An ka Jehowa ka tilennenya ladege
1 ‘Tilennenya ko ka di Jehowa ye.’ (Zab. 37:28) O la sa, hali ni a y’a latigɛ ka nin diɲɛ tilenbali in halaki, a ye fɛɛrɛ tigɛ walisa lasɔmikan ka lase fɔlɔ. (Mar. 13:10) O bɛ cogo di mɔgɔw ma u ka nimisa u ka jurumuw na ka se ka kisi. (2 Pi. 3:9) Yala an b’an jija ka Jehowa ka tilennenya ladege wa? Yala hadamadenw ka ɲɛni ni u ka tɔɔrɔ b’an bila an k’a fɔ mɔgɔw ye Masaya bɛ jigiya min di u ma wa? (Nt. 3:27) Ni tilennenya ko ka di an ye, o bɛna an bila ka an sen don waajuli baara la ni kisɛya ye.
2 Waajuli kɛ k’a sɔrɔ i ma mɔgɔ bɔ mɔgɔ la: Ni an bɛ Ala kuntilenna fɔ mɔgɔ kelen-kelen bɛɛ ye, k’a sɔrɔ an ma mɔgɔ bɔ mɔgɔ la, an bɛ ‘tilennenya de sirataama.’ (Mi. 6:8) Hadamaden dafabali ka teli ka mɔgɔ minɛ u yecogo dɔrɔn fɛ. An ka kan ka ban o ma. (Yak. 2:1-4, 9) Jehowa “b’a fɛ mɔgɔ bɛɛ ka kisi ka se ka tiɲɛ dɔn.” (1 Tim. 2:4) Ala ka tiɲɛkuma bɛ se ka kɛ sababu ye ka yɛlɛmabaw don mɔgɔw ka ɲɛnamaya kɔnɔ. (Heb. 4:12) N’an ye o faamu, o bɛ se k’an bila ka kuma mɔgɔw fɛ k’a sɔrɔ an ma siga u la, hali minnu tun ma sɔn k’an lamɛn fɔlɔ la.
3 An balimamuso dɔ tun bɛ baara kɛ butiki dɔ kɔnɔ. U ka sannikɛla dɔ yecogo tun bɛ a siran dɔɔnin. Nka, waati bɛnnen dɔ la, a y’a ɲini ka seereya kɛ a ye. A kumana Ala ka layidu kan ka ɲɛsin alijinɛ ma. Cɛ sinna k’a jaabi cogo gɛlen na ko a dalen tɛ nkalon-maanaw na, wa ko ale ye hipi ni dɔrɔgutala ye. Nka an balimamuso tagara a fɛ ka seereya kɛ a ye. Don dɔ la, cɛ ye a ɲininka a bɛ mun miiri a kunsigijan ko la. An balimamuso y’a jaabi ni bonya ye, k’a jira a la Bibulu bɛ min fɔ o ko kan. (1 Kɔr. 11:14) O dugusajɛ, a balala an balimamuso la, wa a diyara a ye fana ka cɛ ye a kunsigi tigɛlen ani a bonbonsi dilen koɲuman. Cɛ y’a ɲini Bibulu kalan ka kɛ a kun. Balimakɛ dɔ nisɔndiyara ka o kalan ɲɛminɛ. Cɛ taara ɲɛ kalan na, ka a yɛrɛbakun di Jehowa ma, ka batise. Jehowa ka bi baarakɛla caman fana bɛ u balimaw waleɲumandɔn, u balima minnu ye timandiya cɛsiriw kɛ walisa ka Masaya cikan lase u ma, k’a sɔrɔ u ma mɔgɔ bɔ mɔgɔ la.
4 Yan ni dɔɔnin cɛ, Jehowa bɛna tilenbaliya bɔ dugukolo yɔrɔ bɛɛ la. (2 Pi. 3:10, 13) Waati min tora, o dansigilen don. O la sa, an ka Jehowa ladege an kɛtɔ ka bɛɛ dɛmɛ u ka se ka kisicogo sɔrɔ Sitanɛ ka diɲɛ tilenbali halakituma na, o min setɔ don.—1 Yuh. 2:17.