An ka mɔgɔ wɛrɛw kalan kan saniyalen na

¹ Jehowa Seerew ye jamakulu kelen de ye, balimaya lakika kelen bɛ min kɔnɔ, diɲɛ yɔrɔ bɛɛ la, k’a sɔrɔ u bɛ bɔ ‘siyaw bɛɛ, bɔnsɔnw bɛɛ, mɔgɔ sifaw bɛɛ, ani kanw bɛɛ la.’ (Jir. 7:⁠9) Bi diɲɛ farafaralen in kɔnɔ, o ye dakabanakoba ye min bɛ ye kɛnɛ kan. O bɛ se ka kɛ cogo di? Anw ka kan ‘falenna k’a kɛ kan saniyalen ye.’​—⁠Sof. 3:⁠9.

² O ye dakabana nɔ minnu bila: O kan saniyalen ye mun ye? O ye tiɲɛ faamuyali cogo jɔnjɔn ye, min bɛ sɔrɔ Ala ka Kuma kɔnɔ, Jehowa n’a ka kuntilennaw ko la, kɛrɛnkɛrɛnnenya la, tiɲɛ min ɲɛsinnen bɛ Ala ka Masaya ma. Iko Yesu tun y’a kofɔ cogo min na, o tiɲɛ faamuyali bɛ jɛnsɛn bolo min fɛ, dugukolo kan, o ye “jɔnkɛ dannamɔgɔ hakilima” ye. O kɛra sababu ye, mɔgɔw bɛ ka bɔ ‘siyaw ka kanw bɛɛ la’ ka na don Alabato lakika la.​—⁠ Mat. 24:45; Zak. 8:⁠23.

³ Ni mɔgɔw bɛ kan saniyalen kalan, k’a faamu, o b’u bila u k’u ka ɲɛnamaya kɛ ka bɛn ni Jehowa ka sariyakolow ye. U b’a dege ka kɛ ‘hakili kelen, ani miiricogo kelen ye.’ (1 Kɔr. 1:10) Ala ka o kalan sigilen bɛ u dɛmɛ, ka taamacogo tilennen sɔrɔ, ka kumaw fɔ minnu saniyalen bɛ, ni tiɲɛ don fana, kɛrɛnkɛrɛnnenya la min ye ka kibaru duman fɔ mɔgɔ wɛrɛw ye. (Ti. 2:​7, 8; Heb. 13:15) O dakabana yɛlɛmaw bɛ Jehowa bonya.

⁴ Misali la, kibaru duman fɔra cɛ dɔ ye, ɲininkali caman tun bɛ min fɛ. A ka ɲininkaliw bɛɛ jaabi dira a ma k’a bɔ Bibulu kɔnɔ. A ye fɛn minnu mɛn, olu y’a bila a ka Bibulu kalan daminɛ, k’o kɛ, siɲɛ fila, dɔgɔkun kɔnɔ, ani ka taa lajɛw fana la. A taara tuma min na Masaya So la, u y’a kunbɛn cogo ɲuman min na, o y’a kabakoya kosɛbɛ, bawo mɔgɔ minnu tun bɛ yen, olu caman tun tɛ siya kelen mɔgɔw ye. Waati kuntilenna surun kɔnɔ, cɛ n’a muso ye yɛlɛmaw don u ka ɲɛnamaya kɔnɔ, ka batɛmu ta. Kabini o tuma na, cɛ ye mɔgɔ 40 ɲɔgɔn dɛmɛ ka kɛ Jehowa ka baarakɛlaw ye, a balima caman sen bɛ o mɔgɔw la. A ka dɛsɛbagatɔya m’a bali a ka tutigɛbagaya baara daminɛ, kɔsa in na.

⁵ Mɔgɔ wɛrɛw kalan: Ko minnu bɛ ka kɛ diɲɛ kɔnɔ, o ye mɔgɔ tilennen caman bila u k’u ka miiricogo ani u ka ɲɛnamaya jateminɛ kokura. An ka kan k’a ɲini k’o mɔgɔw dɛmɛ, i n’a fɔ Yesu tun y’a kɛ cogo min na. Nafa bɛ segin-ka-bɔnyew ni Bibulu kalan minnu na, n’an bɛ o kɛ, o de ye mɔgɔ tilennenw dɛmɛcogo ɲuman ye, walisa u ka kan saniyalen dege.

⁶ Ka Bibulu-kalan dɔɔni kɛ, ni mɔgɔ kɔrɔtɔlenw ye, u ka so dakun na, o ye kɛcogo ye min nafa yera kosɛbɛ. (km 5/02 ɲ. 1) Yali i delila k’o kɛ ka ye wa? N’i b’i labɛn tuma min na ka segin-ka-bɔnye dɔ kɛ, kuma daminɛcogo minnu bɛ Zanwuyekalo san 2002 An ka Masaya Cidenyabaara farankan kɔnɔ, i ka dɔ sugandi olu la, min bɛna bɛn i barokɛɲɔgɔn ma. Kuma daminɛcogo minnu bɛ o farankan kɔnɔ, olu caman kun ye ka baro dɔ daminɛ Wajibiya gafenin, walima Dɔnniya gafe kɔnɔ. I ye kuma daminɛcogo min sugandi, i ka o labɛn, walisa ka na ni baro ye dɔɔnin dɔɔnin dakun na, min bɛ sɔrɔ Wajibiya walima Dɔnniya gafe kɔnɔ. I ka Bibulu tɛmɛsira kelen, walima fila ta, o dakun kɔnɔ, min ka kan ka kalan, k’o ɲɛfɔ. I ka miiri fana ɲininkali dɔ la, i bɛna min lawuli walisa ka baro kuncɛ n’o ye. O bɛna i dɛmɛ i ka dakun dɔ labɛn, baro bɛna kɛ min kan, i ka segin-ka-bɔnye nata la.

⁷ Jehowa ka jamakulu bɛ ka dugawu caman sɔrɔ k’a sabu kɛ, a ye kan saniyalen dege. An fana ka an cɛsiri walisa ka mɔgɔ wɛrɛw dɛmɛ, u ka fara an kan, ka ‘Jehowa tɔgɔ wele’, ka baara kɛ a ye ‘an kamankun dalen ɲɔgɔn na.’ ​—⁠Sof. 3:⁠9.