Tila 5: Ka Bibulu-kalanw ɲɛminɛ minnu bɛ taa ɲɛ

Bibulukalan kelen-kelen bɛ kɛ ka dan yɔrɔ min na, o latigɛ cogo

¹ Ni Yesu b’a ka kalandenw kalan, a tun b’a to a hakili la ko dan bɛ u ka faamuyali la. A tun bɛ kuma n’u ye “ka kɛnyɛ ni u ka faamuyali dan yɔrɔ ye.” (Mar. 4:​33; Yuh. 16:12) O cogo kelen na, mɔgɔ min bɛ mɔgɔ wɛrɛ kalan Ala ka Kuma na bi, o ka kan k’a ɲini ka a dɔn, ale ni kalanden bɛna se ka yɔrɔ hakɛ min kalan u ka Bibulu-kalan waati labilalen kɔnɔ. Aw bɛna yɔrɔ hakɛ min kalan, o bɛ bɔ kalanden ani karamɔgɔ fila bɛɛ ka seko ni u cogoyaw la.

² U dɛmɛ u ka limaniya ka kɔgɔ: Kalanden tɔw bɛ se ka fɛn dɔ faamu teliya la Bibulu-kalan kelen kɔnɔ, k’a sɔrɔ dɔw mago bɛ Bibulu-kalan fila walima saba la walisa ka o fɛn kelen faamu. An man kan ka kalanden ka faamuyali ɲuman saraka kalan teliya nɔfɛ. Kalanden kelen-kelen bɛɛ mago b’a la ka u ka limaniya kura jujɔn ɲuman sɔrɔ Ala ka Kuma kɔnɔ.​—Nt. 4:7; Rom. 12:2.

³ N’i bɛ kalan ɲɛminɛ dɔgɔkun o dɔgɔkun, waati min ka kan ka ta, o ta walisa ka kalanden dɛmɛ a ka faamuyali sɔrɔ ani a ka sɔn fɛn kalannenw na minnu bɔra Ala ka kuma kɔnɔ. I kana a ɲini ka kalan teliya ka kɛ, fo kalanden tɛ nafa bɛɛ sɔrɔ ka bɔ a ka tiɲɛkuma kalannenw na. Waati caman ta i ka i sinsin yɔrɔ kolomaw kan, ka Bibulu tɛmɛsira kolomaw lajɛ, kalan sinsinnen bɛ o minnu kan.​—2 Tim. 3:​16, 17.

⁴ I kana kalan jɛgɛn: K’a sɔrɔ an bɛ ka an yɛrɛ tanga kalan teliya-ka-kɛ ma, an bɛ an yɛrɛ tanga fana ka kalan jɛgɛn. Ni kalanden bɛ baro caman kɛ a yɛrɛ kunkow kan kalan waati, an bɛ se ka fɛɛrɛ tigɛ walisa ka kuma o kan kalan kɔfɛ.​—Ekl. 3:1.

⁵ Fan wɛrɛ fɛ, tiɲɛ nisɔndiya min bɛ an yɛrɛ la, o kosɔn, a bɛ se ka gɛlɛya an bolo ka an yɛrɛ minɛ kuma caman fɔli la kalan waati. (Zab. 145:​6, 7) Waati dɔw la, an bɛ se ka yɔrɔ dɔ walawala walima ka ko kɛlen dɔ lakali, o bɛ se ka kalan sankɔrɔta, nka an man kan ka o kɛ ka caya walima ka o kɛ baro janw ye, minnu bɛ se ka kalanden bali ka Bibulu kalansira kolomaw dɔnniya sɛbɛ sɔrɔ.

⁶ Kalan bɛ kɛ waati o waati, ni an tɛ yɔrɔ kalanta hakɛ damatɛmɛ, an bɛ kalanden dɛmɛ o cogo la a ka “taama Jehowa ka yeelen na.”​—Esa. 2:5.