Masaya so jɔli baarabolodalen bɛ ka taga ɲɛ
1 San 1983, “unis grâce au royaume” kafoba ka jamalajɛ la Etazuni, a fɔra ko wari kɛsu kɛrɛnkɛrɛnnen dɔ ko bɛna sigi sen kan walisa ka Masaya sɔw jɔliko, walima u dilanni ko ɲɛnabɔ, Etazuni ni Kanada jamanaw kan. Dugawu minnu tun bɛ na sɔrɔ o ko fitininw daminɛ na, an caman tun t’o dɔn fɔlɔ. An y’a daminɛ k’a dɔn cogo dafalen na, Zaburu 92:5 bɛ min fɔ ka bɛn tiɲɛ ma. A ko: “E Jehowa ye ne nisɔndiya ni i ka kɛwalew ye. Ne na ɲagali i bolo baara nɔ la.”
2 Ko minnu bɛ ka kɛ, olu bɛ ka an nisɔndiya kosɛbɛ sisan. Bi bi in na, Masaya so jɔcogo teliman baarabolodalen bɛ sen na diɲɛ yɔrɔ bɛɛ la. A kɛra cogo o cogo, bonya bɛ an kelen-kelen bɛɛ bolo ka an niyɔrɔ kɛ o baara la. An b’o kɛ, an kɛtɔ ka wari di bolomafara ye, a kɛra wari caman, walima wari fitinin ye, ka dɛmɛ don walisa bato yɔrɔ caman wɛrɛw ka se ka jɔ diɲɛ fan bɛɛ la. Balima caman fana b’a bɔ u yɛrɛ la k’u ka baarakɛminɛnw, u ka waati, u seko ni u dɔnko di o baaraw kama. Jehowa ka bilasirali, a ka dɛmɛ, ani a ka dugawu minnu bɛ an bɛɛ lajɛlen ka cɛsiri kan, o de y’a to o ko sigilen ye ɲɛtaa sɔrɔ. —Zab. 127:1.
3 Jehowa Seerew ka jɛkulu minnu bɛ Etazuni jamana na, olu tun y’a kɛ cogo min na, tɔn bolofara caman ye o ɲɔgɔn kɛ. Jamana caman ka Masaya sow kɔnɔ, buwati dɔ bilala walisa weleweledalaw k’u ka bolomafaraw bila a kɔnɔ, n’o ye Masaya sow jɔliko wari ye. Etazuni jamana ka Marisikalo san 1997 Masaya Cidenyabaara y’a fɔ ko yɛlɛma dɔ tun bɛ na don o ko sigilen na. A ko: “Kabini Tɔn ka Masaya so jɔli wariko sigira sen kan, balimaw ye bolomafara di ni fonisireya ye. O y’a to juru sera ka don walisa Masaya sow ka se ka jɔ. O jamana kan, jɛkulu 2,700 ye nafa sɔrɔ o fɛɛrɛ la kaban. Jɛkulu caman tun tɛ se cogoya wɛrɛ si la ka Masaya sow jɔ, walima minnu tun tiɲɛlen bɛ, k’olu dilan k’u kɛ kura ye. A magoba de bɛ yen sisan ka o wari dɔ juru don jɛkuluw la minnu bɛ jamanaw na, wariko gɛlɛya bɛ jamana minnu na. Aw bɛ ka taga a fɛ cogo min na ka o fɛɛrɛ kɔkɔrɔdon, Tɔn ani jɛkulu minnu bɛ nafa sɔrɔ aw ka bolomafara dilenw la, olu b’aw waleɲumandɔn kosɛbɛ.”
4 O ladɔnniyali kɛra welekan ye walisa mɔgɔw ka u sen don Masaya so jɔli teliman baarabolodalen na, k’a kɔkɔrɔdon. Masaya so jɔli wariko bɛ an balimaw mago ɲɛ, minnu bɛ jamana wɛrɛw fana na, k’a sɔrɔ juru bɛ ka don ka taga a fɛ Masaya so jɔli kama, Etazuni jamana yɛrɛ la. Kɔfɛ, Utikalo san 1997, An ka Masaya Cidenyabaara barokun y’a fɔ ko: “ Ka Masaya sow jɔ diɲɛ yɔrɔ bɛɛ la, o magoba de bɛ yen tuma bɛɛ. K’a ta Sɛtanburukalo san 1995 ka n’a bila Sɛtanburukalo san 1996 la, jɛkulu kura 3,288 sigira. O jɛkuluw la, caman bɛ Afiriki, Asi, Ameriki cɛmancɛ yanfan ni a worodugu yanfan, ani Erɔpu kɔrɔn yanfan de la.”
5 Kabini o waati la, mun ni mun sɔrɔla o ko la? San 2001 Annuaire des Témoins de Jéhovah y’a sɛbɛn ko: “Nin fɛɛrɛ sababu fɛ, Masaya so 453 jɔra kaban jamana 30 la, wa, 727 wɛrɛw jɔli bɛ sen na. Masaya so sugu min bɛ jɔ jamana kelen-kelen bɛɛ la, ka kɛɲɛ ni o jamana sojɔli minɛnw ye, ani o so jɔcogo ye, sinsin kɛra a kan ka o sojɔli cogow yiriwa. Keniya jamana na, kariyɛri farakuruw de bɛ ta ka sow jɔ. Togo jamana na, sow bɛ jɔ ni biriki ye. Kameruni jamana na, tuma caman na, sow bɛ jɔ ni betɔn ye, ka tila k’u mun ni palatiri ye. O cogo la, an balima minnu bɛ o jamanaw la, u bɛ se ka so jɔcogo fɛɛrɛw dege teliya la walisa u ka jɔyɔrɔba fa Masaya so jɔli baarabolodalen na u ka jamana na.”
6 Jehowa ka dugawuw bɛ o baarabolodalen kan cogo min na, o bɛ se ka ye Farafinna bagunba kan. Masaya so minnu jɔra, n’aw bɛ ka olu ja dɔw lajɛ, aw ka miiri o ye nɔ min bila Jehowa Seerew ka baara la. O nɔ bɛ ye yɔrɔ saba la: Kelenya min bɛ anw ni an balimaw cɛ diɲɛ fan bɛɛ la, ani o bɛ nɔ min bila an sigiɲɔgɔnw la, ani mɔgɔ minnu bɛ na jɛkulu ka lajɛw la, olu hakɛ cayali la. Nin barokun kalan sen fɛ, Masaya so minnu jɔra Farafinna, an ye olu foto caman ye, nka, An ka Masaya Cidenyabaara nataw bɛna sinsin Masaya So jɔli baarabolodalen kan min bɛ ka taga ɲɛ jamana wɛrɛw la, diɲɛ kɔnɔ.
[Pictures on page 3]
AFIRIKI CƐMANCƐ YANFAN JAMANA
Binbo, Bangi
Beguwa, Bangi
[Pictures page 4]
Ukɔnga, Tanzani
[Pictures on page 4]
Akara, Gana
[Pictures on page 4]
Salala, Liberia
[Pictures on page 4]
Alada, Benɛn—Masaya so kɔrɔ
[Pictures on page 4]
Alada, Benɛn—Masaya so kura
[Pictures on page 4]
Karuwa, Zimbabuye
[Pictures on page 5]
Kpeme, Togo
[Pictures on page 5]
Sokode, Togo
[Pictures on page 5]
Fijirose, Benɛn
[Pictures on page 6]
Lyɛnga, Zanbi—Masaya so kɔrɔ
[Pictures on page 6]
Lyɛnga, Zanbi—Masaya so kura
[Pictures on page 6]
Kinsasa, Kɔngo
[Pictures on page 6]
Musanbira, Ruwanda