I ka farankan in lamara

Kuma daminɛcogo dɔw ka ɲɛsin cidenyabaara ma

I bɛ se ka baara kɛ ni farankan in ye cogo min na

Kuma daminɛcogo nataw fanba bɔra An ka Masaya Cidenyabaara bɔko tɛmɛnenw kɔnɔ. I k’u sifilɛ i sago la ka seereya kɛ n’u ye i ka cidenyabaara la, k’a lajɛ i bɛna nɔ min sɔrɔ u la. I ka nin farankan lamara, ka to k’i sinsin a kan n’i b’i labɛn waati min na cidenyabaara kama.

I bɛ se ka Ala ka Kuma nege don mɔgɔ la n’i bɛ cikan fɔ k’a surunya. I ka ɲininkali pereperelatigɛlen lawuli, o kɔ, i ka jaabi surun kalan ka bɔ Bibulu la. I bɛ se ka nin hakililaw sifilɛ:

“I mana i miiri sini ma, jigiyaba de bɛ na i la wa, walima siga? [I ka jaabi makɔnɔ.] An ɲɛ bɛ kɔnɔganko minnu na bi an’u kɔmanaw, Bibulu tun y’u fɔ k’a kɔrɔ.”—2 Tim. 3:1, 2, 5; Nta. 2:​21, 22.

“Kɛnɛyako ye haminakoba ye bi. Yali i b’a dɔn ko Ala ye layidu ta k’a na kɛnɛyako gɛlɛyaw ban fo badaa wa?”—Esa. 33:24; Jir. 21:3, 4.

“Yali i b’a dɔn ko Bibulu kɔnna k’a fɔ ko gɔfɛrɛnaman kelenpe de bɛna laban ka diɲɛ bɛɛ mara wa?”—Dan. 2:44; Mat. 6:9, 10.

“E ka miiri la, diɲɛnasigi bɛna kɛ di n’a y’a sɔrɔ Yesu Krista de bɛ ka dugukolo mara?”—Zab. 72:7, 8.

“Mɔgɔ caman bɛ ɲani na k’a sababu kɛ mɔgɔ-woloma ye, ani fana ka da u ka diinɛ, u siya, walima u ka cɛya walima u ka musoya yɔrɔ kan. E bolo, Ala bɛ mun miiri o tɔɲɔli ko la?”—Kɛw. 10:34, 35.

“An b’a dɔn ko Yesu Krista ye kabako caman kɛ a tile la. N’i tun bɛ se k’a ɲini a fɛ a ka kabako kelen kɛ, o tun na kɛ jumɛn ye?”—Zab. 72:12-14, 16.

“Mɔgɔ caman sɛgɛnnen don ka kunkow kibaruw mɛn. A ka di u ye ka kunkow ɲɛnabɔli kibaruw mɛn. Nka, an bɛ se k’an ka gɛlɛyaw ɲɛnabɔli sɛbɛ sɔrɔ min?”—2 Tim. 3:16, 17.

“I bɛ delili kɛ Masaya min ko la Matigi (walima An Fa) ka delili kɔnɔ, yali i bɛ se k’a fɔ o ye fɛn min ye wa?”—Jir. 11:15.

Baro daminɛcogow

Ɲininkali minnu bɛ jukɔrɔla la, u labɛnna ka bɔ Comment raisonner gafe barokunw na. U bɛ gafe furaɲɛ jateden jira, jaabi kelen-kelen bɛɛ bɛ sɔrɔ yɔrɔ min na:

Yali mɔgɔ ɲumanw bɛɛ bɛ taa sankolo la wa? (61)

Yali mɔgɔ ka kan ka taa sankolo la walasa ka hɛrɛ lakika sɔrɔ wa? (62)

Yali dalilu ɲumanw b’an bolo ka da Ala la wa? (106)

Ko minnu bɛ an hadamadenw sɔrɔ, yali o hami bɛ Ala la tiɲɛ na wa? (107)

Ala ye jɔni ye? (108)

Mun na a nafa ka bon ka Ala tɔgɔ dɔn ani ka to k’a fɔ? (109)

Yali Yesu Krista ye Ala ye wa? (205)

Dɛmɛ jumɛn bɛ se ka furulasigi fisaya? (229)

Mun na juguya ka ca? (237)

Bi diɲɛ bɛ jɔn ka mara la: Ala walima Sitanɛ? (250)

Mun na an bɛ kɔrɔ ka tila ka sa? (253)

Mɔgɔ salenw bɛ lahalaya jumɛn na? (255)

Yali Ala bɛ sɔn diinɛw bɛɛ la wa? (310)

Mɔgɔ bɛ se ka diinɛ lakika lasaa cogo di? (316)

Ala ka Masaya bɛna mun kɛ? (336)

Sitanɛ bɛ a ka se boli mɔgɔw kan bi diɲɛ in na cogo di? (368)

Mun na Ala bɛ tɔɔrɔw to senna? (375)

Kun jumɛn bɛ hadamaden ka diɲɛnabɔ la? (434)

Wajibiya gafenin jiracogo dɔw

“Siga t’a la k’i bɛ sɔn a ma ko mɔgɔ caman dalen bɛ Ala la. Mɔgɔ minnu dalen b’o la, olu bɛɛ sɔnnen don a ma ko Ala bɛ ko dɔw wajibiya an ma. Mɔgɔw tɛ se ka bɛn min kan, o ye ko, Ala bɛ mun ko wajibiya an ma?” O kɔfɛ, i ka Wajibiya gafenin jira, ka kalansen fɔlɔ ta ka baro bɔ ni o ye.

“Ka da kunkow caya kan denbaya ka bi diɲɛnatigɛ la, yali i ma deli k’i yɛrɛ ɲininka ni fɛn bɛ yen min b’a to denbaya ka hɛrɛ sɔrɔ wa?” Jaabi kɔfɛ, i k’a jira ko Ala b’o fɛn jira Bibulu kɔnɔ, fɛn min b’a to denbaya ka hɛrɛ sɔrɔ. I ka Esayi 48:17 kalan. O kɔ, i ka kalansen 8 nan ta Wajibiya gafenin na, ka Bibulu tɛmɛsira kofɔlen dɔw jira minnu bɛ denbaya kɔnɔ mɔgɔw bɛɛ kelen-kelen bilasira ka ɲɛ. Ɲininkali minnu bɛ kalansen daminɛ na, i k’olu kalan. I ka mɔgɔ ɲininka n’a b’a fɛ ka jaabiw kalan.

“Bibulu kɔnɔko jujɔnw kalan bɛ nin gafenin kɔnɔ min faamu ka di. A bɛ san kɛmɛ-kɛmɛw bɔ, mɔgɔw tun bɛ kɔnɔnafili ɲininkali dɔw ko la. I bɛna o ɲininkaliw jaabiw sɔrɔ furaɲɛ kelen-kelen bɛɛ la. Misali la, Mun de ye Ala kuntilenna ye ka ɲɛsin dugukolo ma?” I ka kalansen 5 nan ta, ka kalansen daminɛ ɲininkaliw kalan. Fɛn min ka di dutigi ye ka tɛmɛ tɔw bɛɛ kan, i k’a ɲininka o la. O kɔ, i ka dakun bɛnnen kelen walima caman kalan, ka Bibulu tɛmɛsira bɛnnenw fana lajɛ. I k’a ɲɛfɔ ko jaabi ɲuman bɛ se ka sɔrɔ nɔgɔya la ɲininkali wɛrɛw la, i n’a fɔ fɔlɔ ta kɛra cogo min na. I k’a fɔ k’i bɛ segin ka na baro bɔ ɲininkali wɛrɛ kan.

“I bɛ mun miiri farinya kow bɛɛ la minnu bɛ kɛ foroba kalansow la? Yali o bɔra bangebagaw ka den lamɔbaliya la wa? Walima a bɛ se ka kɛ k’o bɔra fɛn wɛrɛ de la wa, i n’a fɔ Sitanɛ ka fanga?” I ka jaabi makɔnɔ. Ni mɔgɔ y’a fɔ ko Sitanɛ ka fanga nɔ don, i ka Jirali 12:​9, 12 kalan. Sitanɛ nɔ min bɛ diɲɛ ɲagami la, i k’o jira. O kɔfɛ, i ka Wajibiya gafenin dayɛlɛ kalansen 4 nan yɔrɔ la, ka mɔgɔ ɲininka n’a delila k’a yɛrɛ ɲininka Sitanɛ bɔ yɔrɔ la. I k’a daminɛ ni dakun fila fɔlɔw kalanni ye, k’a tila ka baro bɔ u kan. Ni mɔgɔ ye “bangebagaw ka den-lamɔbaliya” de sugandi iko kalansow la farinya sababu ye, i ka 2 Timote 3:​1-3 kalan, k’i sinsin jogo kofɔlenw kan minnu bɛ dɔ fara gɛlɛya in kan. O kɔ, i ka Wajibiya gafenin dayɛlɛ kalansen 8 nan yɔrɔ la, ka dakun 5 nan kalan, ka tɛmɛ ni baro ye.

“An mago bɛ dɔnniya min na walasa k’an ka denbaya ka diɲɛnatigɛ dilan ka ɲɛ, yali e ɲɛ na, an bɛ se ka sigi n’a ye ko an Dabaga na o di an ma wa?” Jaabi kɔfɛ, i ka Wajibiya gafenin jira. I ka kalansen 8 nan ta, k’a ɲɛfɔ ko Bibulu sariyakolow b’a kɔnɔ ka ɲɛsin denbaya mɔgɔw kelen-kelen bɛɛ ma. I k’a ɲini a tigilamɔgɔ fɛ k’i bɛ ɲɛjirali kɛ a ye walasa a ka se ka gafenin kɛ ka ɲinini kɛ Bibulu kɔnɔ ka nafaba sɔrɔ o la.

“Yali i b’a miiri tiɲɛ na ko aladeli bɛ se k’an dɛmɛ gɛlɛyabaw la minnu bɛ an da la bi tile in na wa?” [I ka jaabi makɔnɔ.] Mɔgɔ caman b’a fɔ ko aladeli bɛ kɔnɔna fanga di u ma. [I ka Filipekaw 4:​6, 7 kalan.] O bɛɛ n’a ta, mɔgɔ dɔ bɛ se k’a miiri k’a ka aladeliw tɛ jaabi sɔrɔ. [I ka Wajibiya gafenin dayɛlɛ kalansen 7 nan yɔrɔ la.] An bɛ se ka nafaba sɔrɔ aladeli la cogo min na, nin gafenin b’o ɲɛfɔ.”

“An ni an sigiɲɔgɔnw bɛ ka kuma ko mun na diinɛ caman bɛ yen minnu danfaralen don, k’a sɔrɔ Bibulu kelen dɔrɔn de bɛ yen. E bolo, mun na nin diinɛ ɲagami in bɛ yen? [I ka jaabi makɔnɔ. I ka Wajibiya gafenin dayɛlɛ kalansen 13 nan yɔrɔ la, ka daminɛ ɲininkaliw kalan.] I bɛna jaabi ɲuman sɔrɔ o ɲininkaliw la nin kalansen kalanni sababu la.”

I kɛlen kɔ ka La Tour de Garde ani Réveillez-vous! di mɔgɔ ma, i k’a ɲininka n’i bɛ se ka dakun surun kalan a ye. N’a sɔnna o ma, i ka Wajibiya gafenin dayɛlɛ kalansen 5 nan yɔrɔ la. Ɲininkali minnu bɛ kalansen daminɛ na, i k’olu jira a la. I k’a ɲini a fɛ a ka dakun fɔlɔ kalantɔ lamɛn walasa a ka ɲininkali fɔlɔ jaabi ɲini. Dakun kalannen kɔfɛ, i ka ɲininkali kɛ ko kura k’a ka jaabi makɔnɔ. I ka gafenin kofɔ a ye, ani n’a sɔnna a la, i ka fɛɛrɛ kɛ ka segin ka na walasa ka ɲininkali fila tɔw jaabi.

Dɔnniya gafe jiracogo dɔw

Ka Bibulu to i bolo la, i ka kuma daminɛ tan: “An bɛ nin Bibulu tɛmɛsira kalan mɔgɔ bɛɛ ye i ka bɔlɔn na bi. A b’a fɔ ko . . .” I ka Yuhana 17:3 kalan, ka tila ka ɲininkali kɛ, ko: “N’an ye dɔnniya lakika sɔrɔ, fɛn jumɛn de layidu tara an ye? Yali i y’o kɔlɔsi wa? [I ka jaabi makɔnɔ.] Mɔgɔ bɛ se k’o dɔnniya sugu sɔrɔ min?” Jaabi kɔfɛ, i ka Dɔnniya gafe jira k’a fɔ, ko: “Dɔnniya min bɛ nin gafe kɔnɔ, o bɛ se ka na ni ɲɛnamaya banbali ye. Mɔgɔw bɛ ɲininkali minnu kɛ Bibulu ko la, a b’u caman jaabi di.” I ka gafe kɔnɔkow lajɛyɔrɔ jira mɔgɔ la k’a ɲininka n’a y’a sɔrɔ a delila k’a yɛrɛ ɲininka o kow dɔ la kelen na.

“Tilenbaliya ni tɔɔrɔ ko minnu bɛ k’an lamini, walima minnu bɛ kɛ an yɛrɛw la, yali i delila k’i yɛrɛ ɲininka ni Ala ka sira bɛ olu la wa? [I ka jaabi makɔnɔ.] Bibulu b’a jɛya an ye ko Ala b’an kanu ani ko a na an dɛmɛ tɔɔrɔ tuma la.” I ka Zaburu 72:12-17 yɔrɔ dɔw kalan. I ka Dɔnniya gafe dayɛlɛ masalakun 8 nan yɔrɔ la, k’a jira k’a bɛ dususaalo jaabi di ɲininkali la, mɔgɔ miliyɔn caman bɛ ɲininkali min kɛ, n’o ye ko: Mun na Ala bɛ tɔɔrɔw to senna? N’a bɛ se ka kɛ, e ni a tigilamɔgɔ ka baro bɔ Bibulu tɛmɛsira dɔw kan minnu bɛ sɔrɔ dakun 3 nan fo 5 nan na, walima i k’o kɛ segin-ka-bɔnye senfɛ.

“An caman diyanyemɔgɔ dɔw sara. Yali i delila k’i yɛrɛ ɲininka n’an bɛna u ye ko kura wa? [I ka jaabi makɔnɔ.] Yesu y’a jira k’an diyanyemɔgɔ salenw bɛ se ka bɔ saya la ka segin ɲɛnamaya la. [I ka Yuhana 11:​11, 25, 44 kalan.] O de jiralen don Ala ka layidu fɛ min ɲɛsinnen bɛ an ma, hali ni san kɛmɛ caman tɛmɛna kabini a ta tuma na.” Ja min bɛ Dɔnniya gafe furaɲɛ 85 nan na, i k’o yɔrɔ dayɛlɛ k’a jukɔrɔ kumaw kalan. O kɔfɛ, ja min bɛ furaɲɛ 86 nan na, i k’o jira, k’a ɲɛfɔ. I ka mɔgɔ labɛn i ka bɔnyeli nata kama ni nin ɲininkali ye, ko: “Yali i b’a fɛ k’a dɔn mun na hadamadenw bɛ kɔrɔ ka sa wa?” I ka segin ka na baro bɔ masalakun 6 nan kan.

“Yali i delila k’i yɛrɛ ɲininka wa, ko mun na hadamadenw b’a ɲini ka si jan sɔrɔ?” Jaabi kɔfɛ, i ka Dɔnniya gafe dayɛlɛ masalakun 6 nan na, ka dakun 3 nan kalan. I k’a tigi bila hakilijakabɔ la Bibulu tɛmɛsira kofɔlenw kan. Ɲininkali fila minnu bɛ dakun laban na, i k’i sinsin olu kan k’a ɲini mɔgɔ fɛ n’a b’a fɛ k’u jaabi dɔn. N’a sɔnna o ma, i ka baro kɛ dakun nata damadɔw kan.

“An bɛ mɔgɔw ɲininka n’a y’a sɔrɔ u dalen bɛ nin na. . . ” I ka Jenɛse 1:1 kalan, ka tila ka ɲininkali kɛ, ko: “Yali i jɛnna ni nin kuma ye wa?” Ni mɔgɔ jɛnna n’o kuma ye, i ka tila k’a fɔ ko: “Ne fana bɛ ten. Nka, ikomi Ala ye fɛn bɛɛ da, yali i b’a miiri ko juguya fana ye ale nɔ ye wa?” Jaabi lamɛnnen kɔfɛ, i ka Wajulikɛla 7:29 kalan. I ka Dɔnniya gafe sigida 8 nan ta ka dakun 2 nan kalan. N’a ma jɛn ni Jenɛse 1:1 ka kuma ye, i k’a ɲini a fɛ a ka sɛgɛsɛgɛli kɛ k’a filɛ ko Dabaga bɛ yen, ko kɛnɛkan ko don.—I ka Comment raisonner gafe lajɛ a ɲɛ 84-6 nan na.

“Yali i bɛ jɛn n’a ye ko yɛlɛma telimanw bɛ ka don jogow la bi wa? O b’an mago don bilasirabaga ɲɛnama na wa?” [I ka jaabi makɔnɔ.] Hali ni Bibulu kɔrɔlen don ka tɛmɛ kitabuw bɛɛ kan, a bɛ laadilikan ɲumanw di bi balocogo kan, ani hɛrɛ sɔrɔ cogo kan denbaya kɔnɔ.” O kɔ, i ka sigida 2 nan ta Dɔnniya gafe kɔnɔ, ka dakun 10 nan kalan, ka dakun 11 nan kumasen fɔlɔ kalan, ka 2 Timote 3:​16, 17 fara o kan.

“Fɛn min bɛ anw ni dugukolo ɲɛ sini, yali i b’a fɛ k’o dɔn wa? [I ka jaabi makɔnɔ.] Bibulu bɛ siniko bakurubafɔ kuma kelen na: Alijinɛ! Ala tun ye mɔgɔ fɔlɔ fila bila yɔrɔ min na u da tuma na, o de ko don. O bɛna bɔ fɛn min fɛ, o ɲɛfɔli kuma mafilɛ bani.” I ka Dɔnniya gafe dayɛlɛ a ɲɛ 8 nan na, ka dakun 9 nan kalan, “Ɲɛnamaya, Alijinɛ kɔnɔ” jukɔrɔla la. O kɔ, i ka baro kɛ dakun 10 nan kan, ka Bibulu tɛmɛsira kalan, n’o ye Esayi 55:10, 11 ye. Ɲɛnamaya bɛna bɔ fɛn min fɛ alijinɛ sigilen kɔnɔna na, i k’a ɲini ka tɛmɛ ni baro ye o kan, dakun 11-16 na

N’i bɛ segin ka taa bɔ mɔgɔw ye i ye La Tour de Garde ani Réveillez-vous! to minnu bolo, i bɛ se ka fɔ, ko:

“N nako tɛmɛnen na, a diyara ne ye ka La Tour de Garde den kelen to i bolo. A dɔ rɔ, i y’a kɔlɔsi ko kunnafonidisɛbɛn in tɔgɔ dafalen ye ko, La Tour de Garde annonce le Royaume de Jéhovah. Masaya ye fɛn min ye, ani a bɛ se ka nafa min lase e n’i ka denbaya ma, a na diya ne ye k’o ɲɛfɔ i ye bi.” O bannen kɔ, i ka Wajibiya gafenin dayɛlɛ kalansen 6 nan yɔrɔ la, ka kalan ni baro kɛ o kan ka kɛɲɛ ni waati ye min bɛ a tigilamɔgɔ bolo.

“N bɔra i fɛ yan a ma mɛn, ani n tun ye La Tour de Garde ni Réveillez-vous! dɔw to i bolo. Mɔgɔw bɛ bonya min da Bibulu n’a ka laadilikan ɲumanw kan, o kunnafonidisɛbɛn ninnu bɛ dɔ fara o bonya kan. Ikomi n b’a miiri k’a nafa bɛ bɛɛ ye ka Ala ka Kuma faamu, n seginna ka na fɛn dɔ jira i la min bɛna i dɛmɛ k’o kɛ.” I ka Wajibiya gafenin walima Dɔnniya gafe jira, ka Bibulu kalan kofɔ a tigilamɔgɔ ye.

N’i bɛ kuma ɲɛ 192 gafe kɔrɔman dɔw kan tuma min na, i bɛ se ka nin kuma daminɛcogo sifilɛ:

“Sinsin kɛra ladamu kɛko ɲuman kan kosɛbɛ. E ka miiri la, mɔgɔ ka kan ka tugu ladamu sugu jumɛn na walasa a ka hɛrɛba sɔrɔ, ani k’a ka diɲɛnatigɛ don da la? [I ka jaabi makɔnɔ. O kɔfɛ, i ka Ntalenw 9:10,11 kalan.] Nin gafe [i ka gafe jirata tɔgɔ fɔ] bɛ tali kɛ Bibulu la. Dɔnniya min bɛ na ni ɲɛnamaya banbali ye, o bɛ bɔ yɔrɔ kelenpe min na, gafe in b’o jira.” I ka misali pereperelatigɛlen jira gafe kɔnɔ, ka dusu don a tigilamɔgɔ kɔnɔ a k’a kalan.

Sɛbɛn tɔw

Kuma daminɛcogo minnu ɲɛsinnen don gafew ni gafenin wɛrɛw ma, olu bɛ se ka sɔrɔ Ɛndɛkisi (Index des publications de la Société Watch Tower) kɔnɔ. I ka Présentation (Kuma jiracogo) ɲini ka tila ka Liste par publication (Sɛbɛnw tɔgɔ jiralen bɛ ka tugu ɲɔgɔn na) lajɛ.

Ka sin ka Bibulu kalan kofɔ

Walasa ka Bibulu kalanw daminɛ, i ka nin sifilɛ:

“Yali i b’a dɔn ko sanga damadɔw dɔrɔn kɔnɔ, i bɛ se ka Bibulu ka ɲininkali nafama dɔ jaabi sɔrɔ wa? Misali la, . . . ” O kɔfɛ, i ka ɲininkali kɛ min bɛ Wajibiya gafenin kalansen daminɛ dɔ la, ani min bɛ se ka diya mɔgɔ ye.

“N ye n jɔ k’an ka Bibulu kalan bolodalen jira i la, n’o bɛ kɛ fu. A ɲɛjirali bɛ sanga duuru ɲɔgɔn ta. Yali sanga duuru b’i bolo wa?” N’a tigi sɔnna, i ka Wajibiya gafenin kalansen fɔlɔ kɛ ka kalan ɲɛjira a la, ka Bibulu tɛmɛsira sugandilen kelenpe, walima fila kalan. O kɔfɛ, i ka ɲininkali kɛ, ko: “Sanga 15 bɛna sɔrɔ i bolo tuma jumɛn na walasa an ka kalansen nata kɛ?”

“Bibulu bɛ mɔgɔ caman bolo, nka u t’a dɔn ko jaabiw b’a kɔnɔ ka ɲɛsin an bɛɛ ka siniko kunkan ɲininkalibaw ma. N’i bɛ nin dɛmɛlan [Wajibiya gafenin walima Dɔnniya gafe] kɛ ka kalan kɛ lɛrɛ kelen ɲɔgɔnna na dɔgɔkun kɔnɔ, i bɛ se ka Bibulu faamuyali jujɔn sɔrɔ kalo damadɔw dɔrɔn kɔnɔ. A na diya ne ye ka kalan bolodalen kɛcogo jira i la.”

“N nana ka Bibulu kalan kofɔ i ye, a bɛ kɛ i ka so fu. N’i bɛ sɔn, n b’a fɛ ka sanga damadɔw dɔrɔn ta walasa k’a jira i la cogo min na jamana 200 ɲɔgɔnna na, mɔgɔw bɛ baro kɛ Bibulu kan u ka denbayaw kɔnɔ. An bɛ se ka nin masalakunw dɔ la kelen kɛ ka baro daminɛ n’o ye. [I ka tilaw lajɛyɔrɔ jira Dɔnniya gafe kɔnɔ.] Jumɛn ko ka di i ye kɛrɛnkɛrɛnnenya la?” I ka mɔgɔ makɔnɔ a k’a ka sugandili kɛ. A mana masalakun min sugandi, i k’o yɔrɔ ta ka kalan daminɛ ni dakun fɔlɔ ye.

“N bɛ mɔgɔw kalan fu Bibulu la, wa, waati bɛ n bolo kalanden wɛrɛw kalan kama. An bɛ baara kɛ ni nin gafe ye. A b’an dɛmɛ ka Bibulu faamu. [I ka Dɔnniya gafe jira a la.] Kalan bɛ kalo damadɔw dɔrɔn de ta, wa, a bɛ nin ɲininkali ɲɔgɔnnaw jaabiw di: Mun na Ala bɛ tɔɔrɔ to senna? Mun na an bɛ kɔrɔ ka tila ka sa? Mun bɛ kɛ an diyanyemɔgɔ salenw na? Ani an bɛ se ka gɛrɛ Ala la cogo di? Yali n bɛ se ka kalansen ɲɛjira i la wa?”

Ni ye kuma daminɛcogo ɲuman dɔ sɔrɔ min bɛ tiɲɛ dɔnniya nege don mɔgɔw la, i ka baara kɛ n’a ye ka t’a fɛ! Sɛbɛn min bɛ jira kalo la, i k’a bɛn o ma dɔrɔn.