Baara min kɔkɔrɔdonnen bɛ Ala fɛ
1 Ala ka baarakɛlaw cɛ ma bi, mɔgɔw ka dɔgɔ minnu ye kalanbaw kɛ, minnu ye nafolobatigiw walima jɔyɔrɔbatigiw ye nin diɲɛ in kɔnɔ. O de y’a to mɔgɔw bɛ ban an ka cidenyabaara la. U bɛ a lagosi. (Esa. 53:3) Nka, an bɛ baara min kɛ, n’o ye ka Bibulu dɔnniya lase mɔgɔw ma, o baara ye dususaalo ni jigiya di mɔgɔ miliyɔn caman ma diɲɛ yɔrɔ bɛɛ la. Mɔgɔ gansanw dun sera cogo di ka nin nɔ ɲɛnama bɔ o baara la? U sera k’o kɛ bawo Ala kelenpe de ye u kɔkɔrɔdon. (Mat. 28:19, 20; Kɛw. 1:8) Paul ko: ‘Diɲɛ bɛ fɛn minnu jate barikantanw ye, Ala ye olu ɲɛnatɔmɔ walisa ka barikamaw lamaloya.’—1 Kɔr. 1:26-29.
2 Cidenw ani san kɛmɛ fɔlɔ Kerecɛn fanbaw tun ye ‘mɔgɔ gansanw ye minnu ma kalanbaw kɛ.’ (Kɛw. 4:13) Nka, u ye u ka ci kɛ ni jagɛlɛya ye ka taga a fɛ, n’o tun ye kibaru duman weleweledali ye. Jehowa dubara u ka cɛsiriw ye. K’a sɔrɔ balilankow tun bɛ yen, ko mɔgɔw tun bɛ ka u kɛlɛ, o n’a ta o ta ‘Jehowa ka kuma tun bɛ ka taa ɲɛ ka taga a fɛ, ka se sɔrɔ sebagaya la.’ Fɛn fosi tun tɛ se ka baara lajɔ bawo a tun kɔkɔrɔdonnen bɛ Ala fɛ. (Kɛw. 5:38, 39; 19:20) A bɛ ten fana an ka waati la. Fangatigibaw jɔra a kan cogo o cogo ka an kɛlɛ, o bɛɛ n’a ta, u ma se ka kibaru duman bali a ka se sɔrɔ, ka taa ɲɛ.—Esa. 54:17.
3 O bonya bɛɛ ye Ala de ta ye: Hali ni bonya kɛrɛnkɛrɛnnen b’an bolo ka kɛ Ala ka cidenyabaarakɛlaw ye, yali o bɛ an wasokun bɔ wa? Cogo si la. Paul kɛtɔ ka kuma Kerecɛn ka cidenyabaara ko la, a y’a sɛbɛn ko: “O nafoloba bɛ an fɛ bɔgɔminɛnw kɔnɔ, k’a jira ko o sebagaya dama dɔnbali ye Ala ta ye, an ta tɛ.” (2 Kɔr. 4:7) Paul tun b’a dɔn ko a tun bɛ se ka a ka cidenyabaara kɛ Ala kelenpe dɔrɔn de barika la, bawo ale de bɛ fanga di a ma.—Efɛ. 6:19, 20; Fil. 4:13.
4 O cogo kelen na, an fana b’a dɔn ko ni waajuli baara bɛ ka kɛ bi, o sababu ye dɔrɔn ko an ye ‘Ala ka dɛmɛ de sɔrɔ.’ (Kɛw. 26:22) O weleweledali min bɛ ka kɛ diɲɛ bɛɛ kɔnɔ, o fana sababu fɛ, Jehowa bɛ ka an kɛ baarakɛminɛn ye, dakabana cogo la, walisa ka siyaw yuguyugu. O ko b’a jira ko halakili dɔ bɛna kɛ sɔɔnin tuma min Ala bɛna kiiri tigɛ. (Ag. 2:7) Aw y’a dɔn ko bonya de dara an kan nin ye dɛ, ko ‘anw ni Ala ye baarakɛɲɔgɔnw ye’ nin sumantigɛba la Alako ta fan fɛ!—1 Kɔr. 3:6-9.