɔ la ka taa dumuni ɲini kɛnɛma tilelafana duntuma na. Fɛn sumalen bɛ mara galasiyɛri fitinin min kɔnɔ, ni o bɛ se ka bila sigilan jukɔrɔ, aw bɛ se ka na ni o ye. Aw ma kan ka na ni galasiyɛriw ye minnu dilanna denbayaba kama, walima ka na ni wɛrɛmafɛnw walima ni dɔlɔmafɛnw ye jamalajɛ kɛyɔrɔ la.

◼ Bolomafaraw: Wari caman de bɛ bɔ walisa ka se ka kafoba ka jamalajɛ labɛn. An bɛ se ka an ka waleɲumandɔn jira ni an b’a bɔ an yɛrɛ la ka bolomafaraw di diɲɛ mumɛ baara kama an ka Masayaso kɔnɔ, walima jamalajɛ kɛyɔrɔ la. Sɛki minnu bɛ di bolomafara ye, olu ka kan ka sɛbɛn mɔgɔ min tɔgɔ la, o ye nin ye: Association “ Les Témoins de Jéhovah. ”

◼ Kaasaraw ani kɔrɔtɔkow: Ni mɔgɔ dɔ nana bana jamalajɛ kɛnɛ kan fo ka n’a kɛ ko ye min tɛ se ka bila-ka-sumaya, an b’a ɲini aw fɛ aw ka kuma balimakɛ fɛ min ka surun aw la ni o bilalen bɛ mɔgɔ kunbɛn la. O balimakɛ na o fɔ mɔgɔw ye minnu bɛ dɛmɛ kunfɔlɔ lase banabagatɔw ma. Banabagatɔw bɛ bangebagaw ni denbaya minnu bolo, olu de ka kan k’u hakili to a la ka na ni banbagatɔ ka furaw ye u bolo walisa ni banabagatɔ mago bɛ a ka furaw la tuma min na, a ka se k’u ta iko a sɛbɛnna a kun cogo min na.

◼ Ja tali walima kumakan tali: Ja ni kumakan bɛ ta ni masin sugu o sugu ye, olu si man kan ka don jamalajɛ kɛyɔrɔ kuran na, walima jamalajɛ kumakan tɛmɛsira si fɛ. Aw ka baara kɛ ni o mansinw ye cogo la min tɛna mɔgɔw hakili ta ka bɔ kalan kan.

◼ Foto tali: Ni aw bɛ ka foto ta kalan kɛtuma na, aw kana a to fototalan ka fotota yeelen bɔ.

◼ Pajɛriw ni selilɛriw: O fɛnw ka kan ka labɛn ka bila cogo la min b’a to u tɛna kɛ sababu ye ka mɔgɔw hakili ta ka bɔ kalan kan.

◼ Veuillez suivre l’intérêt sɛbɛnfura: Ni mɔgɔ o mɔgɔ y’a jira ko kibaru duman ka di a ye, k’a sababu kɛ an ka senfɛ seereya ye jamalajɛ kɛtuma na, an ka kan ka baara kɛ ni Veuillez suivre l’intérêt (S-43) sɛbɛnfura ye walisa ka kunnafoniw bɛɛ sɛbɛn o tigi ko la. Weleweledalaw ka kan ka na ni o sɛbɛnfura den kelen walima a den fila ye u bolo jamalajɛ la. A sɛbɛnfura dɔw bɛna sɔrɔ fana jamalajɛ sɛbɛnw sɔrɔyɔrɔ la. Ni aw ye o sɛbɛnfura yɔrɔ bɛɛ lafa, aw bɛ se ka olu bila sɛbɛnw sɔrɔyɔrɔ la walisa a ka o ko ɲɛnabɔ, walima i bɛ se ka olu di i ka jɛkulu sɛbɛnnikɛla ma ni i seginna ka na jɛkulu la.—San 2005 Feburuyekalo An ka Masaya Cidenyabaara ɲ. 6nan lajɛ.

◼ Siyɔrɔko: Ni aw bɛ yɔrɔ o yɔrɔ la, aw ka hakili senu den jira o yɔrɔ la aw kɛcogo fɛ ni mɔgɔ kelen-kelen bɛɛ ye. Aw ka kɛ mɔgɔw ye minnu ka ɲi, minnu bɛ mɔgɔw fɛ, minnu bɛ bonya da mɔgɔw wɛrɛw kan. Mɔgɔ minnu ye aw jatigiw ye, aw k’aw sen don olu ka ka baaraw ni u ka musakaw la ka kɛnyɛ ni aw seko bɛɛ ye. Aw bɛ bɔ yen don min na, aw ka so saniya k’a labɛn.