An bɛ se ka to timinandiya la cogo min na
1 Apolosi y’a ka cidenyabaara kɛ ni dusu min ye, o b’an hakili jigin an Kerecɛnɲɔgɔnw na bi, minnu timinan ka di kɛrɛnkɛrɛnnenya la waajuli baara la. (Kɛw. 18:24-28) O bɛɛ n’a ta, kankari dara an bɛɛ ye ko: “A’ ye aw jija, aw kana kɛ salabaatɔw ye. A’ ye aw dusuw kalaya.” (Rom. 12:11) Mun bɛ se k’an dɛmɛ ka timinandiya sɔrɔ, ani ka to o la an ka Kerecɛn cidenyabaara la?
2 Dɔnniya bɛ dɔ fara timinandiya kan: Yesu kɛlen kɔ k’a yɛrɛ jira a ka kalanden fila la, fɛn minnu sɛbɛnnen bɛ a ko la “Kitabuw bɛɛ la, a ye o kɔrɔ jira u la” ka ban minkɛ, a ka kalandenw y’a fɔ ɲɔgɔn ye ko: “A kumana an fɛ sira la ka Kitabuw kɔrɔw jira an na tuma min na, an dusukun ɲagalilenba tun tɛ wa?” (Luka 24:27, 32) O cogo kelen na, an fana dusukun ɲagalilenba tɛ, ni dɔ farala an ka faamuyali kan Ala ka kuma ko la wa? Tiɲɛ na, dɔnniya bɛ dannaya bonya. Romɛkaw 10:17 b’a ɲɛfɔ ko: “Dannaya bɛ sɔrɔ lamɛnni fɛ.” Ni an dalen bɛ Jehowa ka layiduw la, wa, ni o y’an dusukunw fa, an fana ye ko minnu kalan, ka u dɔn, an tɛ se ka olu fɔli dabila!—Zab. 145:7; Kɛw. 4:20.
3 Nka, an ye dɔnniya min sɔrɔ an ka kalan tɛmɛnen fɛ, an tɛ se k’an jigi da o dɔrɔn kan, walisa an ka kanuya bonyalen ka se ka to Ala fan fɛ, ani walisa an timinandiyalen ka to a ka baara la. An ka kan ka taa a fɛ ka dɔ fara an ka faamuyali kan tiɲɛ ko la, ani ka an ka kanuya bonya Jehowa fan fɛ. Ni an ma o kɛ, an bɛ baara min kɛ Ala ye, dɔ bɛ se ka bɔ o la dɔɔnin-dɔɔnin, ka kɛ fɛn gansan dɔ ye an bolo. (Jir. 2:4) Ala ka Kuma bɛ dusu don an kɔnɔ ka “taa ɲɛ Ala dɔnniya la.”—Kol. 1:9, 10.
4 An delinako kalan ta fan fɛ: A ka ɲi an ka an delinako sɛgɛsɛgɛ kalan ta fan fɛ. Misali la, an bɛ se ka tiiri ci jaabiw kɔrɔ barokun kɔnɔ min bɛ La Tour de Garde kalan kan, ani ka ɲɛfɔli ɲumanw kɛ. Nka, Bibulu tɛmɛsira minnu kofɔlen bɛ, yala an bɛ olu lajɛ wa? An bɛ se ka barokun sirataama cogo min na an ka ɲɛnamaya kɔnɔ, yala an bɛ miiri o la fana wa? Ka kɛnyɛ ni an ka kow ye, yala an b’an cɛsiri ka ɲinini wɛrɛw kɛ dɔgɔkun Bibulu kalan kan wa? Kalan minnu bɛ sɔrɔ o kɔnɔ, yala an bɛ miiri o fana la wa? (Zab. 77:12, 13; Nt. 2:1-5) Ka i hakili jakabɔ Ala ka Kuma kan, ani ka i sɛbɛ bɛɛ don o la, o nafa ka bon kosɛbɛ dɛ! (1 Tim. 4:15, 16) Ka kalan kɛ ni i sɛbɛ ye o cogo sugu la, o b’an dusukun balo, ka dusu don an kɔnɔ walisa an ka an ‘ jija kɛwale ɲumanw bɛɛ kɛli la. ’—Tite 2:14.