Denmisɛnninw: Aw ka jujɔ ɲuman sigi siniɲɛsigi kama

¹ Fɛn jumɛn bɛ jɔyɔrɔ fɔlɔ la aw hakili la? Aw bɛ miiri mun ko la? Yali aw haminanko fɔlɔw sinsinnen bɛ bi kow de kan wa, walima u sinsinnen bɛ Ala ka layidu talenw kan ka ɲɛsin siniɲɛsigi ma? (Mat. 6:​24, 31-33; Luk. 8:14) Walisa ka wale kɛ ka kɛɲɛ ni Ala ka layidu talenw ye fo mɔgɔ ka dannaya kologɛlɛn sɔrɔ. An bɛ o de ye Ibrahima ni Musa ka misaliw fɛ. (Heb. 11:​8-10, 24-26) Denmisɛnninw, aw bɛ se ka o dannaya sugu sɔrɔ cogo di, ka ‘jujɔ ɲuman sigi siniɲɛsigi kama’?​—⁠1 Tim. 6:19.

² Aw ka Jehowa ɲini: Ni aw ni aw somɔgɔw bɛ jɛ ka alako baara kɛ ɲɔgɔn fɛ, aw bɛ fo o la. Nka, aw kana miiri ko o ko bolodalen dɔrɔn kɛli bɛna a to aw bɛ dannaya kologɛlɛn sɔrɔ. Walisa ka ‘Ala dɔnniya lakika’ sɔrɔ, aw kelen-kelen ka kan ka sigi ka Jehowa ɲini a yɛrɛ ye. (Nt. 2:​3-5; 1 Til. 28:⁠9) Josiyasi y’o de kɛ k’a sɔrɔ a tun ye denmisɛnnin ye, wa, a tun ye masakɛ ye fana. A mɔna mɔgɔ minnu cɛ ma, ani ko minnu fana tun bɛ kɛ a lamini na, olu tun t’a dɛmɛ a ka taa ɲɛ alako ta fan fɛ. O n’a ta o ta, Josiyasi ye san 15 sɔrɔ tuma min na, a y’a daminɛ ka “a fa Dawuda ka Ala ɲini.” ​—⁠2 Til. 34:⁠3.

³ Aw bɛ se ka Jehowa ɲini cogo di? Aw bɛ Jehowa ɲini ni aw bɛ aw ka dannakow sɛgɛsɛgɛ ɲɛmajɔ la ‘aw kɛtɔ k’a jira ka jɛya aw yɛrɛw ye’ ko o dannakow ye tiɲɛ ye tigitigi. (Rom. 12:⁠2) Misali la, Bibulu bɛ min fɔ joli ko la, yali aw bɛ se k’o ɲɛfɔ wa? Yali aw bɛ se k’a jira ko Ala ka Masaya ye fanga daminɛ sankolo la san 1914 wa? Ka ‘tiɲɛ dɔnniya lakika’ sɔrɔ, o ye ko ye min jɔyɔrɔ ka bon walisa ka jujɔ ɲuman sigi siniɲɛsigi kama.​—⁠1 Tim. 2:​3, 4.

⁴ Nafa ɲɛnamaw sɔrɔla Josiyasi ka Ala ɲinini na. Sanni a ka san 20 sɔrɔ, a y’a jagɛlɛya ka bolibato bɔ jamana kɔnɔ. (2 Til. 34:​3-7) O cogo kelen na fana, aw ka ɲɛtaa alako ta fan fɛ, o bɛ ye aw ka kɛwalew fɛ. (1 Tim. 4:15) N’i ye weleweledala ye min ma batɛmu ta fɔlɔ, i k’i jija k’i ka cidenyabaara kɛcogo ɲɛ ka t’a fɛ. I kana dan sɛbɛnw dɔrɔn jirali ma mɔgɔw la. A kɛ i kuntilenna ye ka baara kɛ ni Bibulu ye, ka hakilijakabɔ kɛ mɔgɔw fɛ. N’i ye mɔgɔ sɔrɔ kibaru duman ka di min ye, i ka o tigi sirataama, k’a dɛmɛ kibaru duman ka diya a ye ka t’a fɛ. (Rom. 12:⁠7) N’i bɛ o kow kɛ, o bɛna i dɛmɛ ka taa ɲɛ alako ta fan fɛ.

⁵ I seko damajira kɛ Jehowa ye: N’i ye batɛmu ta, o b’a jira ko i ye i yɛrɛbakun di Jehowa ma. O tuma na, i bɛ kɛ mɔgɔ ye sɔn kɛra min na ka kɛ Ala ka cidenyabaarakɛla ye. (2 Kor. 3:​5, 6) O bɛ sira dayɛlɛ i ye ka baara kɛ Jehowa ye waati dafalen na, cogo caman fɛ. A dɔw ye ka baara kɛ Betɛli la, ka kɛ misiɔnɛri ye, walima ka baara kɛ jamanaw ni ɲɔgɔn cɛ. I bɛ se ka dɔ fara i ka cidenyabaara kan cogo wɛrɛw fana fɛ. O ye ka kan wɛrɛ dege, walima ka yɛlɛma yɔrɔ wɛrɛ la, yɔrɔ min mago bɛ weleweledalaw la.

⁶ A jɛlen don ko an bɛɛ tɛ se ka o baara suguw kɛ, nka, an kelen-kelen bɛɛ bɛ se ka an seko damajira kɛ Jehowa ye. (Mat. 22:37) Ka baara kɛ Jehowa ye, o ka kɛ jɔyɔrɔ fɔlɔ la aw ka ɲɛnamaya kɔnɔ, aw bɛ cogoya o cogoya la. (Zab. 16:⁠5) N’aw bɛ o kɛ, aw bɛna jujɔ ɲuman sigi siniɲɛsigi kama

[Study Questions]

1. Aw denmisɛnnin minnu ye Kerecɛn ye, mun na aw ka kan ka dannaya kologɛlɛn sɔrɔ?

2. An bɛ kalan jumɛn sɔrɔ ka bɔ masakɛ Josiyasi ka misali la?

3. Denmisɛnnin minnu ye Kerecɛn ye, olu bɛ se ka Jehowa ɲini bi, cogo di?

4. Weleweledala minnu ma batɛmu ta fɔlɔ, olu bɛ se k’a jira cogo di k’u bɛ ka taa ɲɛ?

5. Kerecɛn minnu ye batɛmu ta, sira jumɛnw dayɛlɛlen bɛ olu ye walisa ka dɔ fara u ka cidenyabaara kan?

6. An bɛɛ bɛ se ka jujɔ ɲuman sigi siniɲɛsigi kama cogo di?