Branch Letter
Masaya weleweleda kanulenw:
‘. . . Ala de bɛ k’a bonya.’ (1 Kor. 3:6) A kɛra nisɔndiyakoba ye dɛ k’a ye waajulibaara yiriwara cogo min na waajulikɛyɔrɔ la, min bɛ Tɔn bolofara bolo kan! K’a daminɛ sɛtanburukalo san 2002 la ka n’a bila Utikalo san 2003 la, jamana minnu bɛ an ka waajulikɛyɔrɔ la, olu kelen-kelen bɛɛ ka baara dantigɛliw y’a jira ko baara caman kɛra foro cidenyabaara kɔnɔkow la. An ka misali dɔw mafilɛ: Mali la, weleweledala hakɛ kɛra 219 ye Mɛkalo la. Kabini Mali ye Mali ye, a siɲɛ fɔlɔ de tun ye nin ye ko weleweledalaw ka caya ka nin hakɛ sɔrɔ. Senegali, Awirilikalo la, weleweledalaw ye lɛrɛ 33 289 kɛ waajuli la. U tun ma deli ka o ɲɔgɔn lɛrɛ hakɛ kɛ fɔlɔ. An balimakɛ minnu bɛ Gine bisawo, olu fana ye u timinandiya kosɛbɛ. U kelen-kelen bɛɛ ye lɛrɛ 24,2 ɲɔgɔn kɛ cidenyabaara la Zanwuyekalo la. Kabini Sɛtanburukalo san 1999, u ka nin lɛrɛ hakɛ de cayara ka tɛmɛ u ka lɛrɛ kɛlen tɔw bɛɛ kan. An balimakɛw ye baara ɲuman kɛ sɛbɛnw fana ta fan fɛ la la. Minnu bɛ Ganbi, olu ye sɔn-ni-sɔn gafenin 3 536 bila mɔgɔw bolo Feburuyekalo la. Baara ɲuman min kɛra nin ye Jehowa ka masaya kunkankow kosɔn, an bɛɛ ka kan ka fo o la.
An ye cɛsiri minnu kɛ ka mɔgɔw ɲini, mɔgɔ minnu b’a fɛ ka Bibulu kalan kɛ an fɛ, Jehowa dugara an ye o yɔrɔ fana na. Senegali, Awirilikalo la, Bibulu-kalanw 1892 ɲɛminɛna. Mali la, Bibulu-kalan 619 ɲɛminɛna Marisikalo la. O Bibulu-kalan hakɛ ɲɔgɔn tun ma deli ka sɔrɔ Senegali ani Mali la. Gine Bisawo, Feburuyekalo la, weleweledala kelen-kelen bɛɛ ye Bibulu-kalan 2,9 ɲɛminɛ. Kabini Marisikalo san 1994, o de hakɛ cayara n’a bɛɛ ye. Nin ye fɛnw ye minnu b’a jira ko mɔgɔ caman bɛna fara an kan don nataw la, i ko Yesu y’a fɔ cogo min na: ‘Aw ka aw ɲɛw kɔrɔta ka foro filɛ, suman mɔna, a sera tigɛ ye.’ (Yuhana 4:35). I ko an ka baara dantigɛli y’a jira cogo min na, ‘An ka t’a fɛ ka taama cogo tilennen na, sira kelen kan.’ (Fil. 3:16)
Ikomi an ye an ka san 2004 baara daminɛ nin kalo in na, an bɛ an fara aw kan ka Jehowa deli walisa a ‘ka t’a fɛ k’a bonya.’
Aw balimakɛw,
Tɔn bolofara baarada ka bɔ Senegali.