Mɔgɔ sugu bɛɛ bɛna kisi
1 Ala ka ɲumanya, o ye ɲumanya ye an man kan ni min ye. O ɲumanya de y’a to kisi sira dayɛlɛla an ye. Jehowa sago don ‘mɔgɔ sugu bɛɛ ka kisi, ka se ka tiɲɛ dɔnniya jɔnjɔn sɔrɔ.’ (1 Tim. 2:3, 4) An bɛ tɔgɔ min sɔrɔ Ala ɲɛkɔrɔ, o sirilen tɛ an siya la, o tɛ bɔ jɔyɔrɔ la min b’an bolo diɲɛ kɔnɔ, o tɔgɔ dulonnen tɛ fana an yecogo walima an sekow la, nka o tɔgɔ bɛ bɔ nin de la: An ka dannaya Yesu ka kunmabɔ saraka la. (Yuh 3:16, 36) An ye Ala baarakɛɲɔgɔnw ye, o kosɔn an ka kan ka mɔgɔlawoloma sugu bɛɛ bɔ an dusukun na. Ni an ma o kɛ mɔgɔlawoloma bɛ se k’an bila an ka an ban mɔgɔw la, Jehowa b’a fɛ ka sɔn minnu na.
2 An kana mɔgɔw kiiri tigɛ: Jehowa b’a lajɛ i ye mɔgɔ sugu min ye kɔnɔna na. A tɛ o kɛ juguya kama, walima a tɛ o kɛ ni ɲɛnawoloma ye. (1 Sa. 16:7) Mɔgɔ bɛ se ka kɛ min ye kɔ fɛ, a ɲɛ bɛ o fana na. O la sa, mɔgɔ minnu b’a fɛ u ko ka diya a ye, Jehowa bɛ olu filɛ iko mɔgɔ kanulenw. (Ag. 2:7) Yala an bɛ mɔgɔw filɛ i na a fɔ Ala bɛ u filɛ cogo min na wa?
3 An bɛ mɔgɔ minnu sɔrɔ an ka cidenyabaara la, u dɔw yecogo bɛ se ka an tɔɔrɔ. A bɛ se ka kɛ ko u ka fini labɛnnen tɛ walima u ka fini bɛnnen tɛ ka kɛnyɛ ni jogoɲumanya sira ye. I b’a sɔrɔ u bonbonsi ladonnen tɛ walima u ye nɛgɛ don u nu walima u dawolo la. So tɛ dɔw bolo. A bɛ se ka kɛ ko dɔw ka jugu an ma. Sanni an k’a miiri ko o mɔgɔ suguw tɛna kɛ abada Jehowa batobagaw ye, an ka kan ka miiri ɲuman ta ka ɲɛsin u ma, bawo ‘an yɛrɛw fana tun ye hakilintanw, kanminɛbaliw ni mɔgɔ lafililenw ye.’ (Tite 3:3) Ni an ye o to an kɔnɔ, o bɛna a to an bɛ teliya ka waajuli kɛ mɔgɔ kelen-kelen bɛɛ ye, hali mɔgɔw ye, a bɛ iko minnu man kan ni a ye, u yecogo fɛ.
4 San kɛmɛ fɔlɔ misaliw: Mɔgɔ minnu tun bɛ filɛ iko u tɛ se ka kɛ cogo si la Jehowa batobagaw ye, Yesu ye waati ta ka o mɔgɔw dɛmɛ. (Luka 8:26-39) Yesu ma jɛn ni kɛwale juguw ye abada, nka a tun b’a dɔn ko mɔgɔ bɛ se ka a yɛrɛ sɔrɔ ɲɛnamaya kɛcogo jugu dɔ la. (Luka 7:37, 38, 44-48) O kosɔn, a y’a jira ko a bɛ mɔgɔw faamu ‘u hinɛ donnen a la, bawo u tun bɛ iko saga minnu ni gɛnbaga tɛ u la.’ (Mar. 6:34) An bɛ se ka a ka misali ladege fo ka se a dan na cogo di?
5 Ciden Paul bonna ni kabakuru ye, a bugɔra, a donna fana kaso la. (Kɛw. 14:19; 16:22, 23) A ye o kojugu minnu sɔrɔ, yala olu kɛra dimi ye a kɔnɔ fo a y’a miiri ko a y’a ka waati tiɲɛ jamana dɔw ani siya kulu dɔw cɛma wa? Ayi. Paul tun b’a dɔn ko mɔgɔ kɔnɔjɛlenw tun bɛ se ka sɔrɔ siya kuluw bɛɛ la, wa, a tun jɔlen bɛ a kan ka o mɔgɔ kɔnɔjɛlenw ye. Mɔgɔ minnu bɛ an ka waajulikɛyɔrɔ la, minnu bɔyɔrɔ ni u ka ko kɛcogo ni an ta tɛ kelen ye, yala an bɛ o mɔgɔw filɛ iko Paul tun bɛ mɔgɔw filɛ cogo min na wa?
6 An ka tɔw kunbɛn ka ɲɛ bi: Ala ka jamakulu kɔnɔmɔgɔ caman nisɔn ka di bawo balimakɛw ni balimamusow ye u kunbɛn ka ɲɛ jɛkulu kɔnɔ, k’a sɔrɔ u ma u minɛ u yecogo dɔrɔn ma. Aleman jamana na, cɛ dɔ nana Masaya So kɔnɔ, a bonbonsi tun ladonnen tɛ, a kunsigi tun ka jan fo a tun bɛ na a kamakun na, fini minnu tun b’a kan na, olu fana tun nɔgɔlen bɛ, wa, cɛ tun tɔgɔ tiɲɛnen don fana. O n’a ta o ta, balimaw y’a kunbɛn koɲuman. O ye cɛ kabakoya fo a seginna ka na lajɛ la o dɔgɔkun kɔ fɛ. A ma mɛn cɛ ye a yecogo labɛn, ka sigarɛti min dabila, a ni muso min tun bɛ ɲɔgɔn fɛ, a ye o furu siri sariya sira kan. A ma mɛn o kɔ fɛ, cɛ, a muso ni u denw jɛra ka kɛ denbaya kelen ye min tun bɛ baara kɛ Jehowa ye.
7 An ka Ala min tɛ mɔgɔ bɔ mɔgɔ la, an ka o ladege, ka bɛɛ wele u ka nafa bɔ Ala ka ɲumanya la, a ye min ɲɛsin an kelen-kelen bɛɛ ma, an man kan ni ɲumanya min ye.
[Study Questions]
1. Tɔgɔ min b’an na Ala ɲɛkɔrɔ, o bɛ bɔ mun de la?
2, 3. Mun bɛ se k’an dɛmɛ an kana mɔgɔw kiiri u yecogo fɛ?
4, 5.
An bɛ mun kalan Yesu ni Paul ka misaliw la?
6. Mɔgɔ kura minnu bɛ na jɛkulu ka lajɛw la, an bɛ olu kunbɛn cogo min na, o bɛ se ka mun kɛ u la?
7. An ka Ala min tɛ mɔgɔ bɔ mɔgɔ la, an bɛ se k’o ladege cogo jumɛn na?
[Blurb on page 3]
‘Ala tɛ mɔgɔ bɔ mɔgɔ la. Nka siya o siya la, mɔgɔ min bɛ siran a ɲɛ, ka tilennenya kɛ, o tigi de ko ka di a ye.’—Kɛw. 10:34, 35.