Kɛ mɔgɔ ye min don ka di mɔgɔw la, min bɛ kumaɲɔgɔnya kɛcogo dɔn.
1 Cikan min dira an ma ka waajuli kɛ, ani ka mɔgɔw kɛ kalandenw ye, walisa o ka dafa, an ka kan ka mɔgɔw ladɔnniya (Mat. 24:14; 28:19, 20). Kumaɲɔgɔnya bɛ se ka gɛlɛya hali teriw ni ɲɔgɔn cɛ. Mun bɛ se k’an dɛmɛ ka kibaru duman lase mɔgɔw ma an tɛ minnu dɔn?
2 Ka bɔ dunanya la ka kɛ teri ye: I bɛ gɛrɛ mɔgɔ minnu na i ka waajuli senfɛ, a ɲini k’i yɛrɛ bila olu nɔ la. Bi diɲɛ in kɛcogo kosɔn, a bɛ faamu ko mɔgɔ dɔw bɛ siga kosɛbɛ walima u bɛ siran mɔgɔw ɲɛ, u tɛ minnu dɔn. O bɛ se ka kumaɲɔgɔnya bali mɔgɔw cɛ. An bɛ se ka mun kɛ walisa o siran ɲɔgɔnna ka bɔ mɔgɔw la? Hali k’a sɔrɔ an ma an da yɛlɛ ka kuma, kumaɲɔgɔnya bisigi bɛ don an ni mɔgɔ cɛ an yecogo bɛnnen fɛ. An ka fini labɛn cogo ɲuman ani an yecogo basigilen , o bɛ siran dɔgɔya an ni tɔw cɛ.— 1 Tim. 2:9, 10.
3 Min fana bɛ se k’an dɛmɛ ka don mɔgɔw la, o ye ka na u ma ni teriya sira ye, u k’a ye k’an ka kow ka nɔgɔ. O bɛ mɔgɔ tɔw lafoni, k’an lamɛnni nege don u la. O tɛ taa labɛn koɲuman kɔ. An bɛna min fɔ, ni an b’o dɔn tigitigi, o fana bɛ dɔ fara an ka basigi kan. Hakilisigi min bɛ an na, o bɛ se ka mɔgɔ wɛrɛw sama ka na kibaru duman nɔfɛ. Muso dɔ ye nin fɔ an balima dɔ ko la, o kɛlen kɔ ka taa bɔ a ye: “nisɔndiya min tun bɛ ye a ɲɛda kan, o tun bɛ lafiya de jira, wa o de tora ne kɔnɔ. O ye ne kabakoya”. O kɛra sababu ye ka kibaru duman lamɛnni sira dayɛlɛ o muso ye.
4 Jogo minnu bɛ mɔgɔ wɛrɛw sama ka na: Wajibi don an ma, ka an mago don sɛbɛ la, mɔgɔ wɛrɛw la (Fil.2:4). O sira dɔ ye, ka an janto an kana kuma kɛ an dɔrɔn ta ye. Tiɲɛ yɛrɛ la kumaɲɔgɔnya tɛ taga lamɛnni fana kɔ. N’an ye kuma di an lamɛnbagaw ma, ka u lamɛn ni sɛbɛ ye, u b’a ye ko an bɛ ka an mago don u la. O la sa, ni an lamɛnbaga bɛ ka kuma, an kana kɔrɔtɔ, k’a ɲini ka kuma karaba ka na an fan fɛ walisa an ka se ka an ka kuma labɛnnɛn fɔ u ye. U fo kosɛbɛ ni kɔnɔnajɛya ye, ni o bɛ se ka kɛ. An ka a ɲini ka an ka ɲɛfɔliw kɛɲɛ ni u ka kuma fɔtaw ye. Ni u bɛ kuma u nikanko de kan, an ka an ka ɲɛfɔliw kɛ, ka kɛɲɛ ni o ye.
5 Nɔgɔya ani majigilenya bɛ se ka kumaɲɔgɔnya yiriwa. (Prov.11:2; Kɛw.20:19). Mɔgɔw tun bɛ tugu Yesu kɔ bawo a tun ‘sabalilen bɛ ani a tun majigilen bɛ’ (Mat.11:29). Nka, ni an ye an yɛrɛ fisaya mɔgɔ tɔw ma, u b’u mabɔ an la. O la sa, hali ni an dalen bɛ a la ko tiɲɛ b’an bolo, an ka hakili sɔrɔ. An kana kuma i na a fɔ kun tɛ a la ka tɔw lamɛn.
6 Mun ka kan ka kɛ, ni an kumaɲɔgɔn ka dannayaw ni Bibulu kuma bɛ ɲɔgɔn kɛlɛ? Yali an ka kan ka o tigi ka kuma latilen wa? Ɔwɔ, o ka kan, nka wajibi tɛ o ka kɛ baro siɲɛ fɔlɔ la. Tuma caman na, a da ka di an na, an ka kuma sinsin o tigi ka miiriyaw kan, minnu ni an taw ye kelen ye, sani an ka Bibulu kalansiraw jira, o minnu faamuyali bɛ sɔn ka gɛlɛya a bolo. O tɛ taa muɲu kɔ ani kumacogo ɲuman, walisa an kana don a gasi la. O siratigɛ la, Ciden Pol ye ɲɛjiralan ɲuman dɔ to an bolo, a ka seereya kɛcogo fɛ ka ɲɛsin kiritigɛlaw ma, minnu tun bɛ Ayeropazi la. (Kɛw.17:18,22-31).
7 Ka tɛmɛ nin bɛɛ kan, ni an ye kanuya ta ka ɲɛsin mɔgɔw ma, nata tɛ kanuya min na, o b’an dɛmɛ ka kɛ mɔgɔ ye min bɛ se kumaɲɔgɔnya la, ka don mɔgɔw la. I na a fɔ Yesu, an fana ka hinɛ mɔgɔw la, u ‘sɛgɛnnen bɛ, ani u jɛnsɛnnen bɛ iko sagaw, gɛnbaga tɛ minnu na’ (Mat.9:36). O hinɛ in de bɛna an bila ka kibaru duman lase u ma, ani k’u dɛmɛ u ka ɲɛnamaya sira ta. Kanuya kuma de bɛ an da, o tuma na, an ka o kuma lase ni kanuya ye. O cogo de la, an bɛ Jehowa Ala ladege ani Yesu, olu minnu ɲɔgɔn tɛ sɔrɔ kumaɲɔgɔnya la.