Tiɲɛ bɛ se k’an hɔrɔnya cogoya min na
1 Don dɔ, Yesu ye a fɔ Yahutuw ye minnu tun dalen bɛ ale la: “Aw na tiɲɛ dɔn, tiɲɛ na aw hɔrɔnya.” (Yuhana 8:32) A tun bɛ ka kuma hɔrɔnya kan min ka bon ni hɔrɔnya ye, sariya bɛ min di an ma fɛn caman na. Bɛɛ bɛ se k’o hɔrɔnya sɔrɔ—faama fara faantan kan, mɔgɔ kalannen fara kalanbali kan. Yesu ye mɔgɔw kalan tiɲɛ ko la min tun bɛna u hɔrɔnya ka bɔ jurumu ani saya ka jɔnya la. I n’a fɔ Yesu y’a ɲɛfɔ cogoya min na “mɔgɔ o mɔgɔ bɛ jurumu kɛ, o ye jurumu ka jɔn de ye.” (Yuhana 8:34) An bɛ ka waati makɔnɔ kosɛbɛ, waati min na Ala kanminɛbagaw ‘na hɔrɔnya ka bɔ tolilenya ka jɔnya la, ka Ala denw ka hɔrɔnya nɔɔrɔ sɔrɔ’!—Rom. 8:21.
2 Tiɲɛ min ɲɛsinnen bɛ Yesu ni a jɔyɔrɔ ma Ala sagonata timɛli la, o dɔnniya fana bɛ na ni o hɔrɔnya sugu dɔ ye. Ka dɔnniya sɔrɔ Yesu ka kunmabɔ saraka kan, a ye min bɔ an ka nafa kosɔn, o sen bɛ o tiɲɛ in na. (Rom. 3:24) Hali bi bi in na, ka sɔn Bibulu ka tiɲɛ kuma ma, ka kolo a ye, k’a sirataama, o b’a to an bɛ se ka hɔrɔnya cogo dɔ la ka bɔ siranya la, ani jigitigɛ la, ani kɛwale jugu suguw bɛɛ la minnu bɛ baasi se an ma.
3 Hɔrɔnya ka bɔ siranya ani jigitigɛ la: Diɲɛ in kɛcogoyaw t’an jigitigɛ bawo an b’a dɔn mun na juguya bɛ diɲɛ na, wa an b’a dɔn ko a bɛna furan ka bɔ dugukolo kan. (Zab. 37:10, 11; 2 Tim. 3:1; Jir. 12:12) Ka fara o bɛɛ kan, tiɲɛ b’an hɔrɔnya ka bɔ kalansiraw la minnu tɛ tiɲɛ ye suw cogoya ko la. An b’a dɔn ko suw tɛ se ka kojugu kɛ an na, ko tɔɔrɔ banbali si t’u kan, ko Ala tɛ mɔgɔ faga dɔrɔn walisa o tigi ka taga sigi ale kɛrɛfɛ sankolo la.—Ekl. 9:5; Kɛw. 24:15.
4 O tiɲɛ ye denfa ani denba dɔ dɛmɛ, tuma min na u den sara, kasaara dɔ la. Denba ko: “Saya ye ɲɛnafin juguba bila an na, min tɛna tɛmɛn fo ni an ye an denkɛ ye tuma min na, suw lakununni na. Nka an b’a dɔn ko an ka dusukasi kuntagala ka surun.”
5 Hɔrɔnya ka bɔ kɛwale juguw la: Tiɲɛ min bɛ Bibulu kɔnɔ, o bɛ se ka mɔgɔ miiricogo ni a jogo yɛlɛma. O la sa, mɔgɔ bɛ se ka tanga gɛlɛyaw minnu ma, an bɛ tanga olu ma. (Efɛ. 4:20-24) Ni an bɛ tilenneya sira de kan, n’an bɛ baara ɲini tuma bɛɛ ani ka baara kɛ ni kologɛlɛnya ye, o bɛ se ka dɛmɛ kɛ walisa ka dɔ bɔ faantanya na. (Ntal. 13:4) Ni an bɛ mɔgɔw kanu, k’u nafa ɲini an yɛrɛ ta ɲɛ, o bɛ sigi diya, ka anw ni tɔw cɛ ɲɛ ka taa a fɛ. (Kol. 3:13, 14). Ka ɲɛsin kuntigiya ma, Ala ye min sigi denbaya kɔnɔ, ni o bɛ bonya, caman bɛ bɔ denbaya gɛlɛya la. (Efɛ. 5:33–6:1) Ni an b’an yɛrɛ tanga dɔlɔtɔya ma, ani jɛnɛya ma, siramugu ni sigarɛti min ma, ani dɔrɔgu tali ma, o b’an dɛmɛ an ka to kɛnɛya la.—Ntal. 7:21-23; 23:29, 30; 2 Kɔr. 7:1.
6 Kamalen dɔ tun dɛsɛra ka dɔrɔgu tali dabila. San kɔnɔntɔ a tun bɛ ka dɔrɔgu ta. Don dɔ, a ni an balimamuso dɔ bɛnna min tun bɛ ka seereya kɛ nbɛda la. Kamalen sɔnna sɛbɛn dɔ la. An balimamuso kɔsegira ka taa bɔ a ye a ka so. U ye Bibulu kalan daminɛ. Kalo fila tɛmɛnen, cɛ ye dɔrɔgu sugu bɛɛ tali dabila. Kalo seegin kalan kɔfɛ, a ye batɛmu ta. A bɔlen dɔrɔgu ta la, o ye a kɔrɔkɛ ni kɔrɔkɛ muso bila ka Bibulu kalan daminɛ.
7 Mɔgɔ wɛrɛw dɛmɛ ka hɔrɔnya sɔrɔ: Ala ka kuma bɛ hɔrɔnya min lase mɔgɔ ma, o hɔrɔnya faamuyali bɛ se ka gɛlɛya mɔgɔw bolo, minnu mɛnna nkalon kalansiraw ka jɔnya la. Ala ka kuma ka se o mɔgɔw dusukun na, o tɛ taa karamɔgɔ ka timinandiyaba ani a ka labɛn koɲuman kɔ. (2 Tim. 4:2, 5) Sisan tɛ waati ye ka an sumaya an ka baara la, n’o ye ka ‘hɔrɔnyali ko weleweleda ka ɲɛsin mɔgɔw ma minnu bɛ jɔnya la.’ (Isa. 61:1) Kerecɛn ka hɔrɔnya ye fɛn sɔngɔ gɛlɛn. A sɔrɔli kɔrɔ ye ɲɛnamaya banbali ye.—1 Tim. 4:16