“An balolen bɛ ni limaniya kumakanw ye”
1 Ka ɲɛnamaya kɛ Alaɲɛsiran kɔnɔ, o tɛ taa cɛsiriba kɔ. (1 Tim. 4:7-10) Ni an y’a ɲini ka taama ni an yɛrɛ ka barika ye, a tɛna mɛn an bɛ sɛgɛn ani an bɛna talon. (Esa. 40:29-31) An bɛ se ka barika sɔrɔ ka bɔ Jehowa yɔrɔ sira kelen fɛ. O ye ni an ‘bɛ balo ni limaniya kumakanw ye.’—1 Tim. 4:6.
2 Hakilila-dumuni camanba: Jehowa bɛ hakilila-dumuni camanba di an ma, a ka kuma ani Jɔnkɛ dannamɔgɔ hakilima sababuw la. (Mat. 24:45) Yala an bɛ ka an niyɔrɔ kɛ walisa an ka nafa sɔrɔ a la wa? Yala an bɛ Bibulu kalan don o don wa? Yala an ye waati labila yɛrɛkalan ani hakilijakabɔ kama wa? (Zab. 1:2, 3) O hakilila-dumuni saniyalen suguya bɛ barika don an na ani a bɛ an tanga Sitanɛ ka mɔgɔ-barika-ban diɲɛ in ma. (1 Yuh. 5:19) Ni an ye an hakili fa ni fɛn saniyalenw ye, ka an ka ɲɛnamaya kɛ ka kɛnyɛ ni u ye, Jehowa bɛ kɛ ni an ye.—Fil. 4:8, 9.
3 Jehowa bɛ barika don an na jɛkulu ka lajɛw sababu la. (Heb. 10:24, 25) An bɛ Alako kalan ani jɛɲɔgɔnya saniyalen minnu sɔrɔ o lajɛw la, o bɛ fanga don an na walisa an ka se ka jɔ ni gɛlɛyaw ye. (1 Pi. 5:9, 10) Kerecɛn sungurunin dɔ y’a fɔ ko: “Ne bɛ taa lakɔli la tile kuuru bɛɛ, wa o bɛ ne sɛgɛn. Nka jɛkulu ka lajɛw bɛ iko jimayɔrɔ min bɛ kɛnɛwalawala kɔnɔ. O bɛ ne barika kuraya walisa ne ka se ka don nataw kun. Siga t’a la, an bɛ cɛsiri min kɛ ka na lajɛw la, an bɛ duba sɔrɔ o la!
4 An ka Tiɲɛ weleweleda: Waajulikɛ tun bɛ Yesu bolo iko dumuni. O tun bɛ barika don a la. (Yuh. 4:32-34) O cogo kelen na, ni an bɛ Ala ka dakabana layidu talenw kofɔ mɔgɔ ye, o bɛ an barika kuraya. Ni an bɛ an sen don cidenyabaara la tuma bɛɛ, o bɛ an hakili ani an dusukun ɲɛsin Masaya ma ani dugawu ma minnu natɔ don sɔɔni. Sɛbɛ la o bɛ an barika kuraya.—Mat. 11:28-30.
5 Siga t’a la ko Jehowa bɛ ka hakilila–dumuni camanba min di a ka jamakulu ma bi, o ye bonyaba ye an bolo! An ka taa a fɛ ka a tanu ni nisɔndiya-kulokan ye.—Esa. 65:13, 14.