Ɲininkaliw Jaabi

◼ An si so bɛ waajulikɛyɔrɔ min kɔnɔ, nafa jumɛnw b’a la, ka na o jɛkulu ka lajɛw la?

Fɛɛrɛw minnu tigɛra jɛkulu kɔnɔ olu bɛ dusu don an na, ka an bila ka kanuya jira ani ka koɲumanw kɛ. (Heb.10:​24, 25) Jɛkulu kɔnɔ, an bɛ tiɲɛ dɔn ani an bɛ baarakɛminɛnw sɔrɔ walisa ka cikan dafa, cikan min dira an ma ka mɔgɔw kɛ kalandenw ye. (Mat. 28:​19, 20) An bɛ fanga sɔrɔ fana, ka gɛlɛyaw ku limaniya kɔnɔ. Lakɔlɔsibagaw fana dilen bɛ an ma, kanuya bɛ minnu na. Olu b’an dɛmɛ an ka se ka degunw ani jɔrɔnankow caman kunbɛn. K’a fɔ ka jɛya, an ka alako tɛ se ka ɲɛsɔrɔ ni jɛkulu tɛ. O la sa, an si so bɛ waajulikɛyɔrɔ min kɔnɔ, nafa jumɛnw b’a la, ka na o jɛkulu ka lajɛw la?

Mɔgɔw cogoyaw tɛ kelen ye. Ko dɔw bɛ se ka mɔgɔ bila ka miiriya dɔ ta jɛkulu sugandili la, i na fɔ baara kɛyɔrɔ, furuɲɔgɔn min tɛ kerecɛn ye, ani bolifɛn ko. Hali o la, nafa kɛrɛnkɛrɛnnen b’a la, alako ta fan fɛ ani kun wɛrɛw kosɔn, ka na jɛkulu la, an ka so bɛ min ka waajulikɛyɔrɔ kɔnɔ. Jɛkulu maakɔrɔw bɛ se ka weleweledalaw bɛɛ sɔrɔ teliya la, ni ko gɛlɛn wuli la. Ɲininkaliw Jaabi tɛmɛnenw – sinsinna nafa damadɔ wɛrɛw kan.​—⁠Mɛkalo 1991 ani Marisikalo 1976 olu bɛ sɔrɔ Watchtower Library​—⁠san 1999 CD-ROM bɔlen kɔnɔ.

Tuma caman na, nafa b’a la ka na lajɛw la minnu ka surun an na. O b’a to an ka se ka na joona, ka baro kɛ ni tɔw ye yanni lajɛ ka daminɛ, k’an mago don kow la minnu ka kan ka kɛ. An ni tɔw bɛ lajɛ daminɛ ɲɔgɔn fɛ ni dɔnkili ani delili ye. Ni mɔgɔw bɛ an kɛrɛfɛ, tiɲɛ ko diyara minnu ye a ma mɛn, a bɛ nɔgɔya an ma kosɛbɛ ka taa bɔ u ye, ka Bibulu kalan kɛ ni u ye ani ka u dɛmɛ u ka to ka na lajɛw la nɔgɔya la.

An dalen bɛ a la ko denbaya tigiw na delili kɛ ka nin ko lajɛ, k’a kunkunw n’a ɲɛɲɛnw bɛɛ jateminɛ walisa k’a dɔn min ka fisa kosɛbɛ u ka denbaya ka alako ni a ka hɛrɛ ma.​—⁠1 Tim. 5:⁠8.