Masaya wajuli bɛ mɔgɔw dɛmɛ u ka kisi sɔrɔ
1 Baara dɔ bɛ sen na bi diɲɛ kɔnɔ, min nafa ka bon ka tɛmɛn baara tɔw bɛɛ kan. Jehowa Ala, Yesu Krista, ani mɛlɛkɛ ba caman bɛ ka o baara kɔlɔsi. O ye baara jumɛn ye? Mun na o nafa ka bon kosɛbɛ? O ye Masaya weleweledali baara ye. O bɛ mɔgɔw dɛmɛ u ka kisi sɔrɔ.—Rom. 1:16; 10:13, 14.
2 Mɔgɔ dɔw b’a miiri ko ni an b’a ɲini ka an seko damajira kɛ walasa ka diɲɛ ɲɛ, o cogo de la an bɛ se ka nafa lase tɔw ma. O kosɔn, mɔgɔ caman jijalen bɛ walasa ka bɛn sigi, walima ka wariko kɔnɔganw ɲɛnabɔ, walima ka banaw fana furakɛ. Nka, mun de bɛna mɔgɔw dɛmɛ kosɛbɛ?
3 Baara min ka fisa ni baara tɔw bɛɛ ye: Masaya cikan dɔrɔn de bɛ mɔgɔ dɛmɛ ka nin ɲininkaliw jaabi sɔrɔ: Kun jumɛn bɛ ɲɛnamaya la, mun na hadamaden bɛ tɔɔrɔ la, jigiya jɔnjɔn kelenpe jumɛn bɛ an ye siniɲɛsigi ta fan fɛ? Kibaru duman bɛ mɔgɔ dɛmɛ fana ka kɛ Jehowa teri ye. O cogo la sa, an bɛ ‘Ala ka lafiya sɔrɔ, o min barika ka bon ni hadamaden miiriyaw bɛɛ ye.’ (Fil. 4:7) An bɛ se ka diɲɛnatigɛ kunkow ɲɛnabɔ cogo min na bi, Masaya cikan dɔrɔn de bɛ o jira an na. Tuma min na nin diɲɛ juguman bɛna halaki, an bɛ se ka kisi cogo min na, Masaya cikan dɔrɔn de fana b’o ɲɛfɔ. (1 Yuh. 2:17) O kow kosɔn, yali an man kan ka an yɛrɛ bɛɛ di Masaya wajuli ma wa?
4 Misali la: A ka kɛ ko dugu dɔ barasi bɛ ɲini ka kari dugukɔnɔ mɔgɔ sunɔgɔlenw kan. Dɛmɛ jumɛn de bɛna fisaya o mɔgɔw ma? Barasi min barika banna, ka o ji soli ka taa bɔn wa? Walima ka o dugu cɛɲɛ? Cogo si la! Dugukɔnɔmɔgɔw ka kan ka lakunun, k’u lasɔmi ko kasaara natɔ don, k’u dɛmɛ fana u ka kisi. Mɔgɔ minnu bɛ sunɔgɔ la bi alako ta fan fɛ, olu fana bɛ faratiba la. (Luka 21:34-36) Ikomi nin diɲɛ in bɛna tɛmɛn sɔɔni, n’an bɛ se, an k’an cɛsiri walasa ka mɔgɔ bɛɛ waju, bawo o ye baara ye, min ka kan ka kɛ joona, joona, a tɛ se ka bila ka sumaya.— 2 Tim. 4:2; 2 Piɛ. 3:11, 12.
5 I banban k’o baara kɛ: An ka fɛɛrɛw ɲini walasa ka kibaru duman fɔ mɔgɔ caman ye. An bɛ se k’o kɛ u ka so, walima nbɛdaw la, walima telefɔni fɛ, ani senfɛ seereya fɛ. Jehowa ye baara min kalifa an na, o ye baara bɛɛ la nafama ye, an bɛ se ka min kɛ. N’an bɛ o baara kɛ ni timinandiya ye, an ‘na an yɛrɛ kisi, ka an lamɛnbagaw fana kisi.’—1 Tim. 4:16.
Yali i b’i timinandiya ka kalanjɛ ni sɛbɛnni kɛ wa?
1 Ni an b’a fɛ ka dɔnniya lakika sɔrɔ Ala ko la, ani a sagonataw ko la, wajibi don an ka kalan ka se hakɛ dɔ ma. Caman y’a faamu ko ka se kalanjɛ la, o ye konnɛgɛ ye min bɛ dayɛlɛ u ye walasa u k’u sen don Jehowa Ala ka bato la cogo la min bɛ wasa kɛ. (Jir. 1:3) Jɛkuluw ye balikukalan minnu sigi sen kan, o y’a to mɔgɔ caman sera kalanjɛ ni sɛbɛnni la. O kalanw sigira sen kan yɔrɔ minnu na, gafenin min bɛ ta a kama, o ye I k’i timinandiya ka kalanjɛ ni sɛbɛnni kɛ (ay-AR) gafenin ye. O gafenin kɛra baarakɛminɛn ɲuman ye min fɛ mɔgɔ bɛ se ka kalanjɛ ni sɛbɛnni dege joona.—1 Tim. 4:3; Mat. 24:45.
2 Kalanden kuluw bɛ kolabɛn cogo jumɛn na? I k’i timinandiya gafenin kɔnɔkuma dɔw filɛ nin ye: “Iko a bɛ kɛ Ala-ka-marako Cidenyabaara Kalan na cogo min na, weleweledala batisilenw ni batisebaliw fila bɛɛ tɔgɔw bɛ se ka sɛbɛn balikukalan na. Ni maakɔrɔw y’a latigɛ ka kulu kelen, walima caman sigi sen kan kalanjɛ ni sɛbɛnni degeli kama, u ka kan ka mɔgɔ sugandi min bɛ se mɔgɔ kalanni na, a k’u ɲɛminɛ. A jɛlen don ko mɔgɔ min bɛ kalanden kulu kalan, o tigi fana kalannen don, wa, a bɛ se kalanjɛ la kosɛbɛ. [ . . . ] Tuma caman na, balimakɛ de ka kan ka kalan ɲɛminɛ. Nka, ni balimakɛ tɛ yen min bɛ se ka kulu ɲɛminɛ, balimamuso bɛ se ka sugandi min bɛ se mɔgɔ kalanni na. [ . . . ] Maakɔrɔw bɛ se k’a ɲini balimamuso fɛ a ka balimamusow ni/walima mɔgɔ batisebali cɛmaw ni musomaw ka kulu ɲɛminɛ. Ikomi o balimamuso bɛ balimakɛ de nɔnabila nin mɔgɔ kalan baara in na, o kosɔn a ka kan ka fɛn biri a kun na. Ni kalan bɛ se ka kɛ siɲɛ fila, walima saba dɔgɔkun kɔnɔ, nafa b’o la, bawo o cogo la kalandenw bɛ se ka ɲɛtaa sɔrɔ joona. Kalansenw ni ɲɔgɔn cɛ, baara kɛta na di kalanden ma k’a kɛ so; karamɔgɔ n’o latilen kalansen nata daminɛ tuma na. Kalansenw ka kan ka kɛ waati la min bɛ bɛn kalandenw fanba ma. Dɔw bɛ kuluw tila k’u kɛ kuluninw ye ani ka kalansenw kɛ ka kɔn jɛkulu ka gafe kalan ɲɛ. Dɔ wɛrɛw bɛ kuluw tila ka kalan kɛ Ala-ka-marako Cidenyabaara Kalan kɛtuma na. Jɛkulu ka balikukalan waati n’a kɛyɔrɔ bɛ latigɛ jɛkulu maakɔrɔw ka kulu de fɛ.”
3 Ka kalanjɛ ni sɛbɛnni kɛ, an Dabaga, Jehowa Ala ye an da ni o se ye. Nka, o ye fɛn ye min tɛ taa cɛsiri kɔ. N’an sera kalan ni sɛbɛnni na, an bɛ barajiba min sɔrɔ o la, o ye ka se ka Ala ka Kuma faamu, ani ka tugu a ka cikan la, ko: ‘I ka o kalan su fara tile kan.’—Jos. 1:8.