Waati min bɛ aw bolo, aw ka baara kɛ ni hakilitigiya ye o waati kɔnɔ
1 An ŋaniya ye ka an kodiya Jehowa ye. O b’an bila ka an ka ɲɛnamaya sinsin alako baaraw kan. Ala ka Kuma b’an kalan ko an ‘ka Ala ka masaya fɔlɔ ɲini,’ ka ‘ko fisamanw faranfasi ka u dɔn.’ (Mat. 6:33; Fil. 1:10) An bɛ se ka mun kɛ walisa ka waati kunmabɔ Masaya kunkankow kama, ani ko minnu nafa man bon kosɛbɛ, an bɛ se ka mun kɛ walisa ka olu bila Masaya kunkankow kɔ fɛ?—Efɛ. 5:15-17.
2 Masaya baaraw bila jɔyɔrɔ fɔlɔ la: I ka waati boloda cogo la min b’a to ko minnu nafa man bon, i kana i ka waati tiɲɛ olu la. Dɔw bɛ kalo daminɛ ni waati kɛrɛnkɛrɛnnen dɔ bolodali ye foro baara kama, u ka donjatelan kan. O kɔ fɛ, u bɛ ko bɛɛ kɛ walisa fɛn wɛrɛw kana se ka na u ka ko bolodalenw tiɲɛ. An fana bɛ se ka o ɲɔgɔn kɛ, ka waati boloda lajɛw ni yɛrɛkalan ni jamalajɛw kama. Mɔgɔ caman ye u ka waati boloda cogo la min b’a to u bɛ tile daminɛ ani k’a laban ni Bibulu kalan ye. I ka waati kɛrɛnkɛrɛnnen dɔ boloda, k’o bila baara nafaman kelen-kelen bɛɛ kama, wa i kana a to fɛn wɛrɛw ka don o sen kɔrɔ, k’a sɔrɔ kun ɲɛnama tɛ o la.—Ekl. 3:1; 1 Kɔr. 14:40.
3 Dɔ bɔ i ka diɲɛ diyabɔcogo la: Jamana caman na, nin kow sɔrɔ ka di: Farikoloɲɛnajɛkow, tulonkɛkow, mɔgɔ bɛ ko minnu kɛ lafiyawaati kɔnɔ ani o ɲɔgɔnnakow. Mɔgɔ caman bɛ waatiba kɛ telefilɛ la, walima baara kɛli la ni ɔridinatɛri ye. Nka, ni an hakili bɛɛ bɛ ɲɛnajɛkow de la lafiya waatiw kɔnɔ ani masinmafɛn fitinin kura bɔlenw dɔrɔn de la, ni olu de bɛ nin diɲɛ bolo ka di an ma, siga tɛ a la ko o laban bɛna kɛ jigikari ye. (1 Yuh. 2:15-17) O kosɔn, Sɛbɛnniw bɛ dusu don an kɔnɔ ko an kana diɲɛ diyabɔ a ɲɛ bɛɛ ma. (1 Kɔr. 7:31) Ni i bɛ i tulomajɔ o laadilikan hakilima la, i bɛ se k’a jira Jehowa la ko a ka bato de bɛ jɔyɔrɔ fɔlɔ la i ka ɲɛnamaya kɔnɔ.—Mat. 6:19-21.
4 Waati min tora nin diɲɛ in bolo, o bantuma sera. Mɔgɔ minnu bɛ Masaya kunkankow bila jɔyɔrɔ fɔlɔ la, olu bɛna hɛrɛ sɔrɔ, u bɛna Ala ka mandiya fana sɔrɔ. (Nt. 8:32-35; Yak. 1:25) O kosɔn, waati min b’an bolo, an ka baara kɛ ni hakilitigiya ye o waati kɔnɔ, bawo o waati nafa ka bon kosɛbɛ.