Ala-ka-marako Cidenyabaara Kalanso Dalafɔ-seginnkanni

Ɲininkali ninnu jaabiw bɛna kɛ dalafɔ ye Ala-ka-Marako Cidenyabaara kalanso ka lajɛ la, o min bɛna kɛ Feburuyekalo tile 23nan dɔgɔkun kɔnɔna na, san 2004. Kalan lakɔlɔsibaga bɛna seginnkanni ɲɛminɛ sanga 30 kɔnɔ. O seginnkanni bɛna sinsin kalanw kan minnu kɛra k’a ta Zanwuyekalo tile 5nan na ka na a bila Feburuyekalo tile 23nan na, san 2004. [Kɔlɔsili: Ni ɲininkali dɔ kɔfɛ, sinsin yɔrɔ ma fɔ, i ka kan o la, ka i yɛrɛ ka ɲinini kɛ walisa ka jaabiw sɔrɔ.​—École du Ministère mafilɛ ɲ. 36-7.]

JƐMU KƐCOGO ƝUMANW

1. An bɛ se ka mun kɛ walisa an ka jɛmu nafa ka ye kɛnɛ kan ani a ka an lamɛnbagaw nafa sɛbɛ la? [be ɲ. 158 d. 1-3] 1) An bɛ se ka jɛmu kɔnɔ fɛnw jira cogoya la, min b’a to mɔgɔw b’a faamuya kabini kuma daminɛ la, ko u nafa b’a la ka lamɛnni kɛ. 2) Ka kalansiraw waleya cogo ɲuman jira jɛmu sen fɛ, o ka fisa ni jateminɛkan damadɔw fɔli ye jɛmu kuncɛtuma na. 3) Kalansiraw waleya cogo ɲuman ka kan ka dusu don lamɛnbagaw la ka u “bila kanuya ni wale ɲumanw kɛli la.”​—Heb. 10:24.

2. An bɛna kuma minnu fɔ mun na an ka kan ka olu woloma? [be ɲ. 160 d. 1, tiiri filanan kɛlen bɛ ka sɛbɛnni minnu lamini] Se bɛ mɔgɔ dala kumaw la: u bɛ se ka dimi lase mɔgɔ ma, wala ka dusu don mɔgɔ la. (Nt. 12:18, 25) Ikomi an b’a dɔn ko an lamɛnbagaw bɛna min kɛ o bɛ bɔ an kuma cogo de la, o la sa, an ka kan ka miiri k’a dɔn ko an mago bɛ “kuma dumanw” ɲɛnatɔmɔni na.​—Ekl. 12:12.

3. Kuma fɔcogoɲuman tɛ taa min kɔ ni o fɔlen bɛ 1 Kɔrɛntekaw 14:9 kɔnɔ, o ye mun ye, ani an bɛ se ka o sariyakolo waleya cogoya jumɛn na an ka mɔgɔkalanw senfɛ? [be ɲ. 161 d. 1-4] A ka kan ka nɔgɔya an lamɛnbagaw bolo ka se ka an ka jɛmukan faamuya. Daɲɛ minnu faamu ka di, n’u sugandilen bɛ ka ɲɛ ani kumasen minnu ka surun, barika bɛ o bɛɛ la, mɔgɔ ka teli ka olu faamu. Ni an bɛ kuma ni daɲɛ nɔgɔnmanw ye, o b’a jira ko an b’an lamɛnbagaw bonya, wa, min bɛ fɔ, an b’u dɛmɛ o ka to u hakili la.

4. Ka kɛɲɛ ni Matiyu 5:3-12 ani Marka 10:17-21 ye, Yesu ka mɔgɔ kalan fɛɛrɛba jumɛn bɛ yen ni an bɛ se ka o ladege? [be ɲ. 162 d. 4] Yesu ka mɔgɔ kalan cogo tun ka nɔgɔn. An bɛ se ka Karamɔgɔba ladege ka ɲɛfɔli kɛ ni kuma surunw ye. An ka kumaw ka kan ka miirinata de jira, u man kan k’an miirinata kɛ ko dibilen ye. Ni an ma a kɛ kuma-caman-fɔ ye, an na an lamɛnbagaw dɛmɛ u ka se ka dɔnniya lakika sɔrɔ, a ka to u hakili la.

5. An ka waajuli senfɛ walima an ka jaabiw kɔnɔ lajɛw la, mun kosɔn an ka kan ka daɲɛw ɲini minnu bɛ fanga ani mandiya ani jɛya don kuma la? (Mat. 23:37,38) [be ɲ. 163 d. 3–ɲ. 164 d. 1] Ni an bɛ kuma kɛ ni daɲɛw ye minnu bɛ hakilinataw ni kɔrɔmasurun kolomaw lase mɔgɔw ma kɛrɛnkɛrɛnnenya la, an kɛ ka teli o la ka an lamɛnbagaw hakili jɔlen to an ka kuma fɔta kan, an ka jɛmu bɛ kɛ kuma ɲɛnama ye. Daɲɛ minnu sugandilen bɛ koɲuman, olu bɛ mɔgɔ dusukun lasɔrɔ, ka jigiya bange mɔgɔ la, ka dusu don mɔgɔ dusufagalentigiw la, ka Dabaga kanuya bange mɔgɔ la.

KALANSEN FƆLƆ

6. Kalansen kumasenkun kɔrɔ ye mun ye, ani mun na nafa b’a la ka o to i hakili la walisa ka miiriw ɲɛnatɔmɔ ani k’u labɛn? [be ɲ. 39 d. 6–ɲ. 40 d. 1] Kalansen kumasenkun tɛ barokun gansan ye min bɛ kuma ko caman kan. Kumasenkun ye hakilinata koloma de ye wala kuma taabolo kɛrɛnkɛrɛnnen ye, barokun bɛna bɔ min kan. Baro labɛncogo bɛ nɔgɔnya k’a sɔrɔ ɲinɛ ma kɛ baro kɛkun kɔ, ni sɛgɛsɛgɛli kɛra kumasenkun daɲɛ kolomaw kan, ka ɲininiw kɛ Bibulu ɲɛfɔli sɛbɛnw kɔnɔ ka kumasenkun to i hakili la.

7. (a) Ka saniya Alako ta fan fɛ, o kɔrɔ ye mun ye ani mun na an bɛ se k’o jate saniyali bɛɛ la belebeleba ye? Ka saniya alako ta fan fɛ, o ye ka to bato lakika la, ka i fara ka bɔ nkalon diinɛ la, k’a sɔrɔ i ma i sen don a ka ko si la, wala i ma a ni bato lakika kolonso. An ka ɲɛnamaya banbali kow dulonnen bɛ an ka saniyali la alako ta fan fɛ. (2 Kor. 6:17; Jir. 18:4) (b) Cogo jumɛn na kerecɛnw bɛ se ka u yɛrɛ tanga saniyabaliya ma taamacogo ta fan fɛ, o min ka ca diɲɛ kɔnɔ? [w02 1/2 ɲ. 5-6] Saniyabaliya taamacogo ta fan fɛ, o bɛ ye tuma dɔw la an ka ɲɛnajɛkow ani an ka finidontaw sugandi cogo la. Ɲɛnajɛko fɛn o fɛn bɛ taamacogo jira min bɛ Bibulu naamuw kɛlɛ, kerecɛnw ka kan ka u yɛrɛ tanga olu bɛɛ ma. U bɛ u yɛrɛ tanga finiw ma minnu tɛ mɔgɔ sutara. U ka fini doncogo ni u ka fini donta ka kan ka majiginnenya jira.

8. Sariyakolo fɛn o fɛn bɛ Bibulu kɔnɔ, jumɛnw de y’u la belebelew ye? [w02 15/2 ɲ. 5 d. 1, 4, 6] O ye sariyakolow ye minnu bɛ nɔ bila an ni Jehowa cɛsiraw la kɛrɛnkɛrɛnnenya la. Tiɲɛ bakolo minnu bɛ Bibulu kɔnɔ, olu dɔ la kelen ye ko: Jehowa ye Dabaga ye, Ala Se-bɛɛ-tigi, Kɔrɔtalenba don. (Zab. 83:18) O kama, ale ka kan ni jɔyɔrɔba fɔlɔ ye an ka ɲɛnamaya kɔnɔ.​—1 Kɔr. 10:31.

9. Ka se k’i yɛrɛ bila mɔgɔ wɛrɛ nɔ la, o kɔrɔ ye mun ye, ani cogo jumɛn na Yesu ye o jogo jira? [w02 15/4 ɲ. 25 d. 4-5] Ka se k’an bila mɔgɔ wɛrɛ nɔ la, o bɛ an bila ka niyɔrɔ ta mɔgɔ wɛrɛ ka tɔɔrɔ la an dusukun na. Tuma min na Yesu ye cɛ tulo geren dɔ kɛnɛya, min nɛn tun sirilen bɛ, Yesu ye o kɛ a dan na, lala walisa o cɛ kana na degun wala a kana na siran jama la. (Mar. 7:32-35) Muso cɛsalen dɔ tun bɛ tagalen a den kelennin su don minkɛ, o muso dusukasilen tin kɛlen ka Yesu minɛ, se min tun bɛ Yesu ye, a ye baara kɛ ni o se ye ka kɛɲɛ ni Ala sago ye walisa ka kamalennin lakunun. (Luka 7:11-16) Bi, Yesu ye Sarakalasebaga Kuntigi ye, a tennama ‘bɛ hinɛ an ka barikantanya kow la.’​—Heb. 4:15.

10. Ntalew 11:11 bɛ waleya Jehowa ka jamakulu kan cogoya jumɛn na? [w02 15/5 ɲ. 27 d. 1-3] Kerecɛn-jɛkuluw minnu ye dugu bisigiw ye, Jehowa bɛ duba olu ye. O jɛkuluw kɔnɔ, alalandiw bɛ nɔ ɲumanw bila, ka bonya da Jehowa kan. O de y’a to kɔrɔfɔli kumaw ani kɔrɔmatigɛli kumaw minnu bɛ fɔ jɛkuluw ko la, an ka kan ka an tulo tugu olu la; o kumaw tɛ dɔwɛrɛ ɲɛ farafarali kɔ. An ka kan ka an jija ka hɛrɛ ko nɔgɔya an ni ɲɔgɔn cɛ, ka an ka dafalenya mara.

BIBULU KALAN MIN BƐ KƐ DƆGƆKUN O DƆGƆKUN

11. “Ɲɛnamaya jiri” min kofɔlen bɛ Jenɛse 2:9 la, o tun ye mun nɔnabila ye? Jiri in tun ye Ala ka ko jɛlen de ye, min b’a jira ko siga t’a la, Jehowa tun mana mɔgɔ o mɔgɔ yamaruya o k’o jiriden dun, ɲɛnamaya banbali tun na di o tigi ma. O la sa, Hadama ni Hawa kɛlen kɔ ka jurumu kɛ, a kɛra waajibi ye, u ka gɛn ka bɔ Edɛn, ka u bali ka don ko kura nakɔtu kɔnɔ.​—Jen. 3:22-24. [1, it-2 1148 ɲ. 1; w99 15/4 ɲ. 7-8]

12. Mun na Lɔti muso bɔnɛna a ka ɲɛnamaya la? (Jen. 19:26) [w90 15/4 ɲ. 18 d. 10] A ka du ni a bolofɛn minnu tun bɛ Sodɔmɛ, a b’iko olu kanuya barika bonyana a kɔnɔ ka tɛmɛ Ala kanuya kan.​—Luka 17:31, 32.

13. Kiraya daramu min bɛ Jenɛse 24 la jɔni de nɔnabila ye (a) Ibrahima, (b) Isaka, (c) Eliezɛr, Ibrahima ka baaraden, (d) Ɲaamɛ tan ani (e) Rebeka ye? (a) Abraham ye Jehowa nɔnabila ye; (b) Isiaka ye Ala ka Sagaden, Krista Yesu nɔnabila ye; (c) Eliezɛr ye hakili senu nɔnabila ye; (d) Ɲaamɛ tan ye Ala ka Kuma nɔnabila ye, o dafalen, fosi t’a jɛ; (e) Rebɛka ye Sagaden muso nɔnabila ye, muso ka sɛrɛ kɔnɔmɔgɔ minnu hakɛ ye 144 000 ye. [5, w89 1/7 p. 27-8]

14. Yala Yakuba ani Esau ta tun ye u dakan ye Ala fɛ wa? (Jen. 25:23) Jehowa tun bɛ se ka filaninw ka code genetique kalan k’u to u ba kɔnɔ. Siga t’a la, a ye jateminɛ kɛ ka kɛɲɛ n’o ye, a kɛlen ka kɔn ka cɛmanin fila ka ko nataw fɔ. (Zab. 139:16) Nka, fosi t’a jira ko a tun ye u ka sinikokɛtaw sigi sen kan fo badaa-badaa. Fosi t’a jira fana ko a tun kɔnna ka u ka kɛwalew bɛɛ kelen-kelen sɛbɛn. [rs ɲ. 103 d. 3]

15. Cogo jumɛn na Rasɛl kɛra misali ɲuman ye min ye Jehowa ka dugawu sɔrɔ a ka cɛsiriba sababu la? (Jen. 30:​1-8) [w02 1/8 ɲ. 29-​30] Rasɛl ka tiɲɛ tun ko ka gɛlɛn a ma kosɛbɛ. Jehowa ye layidu min ta ko a bɛna duba Yakuba ye, a tun b’o layidu ko kala ma. A kɔrɔmuso Lea, Yakuba muso fɔlɔ tun ye denkɛ naani sɔrɔ, k’a sɔrɔ ale tun ma bange kɛ. (Jen. 29:31-35) Sanni k’a fɔ ko a bɛ a yɛrɛ maɲumankobila, a tagara a fɛ ka Jehowa deli kosɛbɛ ka tila ka fɛɛrɛ ɲɛnamaw tigɛ ka kɛɲɛ ni Ala sago ni a yɛrɛ ka deliliw ye.