Mɔgɔw dɛmɛ u ka Tiɲɛ dɔn Yesu ko la
1 Krecɛn Mulenw ni u dɛmɛbagaw minnu bɛ wele saga tɔw, ‘olu ka ci ye ka seereya doni ta, seereya min bɛ kɛ Yesu ko la.’ (Jir. 12:17) Nin ci min dira, o nafa ka bon, bawo kisi bɛ sɔrɔ ale dɔrɔn de fɛ.—Yuhanna 17:3; Kɛwalew 4:12.
2 ‘Sira, Tiɲɛ, ani Ɲɛnamaya’: Yesu y’a fɔ ko: “Ne de ye sira ye, ani tiɲɛ, ani ɲɛnamaya.” “Mɔgɔ si tɛ na ne Fa ma, ni a ma tɛmɛn ne fɛ.” (Yuhana 14:6) Ni an tɛmɛna Yesu kelenpe dɔrɔn fɛ, ale min ye “sira” ye, an bɛ se ka gɛrɛ Ala la, an ka deliliw kɔnɔ, ka an ni a cɛ sira taama cogoya la, min ka di a ye. (Yuhanna 15:16) Yesu ye “tiɲɛ” ye, ka masɔrɔ kiraya kumaw ani ko nataw minnu bɛ Heburu Sɛbɛnniw kɔnɔ, olu bɛ waleya ale de kan. (Yuhanna 1:17; Kol. 2:16, 17) Tiɲɛ la, kiraya kuma lakika dabɔ kun fɔlɔ ye, ka yeelen bɔ Yesu jɔyɔrɔ kan, walisa a ka dɔn ko a bɛ cɛmancɛ jɔyɔrɔ de la Ala sago matarafali la. (Jir.19:10) Ka fara o kan, Yesu ye “ɲɛnamaya” ye. Ɲɛnamaya banbali ye ɲili fɛn de ye. Walisa ka o ɲili fɛn sɔrɔ, an bɛɛ ka kan, ka limaniya da kumabɔ saraka kan, Yesu ye min bɔ.— Yuhanna 3:16, 36; Heb. 2:9.
3 A ye Kunkolo ye ani Masakɛ Fangatigi: Mɔgɔw ka kan fana k’a dɔn ani ka sɔn a ma ko, Jehowa ye kuntigiya belebeleba dandɔnbali kalifa a denkɛ la. O faamaya bɛ Yesu yamariya a k’a sɛgɛsɛgɛ ni Jehowa ka sariyaw bɛ ka boli a ɲɛma. Yesu ɲɛnatɔmɔna ka kɛ Ala ka Masaya Masakɛ ye—ʽsiyaw na ale de kan minɛ.’ (Jen. 49:10) Ka fara o kan Jehowa y’ale de kɛ jɛkulu ɲɛmɔgɔ ye. (Efe. 1:22, 23) An ka kan, ka an ka Bibulu kalandenw dɛmɛ u k’a faamu, cogoya min na Yesu bɛ jɛkulu lakɔlɔsi ani cogoya min na a bɛ “jɔnkɛ dannamɔgɔ hakiliman” bila ka hakili la ‘dumuni di a tuma na’.—Mat. 24:45-47.
4 Sarakalasebaga kuntigi min bɛ makari: A hadamadenlama kɛlen ka gɛlɛyaw ani ɲɛni dɔn, Yesu bɛ se ka ‘dɛmɛ don mɔgɔw ma minnu bɛ kɔrɔbɔli bolo’. (Heb. 2:17, 18) I y’a dɔn ko nin ye dusu suma ko ye mɔgɔw bolo, u k’a dɔn ko, u ni u ka barikantanya bɛɛ, u ko ka di Yesu ye, wa a bɛ ka Jehowa dɛli u ko la ni ŋaniya ɲumanya ye! (Rom. 8:34) Yesu ka saraka ani a ka sarakalasebaga kuntigi jɔyɔrɔ sababu la, an bɛ se k’an magɛrɛ Jehowa la ‘ka kuma a fɛ ni an dusukun bɛɛ ye’ walisa an ka ‘dɛmɛ sɔrɔ a tuma na.’—Heb. 4:15, 16.
5 An bɛ ka jija wale min kɛ walisa mɔgɔw ka tiɲɛ dɔn Yesu ko la, o ka kɛ sababu ye, ka u kolo Yesu ye, u ka fara an kan ka baara kɛ a ye.—Yuhanna 14:15, 21.