Mɔgɔw dɛmɛ ‘minnu labɛnnen bɛ’
1 An bɛɛ kelen kelen labɛnnen bɛ cogoya dɔ la. O labɛncogo diliw bɛ an dusukun kɔnɔ. (Mat.12:35) Bibulu bɛ kuma mɔgɔ kan, min “dusukun labɛnnen bɛ kɛlɛ kama.” (Zab. 55:21) Dɔw labɛnnen bɛ ‘dusu bɔ kama.’ (Nt. 29:22) Nka mɔgɔw bɛ yɛn fana, minnu ‘labɛnnen bɛ ɲɛnamaya banbali kama.’ (Kɛw. 13:48) Bi bi in na, Jehowa bɛ ka o mɔgɔ suguw lajɛ ka na ale yɛrɛ kɔrɔ. (Ag. 2:7) An bɛ se ka olu dɛmɛ cogoya jumɛn na u ka kɛ Jehowa batobagaw ye?
2 Segin-ka-bɔnyew kɛ n’i sɛbɛ bɛɛ ye: Ka miiricogo ɲuman ta ka ɲɛsin segin-ka-bɔnye ma, o nafa ka bon walisa ci min dira an ma ka mɔgɔw kɛ Yesu ka kalandenw ye, an ka se ka o kɛ. (Mat. 28:19,20) An ni mɔgɔ minnu bɛ bɛn, ni u bɛ u ka Alako nege jira, yala an b’an timinandiya k’a ɲini ka dɔ fara o nege kan wa? Mɔgɔ minnu sɔnna ka an ka sɛbɛnw ta, walima minnu y’a jira ko kibaru duman ka di u ye, yala an bɛ segin ka taa bɔ olu bɛɛ ye wa? An bɛ cɛsiri minnu kɛ k’u dɛmɛ, yala an b’an banban o la walisa u ka ɲɛtaa sɔrɔ alako ta fan fɛ wa? Mɔgɔ caman ni bɛ o ko in da fɛ. O la sa, ni an ye mɔgɔ o mɔgɔ sɔrɔ kibaru duman ka di min ye, an wajibiyalen don k’a ɲini k’o tigi dɛmɛ walisa kibaru duman ka diya a ye ka taa a fɛ.
3 Mɔgɔ min y’a jira ko kibaruya duman ka di a ye, ni i ni o ye baro kɛ, sanni i ka ɲinɛ, waati dɔ ta i ka a tigi tɔgɔ ani a ka ladɛrɛsi sɛbɛn. Aw ye baro kɛ ko min kan, ani i ye Bibulu tɛmɛsira o tɛmɛsira kalan, ani i ye sɛbɛn min to a bolo olu bɛɛ sɛbɛn. O kɔfɛ, a ɲini ka segin ka taa bɔ a tigi ye joona-joona.
4 Segin-ka-bɔnye bɛ kɛ cogoya min na: Ni aw bɛ ka segin-ka-bɔnye dɔ kɛ, aw bɛ nɔgɔya sɔrɔ ni aw kɛra mɔgɔ dusumandiw ye, minnu bɛ teriya don ni mɔgɔw ye joona ani ni aw kɛra mɔgɔw ye, minnu bɛ u mago don sɛbɛ la u kumaɲɔgɔn na. Aw ka baro nɔgɔman kɛ, k’a sinsin Bibulu kɔnɔ ko dɔ kan. Bibulu kɔnɔko min bɛ baro diya, o dɔ labɛn. Baro laban na, ɲininkali dɔ lawuli min jaabi bɛna di segin-ka-bɔnye wɛrɛ la. A bɛɛ la ɲuman ye aw kana a ɲini ka ɲɔgɔn sɔsɔ miiriya fɔlen dɔw kan, minnu tɛ Bibulu kɔnɔ miiriyaw ye. K’aw to Bibulu kɔnɔ tiɲɛw kalan kɛli la, aw k’a ɲini ka baro sinsin kow kan aw bɛɛ sɔnnen bɛ ko minnu na.—Kol. 4:6.
5 Segin-ka-bɔnye tɛ taa cɛsiri kɔ, nka sara min b’o la, o bɛ mɔgɔ dusu suma. Zapɔn jamana tutigɛbaga dɔ ye a kuntilenna kɛ segin-ka-bɔnye caman kɛli ye kalo o kalo. A ni mɔgɔ minnu bɛnna so-ni-so waajuli kɛtuma, a tora ka olu tɔgɔ sɛbɛn. Tile wolonwula kɔnɔ, a seginna ka taa bɔ u ye ko kura. A y’a ka kuma fɔtaw sɛbɛkɔrɔ labɛn. A tun dalen bɛ a la ko a bɛ ka kibaru min lase, ko o dafalen don. A ka segin-ka-bɔnye dɔ la, a sera ka kalan daminɛ ni mɔgɔ dɔ ye, min y’a fɔ a ye ko: “Tuma bɛɛ ne tun tɛ sɔn aw ka na bɔ ne ye. Nin ye ne siɲɛ fɔlɔ ye ka aw lamɛn.” Tutigɛbaga ye timinandiya min kɛ ni kanuya ye, o ye nɔw bɔ. Kalo fɔlɔ laban na, forobaara dantigɛli sɛbɛn kɔnɔ a ye Bibulu kalan tan sɛbɛn.
6 Mɔgɔw ka cogoyaw bɛ ka yɛlɛma tuma bɛɛ. (1 Kɔr. 7:31) An bɛ se ka taa-ka-segin caman kɛ mɔgɔ dɔ nɔfɛ, kibaruya duman ka di min ye, sanni an k’a sɔrɔ so kɔnɔ ko kura. Ni an y’an ka segin-ka-bɔnyew kɛ ni an sɛbɛ bɛɛ ye, an bɛ se ka mɔgɔw dɛmɛ minnu dusukun labɛnnen bɛ, walisa u ka ɲɛnamaya banbali sira sɔrɔ.—Mat. 7:13, 14.
[Study Questions]
1. Jehowa bɛ ka jɔni lajɛ ka na a yɛrɛ kɔrɔ bi bi in na?
2. Ka mɔgɔ kɛ kalanden ye, mun sen bɛ o baara kɛli la?
3. An ka kan ka mun kɛ, an kɛlen ka baro kɛ ni mɔgɔ dɔ ye, k’an to an ka cidenyabaara la?
4. An bɛ se cogoya jumɛn na ka segin-ka-bɔnyew kɛ minnu bɛ nɔ bɔ?
5. Tutigɛbaga dɔ ye cɛsiri jumɛn kɛ ani o kɔ kɛra mun ye?
6. Mun na an ka kan ka an timinandiya?