Ɲɛmɔgɔ Kulu ka Bataki

An balimakɛw ni an balimamuso kanulenw:

¹ Nisɔndiyaba don anw bolo ka bataki ci aw ma. Aw y’a jira ko kanuya ani yɛrɛdi bɛ aw la, nka aw bɛ taara a fɛ ka o kanuya ni o yɛrɛdi kelen jira. An bɛ aw bɛɛ lajɛlen tanu o la. Aw bɛna a ye Annuaire 2003 kɔnɔ, ko baara ɲuman caman de kɛra, k’a ta Sɛtanburukalo san 2001 ma, ka n’a bila Utikalo san 2002 la. Nin sen in na tuguni, an ye waati minnu kɛ walisa ka waajuli kɛ, ka mɔgɔw kalan, ka dusu don u kɔnɔ u k’u gɛrɛ Jehowa la, o cayara ni lɛrɛ miliyari kelen ye. Yali o tɛ bonyaba ye an bolo ka kɛ an ka Ala nɔɔrɔman, ani an sankolola Fa, baarakɛɲɔgɔn ye wa?—1 Kɔr. 3:9.

² Hali k’an ɲɛ to baara nata la, an dalen b’a la ko aw bɛna taga a fɛ ka timinandiya ni limaniya ladege minnu kofɔlen bɛ Bibulu kɔnɔ ka ɲɛsin Ala ka baarakɛla ma. Misali la, ciden Pol tun b’a fɛ ka Masaya kow yiriwa cogo la min tun nafa ka bon kosɛbɛ. Pol ye san laban min kɛ Efese, a jɛlen don ko o waati kɔnɔna de la, a ye bataki fɔlɔ ci Kɔrɛnte Kerecɛn jɛkulu ma. A ka ko sigilenw ko la, a y’a sɛbɛn ko: ‘Ne na to Efese fo Pantekɔti ka se, k’a masɔrɔ dondaba dɔ dayɛlɛla ne ye ka baara caman kɛ, nka, an juguw ka ca.’—1 Kɔr. 16:8, 9.

³ Pol tun y’a boloda ka taa Masedwanɛ ni Kɔrɛnte duguw la. Nka, a y’a ye ko ni a tun tora Efese, ka waati dɔɔni kɛ yen, a tun bɛna se ka baara nafama kɛ o yɔrɔ la. Pol tun labɛnnen don tuma bɛɛ ka yɛlɛma don a ka ko bolodalenw na. A y’a ye ko cogo ɲuman tun b’a bolo ka Masaya kow yiriwa a tun bɛ yɔrɔ min na tigitigi. O la sa, a y’a ka ko bolodalenw yɛlɛma ka kɛɲɛ ni o ye. Donda ba tun dayɛlɛla a ye walisa a ka baara kɛ. O la sa, Pol kɔrɔtɔra ka don o da fɛ walisa k’o baara kɛ.

⁴ O kɛli tun bɛna baara caman wajibiya: ka kibaru duman fɔ, ani ka Efese jɛkulu kologɛlɛya ka taga a fɛ. Pol y’a fɔ kɔfɛ, o dugu jɛkulu cɛkɔrɔbaw ma, ko: “Fɛn min bɛ se ka aw nafa, ne ma o si dogo aw la. Ne ma siran ka aw waaju ka aw kalan mɔgɔw bɛɛ ɲɛ na ani sow bɛɛ kelen-kelen kɔnɔ, k’a fɔ Yahutuw ni Gɛrɛkiw fila bɛɛ ye ko u ka nimisa u ka jurumuw la ka da an Matigi Yesu la.”—Kɛwalew 20:20, 21.

⁵ O cogo kelen na, sira min dayɛlɛla balimakɛw ni balimamuso kanulenw ɲɛ, u caman ye tɔnɔ bɔ o la. K’a ta Sɛtanburukalo san 2001 ka n’a bila Utikalo san 2002 la, mɔgɔ 798 938 sera k’u ka kow labɛn walisa ka tutigɛbagaya baara dɔ kɛ. Aw dɔw bɔra aw ka jamana na ka taa sigi yɔrɔ jan walisa ka kɛ misiɔnɛriw ye. Aw bɛ ka kibaru duman jɛnsɛn ni timinandiyaba ye, ka jɛkuluw basigi, k’u kologɛlɛya. Aw dɔw ye kan wɛrɛ dege walisa ka se ka dunanw dɛmɛ minnu bɛ aw sigida la. Dɔ wɛrɛ fana ye u ka kow labɛn walisa ka baara kɛ wajulikɛyɔrɔ la minnu ma di jɛkulu dɔ ma, walima yɔrɔ la, wajulikɛlaw magoba bɛ yɔrɔ minnu na. Dɔw yɛrɛ y’a ye ko dondaba dɔ dayɛlɛla u ye lakɔliso la, u ka baarakɛyɔrɔ la, walima ko wɛrɛw la, u sera ka seereya ɲuman di minnu na, i n’a fɔ telefɔni fɛ. Ka bɔ diɲɛ yɔrɔ bɛɛ la, ko minnu kɛra wajuli la, olu y’a jira ko Ala ka jamakulu kɔnɔ, denmisɛnninw ni mɔgɔkɔrɔbaw bɛɛ cɛsirilen don walisa ka tiɲɛ dɔnniya lase mɔgɔw ma, yɔrɔ bɛɛ la.

⁶ Aw ka da a la ko Jehowa ɲɛ bɛ aw ka cɛsiriw la, wa, ko o ka di a ye kosɛbɛ. Bibulu ko: “Ala tɛ tilenbali ye, a tɛna ɲinɛ aw ka kɛtaw kɔ, ani aw ye kanuya min jira a tɔgɔ kosɔn.” (Heb. 6:10) Aw ka taga a fɛ ka aw janto baaraw la minnu bɛna to diinɛ saniyalen bɛ taa ɲɛ. Aw dɔw bɛ se ka dɔ fara aw ka cidenyabaara kan. An bɛɛ bɛ se ka an cɛsiri walisa an ka cidenyabaara ka nɔ ɲuman bila.

⁷ An tɛ se ka an ka ci dafa wajuli baara ko la, k’a sɔrɔ mɔgɔw ma an kɛlɛ. Aw hakili b’a la ko tuma min na Pol ko donda ba dɔ dayɛlɛla a ye, a y’a sɛbɛn fana ko: ‘juguw ka ca.’ Pol bolo, Yahutuw ni Gɛrɛkiw tun sen bɛ a juguw, walima a kɛlɛbagaw la. U dɔw tun bɛ sin k’a kɛlɛ kɛnɛ kan, nka, dɔw tun bɛ bɛnbɛnbɛn kɛ a kɔfɛ.—Kɛwalew 19:24-28; 20:18, 19.

⁸ An bɛ o ko kelen de fana na bi. Ikomi an ka diɲɛ jugu in halaki tuma bɛ ka surunya, an sigilen bɛ ni a ye ko dɔ bɛna fara an kɛlɛli kan. Sitanɛ “diminnen ba” don, wa o dimin ɲɛsinnen bɛ kɛrɛnkɛrɛnnenya la mɔgɔw ma minnu bɛ baara kɛ Ala ye. (Jir. 12:12) An kana ɲinɛ abada ko Sitanɛ de ye nin “diɲɛ kuntigi ye.” Yesu tun y’a fɔ a ka kalandenw ye ko: “Ni aw tun ye diɲɛ taw ye, diɲɛ tun na aw kanu, i n’a fɔ a yɛrɛ taw. Nka, ne ye aw ɲɛnatɔmɔ ka bɔ diɲɛ la, aw tɛ diɲɛ taw ye, o de y’a to diɲɛ bɛ aw kɔniya.”—Yuhana 14:30; 15:19.

⁹ Dannaya min bɛ an na ka ɲɛsin Ala ma, an cɛsirilen don walisa an kana to mɔgɔ si ka dɔ bɔ o dannaya barika la, walima ka dɔ bɔ an ka kisɛya la wajuli baara la. An b’a dɔn ko mɔgɔw bɛna sɔrɔ tuma bɛɛ minnu bɛna an kɛlɛ, ani ka bɛnbɛnbɛn kɛ an kɔfɛ. Nka, hali ni o gɛlɛyaw bɛ yen, an bɛ taga a fɛ ka Kibaru duman wajuli kɛ. An dalen b’a la ko Yesu bɛna Sitanɛ ni a ka jamaw halaki Jehowa ka waati latigɛlen na. Ciden Pol kɛlɛbagaw ma se ka a kɛ a ka wajuli dabila. U tɛna se fana k’a kɛ Jehowa ka bi baarakɛlaw k’u ka wajuli dabila. Hali ni Sitanɛ diminnen don, ani ko diɲɛ bɛ an kɔniya, Jehowa ka hakili senu bɛ ka baara kɛ ni setigiya ye a ka jamakulu la. Nisɔndiyaba don k’a dɔn ko mɔgɔ minnu bɛ kibaru duman weleweleda, o hakɛ ye 6 304 645 sɔrɔ. O ɲɔgɔn tun ma sɔrɔ fɔlɔ.

¹⁰ An bɛ Jehowa deli walisa an ka taga a fɛ ka tɔnɔ bɔ kow la walisa ka Jehowa ka dakabana Masaya kow taga ɲɛ. Aw ka da a la ko an hakili bɛ aw kelen-kelen bɛɛ la ni kanuya ye, k’a masɔrɔ ‘anw kamakun nɔrɔlen ɲɔgɔn na,’ an cɛsirilen bɛ ka baara kɛ sankɔrɔtalenba Ala, Jehowa ye.—Sof. 3:9.

Aw balimakɛw,

Jehowa Seerew ka ɲɛmɔgɔ kulu