Taga a fɛ ka mɔgɔw wele ni timinandiya ye u ka ‘taama ni Ala ye’

¹ Jamalajɛ minnu tɔgɔ ye ko ‘Aw ye taama ni Ala ye’, olu daminɛra kalo in na. A ɲininen bɛ an bɛɛ fɛ an ka taama tuma bɛɛ ni kantigiya ye an sankolola Fa ɲɛkɔrɔ. O siratigɛ kelen in na, 2004 san baara dantigɛli sɛbɛn laban bɛ dusu don mɔgɔ kɔnɔ k’a masɔrɔ a bɛ a jira ko baara caman bɛ yen ka kɛ san 2005 natɔla in kɔnɔ.

² Foro baara kɛrɛnkɛrɛnnen min kɛra Hakilijigin waati la, o y’a kɛ mɔgɔ caman farala baarakɛlaw kan lakɔlibilawaati la. A yera ko kamalennin ani sungurunnin caman kɛlen tutigɛbaga farankanw ye, ka tutigɛbagaya baara nɛnɛ minkɛ, u ye a bɔ u yɛrɛ la ka tɛmɛ ni o baara ye lakɔli bilalen kɔ. Yala Senegali jamana na, i tun bɛ tutigɛbaga farankanw 140 cɛ la Awirilikalo la wa? Aw mɔgɔ caman donna o baara suguya la ko kura Zuluyekalo la. Min bɛ o jira, o ye ko mɔgɔ 41 kɛra tutigɛbaga farankan ye Senegali o kalo la. Mɔgɔ tɔw ye a ɲini ka taa ɲɛ walisa u ka se ka dɔ fara u ka cidenyabaara kan: a yera ko k’a ta Marisikalo la ka na a bila Sɛtanburukalo la, tutigɛbaga basigilen kura 12 tɔgɔw sɛbɛnna jamana saba la, Senegali Tɔn bolofara bɛ minnu kɔlɔsi. Yala aw ye jateminɛ kɛ ko ni aw ye waati caman labila walisa ka mɔgɔ tɔw dɛmɛ ka Jehowa sagonata kabakoma dɔn, o bɛ a to Jehowa ka dɔ fara a ka baara kɛli la ni aw ye wa (Esayi 6:⁠8)?

³ Masaya weleweledalaw minnu ma se ka tutigɛbagaya baara kɛ, olu fana ye nisɔndiya sɔrɔ u kɛlen ka dɔ fara u ka baara kan lakɔli bilalen kɔ. Misali la, Mali jamana na, Bibulu-kalanden hakɛ min tun bɛ weleweledala kelen-kelen bɛɛ bolo, dɔ farala o hakɛ kan ka taa a fɛ. A bɔra Bibulu-kalanden 1.1 na Awirilikalo la, k’a kɛ 1.4 ye Zuluyekalo la. O ye Bibulu-kalanden hakɛ bɛɛ la belebeleba ye kabini san 2003 Zanwuyekalo la. An bɛ a ɲini hali bi Jehowa fɛ a ka mɔgɔw dusukunw dayɛlɛ, mɔgɔ minnu bɔlen bɛ sagaw fɛ, walisa u ka a tɔgɔ tanu ni weleweledala 200 ni kɔ ye Mali la (Kɛwalew 16:⁠14)!

⁴ Jamana naani minnu ka waajuli dantigɛli bɛ kɛ An ka Masaya Cidenyabaara sɛbɛn kɔnɔ, olu kelen-kelen ka weleweledalaw cayala ka se hakɛ kura ma salon baara la. O bɛ a jira ko Jehowa bɛ ka duba a ka jamakulu ka timinandiya-baara ye. Mɔgɔ caman ye jɛɲɔgɔnyabaara kɛ ni gafe-kalan lakɔlɔsibagaw ye u kɛlen ka u ka dantigɛli sɛbɛn di kalo o kalo a tuma na. U ni foli ka kan. Sɔsɔli tɛ min na fana, o ye ko jɛkulu sagagɛnnaw ye baara caman kɛ walisa ka weleweledalaw dɛmɛ u ka tuma-bɛɛ-cɛsiri la ka na foro baara la (1 Piɛrɛ 5:​2,3).

⁵ Jehowa ka Masaya kibaru duman weleweledali cikan min dira an ma, an ka taa a fɛ ka o matarafa. An dalen ka to a la ko Jehowa bɛna duba an ka cɛsiriw ye, an bɛ ka cɛsiri minnu kɛ ka mɔgɔ wɛrɛw dɛmɛ u ka ‘taama ni Ala ye’ ani u ka ɲagali ni ɲɛnamaya banbali jigiya kabakoma ye, o min bɛna kɛ Jehowa ka ko-sigicogo kura hɛrɛma kɔnɔ. (Esayi 30:21)!