Min bɛ aw bolo, o ka aw wasa
1 Ala ka kuma b’a wajibiya an ma, an ka jɔ n’an ka denbaya ye, nka o dɔrɔn man kan ka kɛ an ka kuntilenna fɔlɔ ye diɲɛlatigɛ kɔnɔ. Alako de ka kan ka kɛ fɛn bɛɛ la fɔlɔ ye. ( Mat. 6: 33; 1 Tim. 5:8) Ka hakili sɔrɔ o ko la, o tɛ ko nɔgɔn ye ‘nin waati gɛlɛnw na’ (2 Tim. 3:1) Mun bɛna an dɛmɛ ka ɲɛsɔrɔ a ko la?
2 Bibulu bɛ min fɔ, a kɛ ten: Ala ka kuma b’an laadi ko nafolo ɲini bɛ se ka kɛ sababu ye k’an tacɛn alako ta fan fɛ. (Ekl. 5: 10; Mat. 13:22; 1 Tim. 6: 9, 10) Nin waati gɛlɛnw na, a na kɛ bɔnɛba ye an ma, ni an y’an kuntilenna bɛɛ kɛ baara ni wari ɲini ye, ka alako baaraw, i na fɔ lajɛw, kalan, ani waajuli bila kɔ, an ka diɲɛlatigɛ kɔnɔ. (Luk. 21:34-36) K’a sɔrɔ Bibulu b’a fɔ an ye ko: ‘N’an ye balo ani fɛɛrɛbɔ sɔrɔ, o k’an wasa.’1 Tim. 6:7, 8.
3 O kɔrɔ tɛ ko a ɲinilen bɛ kerecɛnw fɛ ka faantanya wajibiya u yɛrɛ kan. Nka, o laadilikan b’an dɛmɛ k’a dɔn tiɲɛ tiɲɛ na an mago bɛ fɛn minnu na— balo, fɛɛrɛbɔ, ani siyɔrɔ min bɛnnen bɛ ka kɛɲɛ ni an sigiyɔrɔ ye. Ɲɛnamaya tɛ ɲɛ fɛn minnu kɔ, ni olu b’an bolo, an man kan k’an ta kɛ boli dabilabali ye walasa ka kɛ fɛntigi ye ka taa a fɛ. Ni an b’a fɛ ka fɛn san, walima n’an b’a fɛ ka baara wɛrɛ kɛ ka fara kɔrɔlen kan, a ka ɲi an k’an yɛrɛ ɲininka, yala an mago b’o la tiɲɛ na wa? N’an b’o kɛ, o b’an dɛmɛ an k’an janto Bibulu ka laadilikan na, k’a sirataama, o min ko: “Aw kana aw yɛrɛw bila wari nɔfɛ, nka min bɛ aw bolo o ka aw wasa” —Heb. 13:5.
4 N’an dalen bɛ Jehowa la, a na duba an ye (Nt. 3:5, 6) Hali n’an ka kan ka baara gɛlɛn kɛ walisa ka an dahirimɛ sɔrɔ, an man kan ka an ka ɲɛnamaya sinsin o kow kan. An ka sɔrɔta kɛra caman ye wo, walima fitinin ye wo, an b’an jigi da Jehowa de kan walisa k’an magow ɲɛnabɔ. (Fil. 4: 11-13) O na kɛ sababu ye, an ka wasa ani dugawu caman wɛrɛw sɔrɔ ka bɔ Ala yɔrɔ.
5 Mɔgɔ wɛrɛw ka limaniya ladege: Bangebaga dɔ min tun bɛ k’a denmuso ladon a kelen na, tiɲɛ sira kan, o y’a ka ɲɛnamaya taga siraw yɛlɛma dɔɔnin dɔɔnin fo k’a nɔgɔya. K’a sɔrɔ du ɲumanba tun b’a bolo a lafiyalen bɛ min kɔnɔ, a yɛlɛmana du fitinin dɔ kɔnɔ, ka laban ka soden gansanw ta. O kosɔn a sera ka dɔ bɔ a ka baarakɛwaati la, walisa ka dɔ fara a ka cidenyabaara waati kan. A denmuso kɔrɔbayalen kɔ, ka don furu la, bamuso in ye ereterɛti antisipe ta hali n’o ye a ka sɔrɔ dɔgɔya kokura. An balimamuso ye tutigɛbaga basigilen ye, sisan y’a san wolonwulanan ye, wa, a jɛnna fɛn minnu kɔ walisa ka Ala ka masaya kow bila ɲɛfɛ a ka diɲɛlatigɛ kɔnɔ, a ma nimisa hali dɔɔnin o la.
6 Diinɛ maakɔrɔ dɔ ni a muso ye tutigɛbagaya kɛ san caman, k’a sɔrɔ den saba tun b’u bolo ka ladon. Denbaya mumɛ ka ɲɛnamaya tɛ taga fɛnw minnu kɔ, u y’a dege ka u wasa ni olu ye. U m’u wasa don u yɛrɛ sagolafɛnw na. O maakɔrɔ y’a fɔ ko: “An tun ka kan ka nɔgɔya don an ka ɲɛnamaya kɛcogo la. Hali ni tuma dɔw gɛlɛyara an ma, an mago tun bɛ fɛn minnu na, Jehowa ye olu lase an ma tuma bɛɛ. . . K’a ye ko ne ka denbaya bɛ ka alakow bila ɲɛfɛ nin cogo in na, ne miiri la, kow bɛ ka kɛ a kɛcogo la, wa, ko an ye an ka baara kɛ a ɲɛ ma.” A muso fana ko: “Ni ne ye ne cɛ ye alako baaraw la, nisɔndiyaba de bɛ na ne la.” Denw fana nisɔn diyalen bɛ k’a ye k’u bangebagaw y’a bɔ u yɛrɛ la k’u yɛrɛ bɛɛ di Jehowa ka baara ma.
7 Bibulu ka fɔ la, mɔgɔ minnu b’a bɔ u yɛrɛw la, ka tugu Ala kɔ sanni u ka tugu nafolomafɛnw kɔ, olu na sarabaw sɔrɔ sisan ani ɲɛnamaya nata kɔnɔ.— 1 Tim. 4:8.