An ka mɔgɔ majiginnenw kalan walisa u ka taama Ala ka sira kan
1 San kɛmɛ fɔlɔ la, a fɔra Krista ka kalandenw ma, k’u ye “sira” mɔgɔw ye. (Kɛw. 9:2) Kerecɛnya lakika nɔ ka kan ka ye mɔgɔ ka ɲɛnamaya kɛcogo kuru bɛɛ la. (Nt. 3:5, 6) O la sa, ni an bɛ Bibulu-kalanw ɲɛminɛ, an man kan ka dan dɔrɔn Bibulu dɔnniya jɔnjɔn laseli la mɔgɔw ma. An ka kan fana ka Bibulu-kalandenw dɛmɛ u ka taama Jehowa ka sira kan.—Zab. 25:8, 9.
2 Kalandenw dɛmɛ u ka Jehowa kanu ani u ka Yesu kanu: Tiɲɛ na, ko gɛlɛn don mɔgɔ dafabali bolo ka se k’a miiricogo, a hakilinata, a kumacogo ni a taamacogo kɛ ka bɛn Ala sago ma. (Rom. 7:21-23; Efe. 4:22-24) O bɛɛ n’a ta, Jehowa ni Yesu kanuya bɛ mɔgɔ majiginnenw bila u ka o ko gɛlɛn kɛ. (Yuh. 14:15; 1 Yuh. 5:3) An bɛ se ka an ka Bibulu-kalandenw dɛmɛ cogo di u ka se ka o kanuya bonya u dusukun na?
3 I ka Bibulu-kalanden dɛmɛ a k’a dɔn Jehowa ye jɔni ye. An balimakɛ dɔ y’a fɔ ko “i tɛ mɔgɔ min dɔn, i tɛ se k’o tigi kanu. O la sa, kabini kalan daminɛ na, ne bɛ Ala tɔgɔ jira u la Bibulu kɔnɔ, wa, ne bɛ cogow ɲini walisa ka n sinsin kosɛbɛ Jehowa mankutuw kan.” Ni i bɛ i sinsin Yesu ka misali kan, o ye cogo ɲuman dɔ de ye min bɛ u dɛmɛ ka Jehowa dɔn. (Yuh. 1:14; 14:9) Ka fara o kan, baara kɛ ni yɔrɔ kolilen ye min bɛ Qu’enseigne la Bible ? kalansen kelen-kelen bɛɛ laban na, walisa ka kalanden dɛmɛ a ka miiri Ala ka dakabanajogow ni a Denkɛ taw la.
4 An k’u kalan an kɛcogo ɲuman fɛ: Ikomi an bɛ mɔgɔw kalan, k’u ɲɛminɛ, an ka walew fɛ, an b’a jira u la, a kɔrɔ ye min ye ka taama Ala ka sira kan. (1 Kɔr. 11:1) Misali la, ka gɛrɛ dunanw na walisa k’i ka dannakow fɔ u ye, o tɛ Bibulu-kalanden fanba deliko ye. O la sa, an mago bɛ muɲuni na, ani k’a dɔn koɲuman, an bɛ se k’u dɛmɛ cogo min na walisa u k’u ka kanuya ni u ka dannaya bonya, ani u ka jagɛlɛya sɔrɔ u mago bɛ minnu na, walisa ka se k’u sen don waajuli ani kalandenw kɛli baara la. (2 Kɔr. 4:13; 1 Tes. 2:2) Ikomi an b’a fɛ ka kɛ karamɔgɔw ɲuman ye, o kosɔn, an b’an ka kalandenw bilasira ani k’u dɛmɛ, siɲɛ fɔlɔ min na u bɛna u sen don Kerecɛn cidenyabaara la.
5 Aw kɛcogo ɲuman bɛ se ka kalandenw dɛmɛ u ka Kerecɛn ka ɲɛnamaya kɛcogo wɛrɛw faamu. Ni aw bɛ taa bɔ banabagatɔw ye, walima ni aw bɛ mɔgɔw fo ni nisɔndiya ye jɛkulu lajɛw la, u bɛ kanuya jiralen ye kɛnɛ kan. (Yuh. 15:12) Ni aw bɛ aw sen don Masaya so saniyali la, walima ni aw bɛ fɛn wɛrɛw kɛ walisa ka tɔw dɛmɛ, aw bɛ ka u kalan mɔgɔ bɛ se ka u mago don cogo min na an mɔgɔɲɔgɔnw na. (Yuh. 13:12-15) Ni u ɲɛ b’a la ko aw bɛ aw ka ɲɛnamaya kɛcogo nɔgɔya aw yɛrɛ bolo, u b’a faamu a kɔrɔ ye min ye ka “Ala ka masaya ni a ka tilennenya ɲini fɔlɔ.”—Mat. 6:33.
6 Ka mɔgɔw kalan Ala ka Kuma na, ani ka mɔgɔw kɛ kalandenw ye, o ye baara ye min tɛ taa cɛsiriba kɔ. Nka, nisɔndiyaba don dɛ ka mɔgɔ majiginnenw ye ka “taama tiɲɛ sira kan!”—3 Yuh. 4.
[Study Questions]
1. Ka mɔgɔw kɛ kalandenw ye, mun ni mun sen bɛ o la?
2. Mun bɛ se ka Bibulu-kalanden bila a ka tugu Ala ka ci fɔlen kɔ?
3. An bɛ se ka kalandenw dɛmɛ cogo di walisa u ka Jehowa kanuya ani Yesu kanuya bonya u dusukun na?
4. (a) Mun na kalanden caman bolo, ko gɛlɛn don ka waajuli kɛ? (b) An ka kalandenw b’u sen don Kerecɛn cidenyabaara la siɲɛ fɔlɔ min na, an bɛ se k’u dɛmɛ cogo jumɛn na?
5. Aw kɛcogo ɲuman bɛ se ka kalandenw dɛmɛ cogo di u k’a faamuya, a kɔrɔ ye min ye ka tugu Ala ka sariyaw kɔ?
6. Ni i ye mɔgɔ majiginnenw dɛmɛ u ka baara kɛ Jehowa ye, o dɛmɛ bɛ na ni mun ye?