An ka an ka fɛn bɛɛ la fisaman di Jehowa ma
1 Jehowa tun ye Sariya min di Isirayɛli ma, a tun pereperelatigɛra ka jɛya o kɔnɔ ko bagan minnu tun bɛ kɛ sarakaw ye, olu tun ka kan ka kɛ bagan “fiɲɛntanw ye.” Fiɲɛ tun bɛ bagan min na, a tun dagalen tɛ cogo si la o ka kɛ saraka ye. (Lev. 22:18-20; Mal. 1:6-9) Ka fara o kan, saraka bɔtuma yɛrɛ la, kɛn bɛɛ, n’o ye yɔrɔ bɛɛ la fisaman ye, o tun ye Jehowa de ta ye. (Lev. 3:14-16) Ikomi Jehowa tun ye Isirayɛli Fa ni Isirayɛli Makɛba ye, a tun ka kan ni fɛn bɛɛ la fisaman ye.
2 An bɛ fɛn minnu di Ala ma bi, Jehowa b’a mago don kosɛbɛ olu cogo la, k’a lajɛ ni u ka ɲi, walima ni u man ɲi, iko a tun b’a kɛ cogo min na fɔlɔfɔlɔ. An bɛ baara min kɛ, o ka kan k’a jira ko Jehowa ni bonya sugu min ka kan, ko an bɛ o de da a kan. Tiɲɛ don, an si tɛ cogoya kelen na. O n’a ta o ta, kun sɛbɛ b’an bolo ka an yɛrɛ sɛgɛsɛgɛ kosɛbɛ walisa k’a dɔn tigitigi ko an bɛ min di Jehowa ma, o ye an ka fɛn bɛɛ la fisaman ye.—Efɛ. 5:10.
3 An ka baara kɛ ni an dusukun bɛɛ ye: Walisa an ka cidenyabaara ka kɛ fɛn ye min bɛ bonya da Jehowa kan, ka don an lamɛnbagaw dusukun na, a tɛ se ka kɛ baara ye an bɛ min kɛ an yɛrɛma ten k’a sɔrɔ an ma an dusukun don o la. An bɛ fɛn minnu fɔ Jehowa ni a kuntilennabaw ko la, olu ka kan ka bɔ an dusukun na, an dusukun min fara waleɲumandɔn na ka ɲɛsin Jehowa ma. (Zab. 145:7) O b’a jira ko a nafa ka bon an ka waati boloda walisa ka Bibulu kalan, ka a fɛsɛfɛsɛ, ka tugu o la.—Nt. 15:28.
4 Jehowa bɛ mɔgɔw kanu. O la sa, ka an ka fɛn bɛɛ la fisaman di Jehowa ma, o kɔrɔ ye fana k’a ladege, ka mɔgɔw kanu. (Efɛ. 5:1, 2) Ni an bɛ mɔgɔw kanu, an bɛ se ka u fɛn o fɛn lasɔrɔ, walisa ka tiɲɛ kuma lase u ma, tiɲɛ kuma min bɛ se ka ɲɛnamaya di u ma, kanuya b’an bila an k’an jija ka o mɔgɔw bɛɛ lasɔrɔ. (Mar. 6:34) An bɛ kuma mɔgɔ minnu fɛ, kanuya b’an bila an ka an mago don u kelen-kelen bɛɛ la, k’an bila an ka to ka miiri u la an ka bɔnyeli fɔlɔ kɔfɛ, k’an bila fana an ka segin ka na bɔ u ye. O kanuya kelen b’an wajibiya an ka an seko bɛɛ kɛ walisa k’u dɛmɛ u ka taa ɲɛ Ala sira la.—Kɛw. 20:24; 26:28, 29.
5 “Tanuli saraka”: An bɛ se ka an ka fɛn bɛɛ la fisaman di Jehowa ma cogo wɛrɛ min fɛ fana, o ye ka an timinandiya cidenyabaara la. Ni an ka kow bɛɛ labɛnnen bɛ ka ɲɛ, ni an bɛ an ka cɛsiriw bɛɛ ɲɛsin cidenyabaara ma, an bɛ se ka baara ɲumanba kɛ waati kɔnɔna na min b’an bolo. (1 Tim. 4:10) Ni an bɛ an labɛn koɲuman, o b’a to an bɛ se ka kuma cogo jɛlen na min b’a jira ko an bɛ kuma minnu fɔ, ko an dalen bɛ olu la tigitigi. O la sa, mɔgɔw bɛ teliya cogo min na ka sɔn cikan ma, caman bɛna fara o teliya kan. (Nt. 16:21) N’an bɛ ka kibaru duman fɔ mɔgɔ wɛrɛw ye, an bɛ kuma minnu fɔ ni kɔnɔnajɛya ye, a bɛnnen don a ka fɔ olu ma ko “tanuli saraka.”—Heb. 13:15.