An balima minnu bɛ degun na an bɛ olu dɛmɛ cogo di?

Ni kasaara kɛra yɔrɔ min na, an bɛ an labɛn o yɔrɔnin bɛɛ walasa Jehova Seere minnu bɛ yen, ni tiɲɛni donna u kun, ka taa olu dɛmɛ. O cɛsiri bɛ an ka kanuya sɛbɛ de jira ka ɲɛsin an balimaw ma. (Yuhana 13:34, 35; 1 Yuhana 3:17, 18) An b’an ka dɛmɛ kɛ cogo di?

An bɛ wari di. San kɛmɛ fɔlɔ la, Antiose krecɛnw ye wari bila ka taa di Jude jamana balimaw ma, ka d’a kan kɔngɔba tun bɛ olu kan. (Kɛwalew 11:27-30) Bi bi in na fana, tuma dɔw la, an bɛ a mɛn ko yɔrɔ dɔ la Jehova Seere dɔw mago bɛ fɛn dɔw la. O la, an ka jɛkulu sababu fɛ, an bɛ nilifɛn dɔw di u ma walasa ka u dɛmɛ wariko ta fan fɛ.—2 Kɔrɛntekaw 8:13-15.

An bɛ dɛmɛ kɛ kasaara kɛyɔrɔ la. Diinɛ maakɔrɔ minnu bɛ kasaara kɛnɛ kan, olu bɛ a ɲini k’a dɔn ni fɛn ma jɛkulu mɔgɔ si sɔrɔ. Kulu dɔ bɛ sigi dɛmɛ kama, o bɛ dɛmɛ kow ɲɛnabɔ, o dɛmɛ bɛ se ka kɛ dɛmɛ ye kɛnɛya ta fan fɛ, dumuni ko, ji ɲuman sɔrɔli, fini kow walima siyɔrɔ ko ta fan fɛ. Seere caman min bɛ se baara kɛrɛnkɛrɛnnen dɔw la, olu b’a bɔ u yɛrɛ la ka wari bɔ u yɛrɛ kun ka taa o yɔrɔw la walasa ka u sen don dɛmɛ la walima ka mɔgɔw ka sow ni masaya so tiɲɛnenw dilan. Ka d’a kan an faralen bɛ ɲɔgɔn kan ani an delilen don ka baara kɛ ɲɔgɔn fɛ, an bɛ fara ɲɔgɔn kan yɔrɔ ni kelen ni a mago bɛ yen. An bɛ ko ɲuman kɛ “an balima dannabaaw” ye nka ni a bɛ se ka kɛ fana, an bɛ mɔgɔ wɛrɛw dɛmɛ u mana kɛ diinɛ o diinɛ la.—Galasikaw 6:10.

An bɛ mɔgɔw dɛmɛ ni Bibulu ye ani ka dusu tiɲɛnenw dɛmɛ. Kasaara ye mɔgɔ minnu sɔrɔ kɛrɛnkɛrɛnnenyala, olu mago bɛ dusu saalo la. O waatiw kɔnɔna na, an bɛ fanga sɔrɔ ka bɔ Jehova yɔrɔ, o min ye “dusu saaloli bɛɛ tigi Ala ye.” (2 Kɔrɛntekaw 1:3, 4) An kɛtɔ ka Bibulu ka layiduw fɔ o mɔgɔw ye, an bɛ u hakili sigi an kɛtɔ k’a jira u la ko Ala ka masaya bɛna dan bila kasaaraw, dimikow ani tɔɔrɔw la. —Jirali 21:4.

• Mun b’a to ni kasaara kɛra, an bɛ se ka fara ɲɔgɔn kan yɔrɔ ni kelen?

• Kasaara ye mɔgɔ minnu sɔrɔ, an bɛ olu dusu saalo cogo di?