Kanuya b’an bila ka wajuli kɛ
1 Anw, Jehowa Seerew, an dɔnnen don ni Masaya cikan wajulikɛla timinandiw tɔgɔ ye. (Mat. 24:14) Minnu bɛ baara la diɲɛ bɛɛ la, u ka ca ni miliyɔn wɔɔrɔ ye; mɔgɔ kuraw hakɛ kafolen bɛ o jateden kan tuma min na u bɛ wajuli daminɛ an fɛ. Mɔgɔ minnu b’u sen don o baara la, jateminɛ bɛ kɛ olu kan.
2 Mun b’an bila ka kɛ dɛmɛdonbagaw ye baara la min ka kan ni cɛsiri ye? Mɔgɔ si t’an diyagoya, an tɛ sama nafolo sɔrɔli nɔfɛ, bonya ni jɔyɔrɔ kɛrɛnkɛrɛnnenw tɛ ni an ma. A daminɛ na, an fanba bɛ siran o baara ɲɛ bawo an yɛrɛ ɲɛna, an tɛ se k’o kɛ, wa, mɔgɔ caman tɛ sɔn cikan ma tuma caman. (Mat. 24:9) An filɛbagaw tɛ se k’a faamu fɛn min b’an bila k’o baara kɛ. Kun sɛbɛ de ka kan k’an bila k’an timinandiya.
3 Kanuya bɛ se min na: Yesu ye ci fɔlenw bɛɛ la fɔlɔfɔlɔ da kɛnɛ kan tuma min na a y’a fɔ ko an ka kan ka ‘Jehowa kanu n’an dusukun bɛɛ ye n’an ni bɛɛ, n’an hakili bɛɛ, n’an barika bɛɛ.’ (Mar. 12:30) An bɛ Jehowa kanu katuguni an b’a waleɲumandɔn kosɛbɛ, an bɛ nafa don a jogo n’a jɔyɔrɔ la n’o ye Masaba ye, fɛn bɛɛ Dabaga ‘min ka kan ni nɔɔrɔ ni bonya ni sebagaya ye.’ (Jir. 4:11) A jogo ɲɛ cɛɲumanbaw ɲɔgɔn tɛ.—Eki. 34:6, 7.
4 O la, Jehowa dɔnni n’a kanuni b’an bila k’an ka yeelen yelenku mɔgɔ ɲɛkɔrɔ. (Mat. 5:16) N’an b’a tanu kɛnɛ kan, ka kuma a ka dakabanabaaraw kan, k’a ka Masaya cikan jɛnsɛn, an ka yeelen bɛ ka yelenku. Iko ‘Kibaru duman banbali’ bɛ mɛlɛkɛ pantɔ min fɛ cogo min na, o cogo kelen na, kibaru b’an fɛ ‘k’a fɔ siyaw bɛɛ ye bɔnsɔnw bɛɛ ni kanw bɛɛ ani mɔgɔ sifaw bɛɛ.’ (Jir. 14:6) An ka kanuya de bɛ wajulibaara lataa ɲɛ diɲɛ bɛɛ kɔnɔ.
5 Diɲɛ b’an ka wajuli jate iko “nalonmaya” min man kan ni tulomajɔ ye. (1 Kɔr. 1:18) Cɛsiriba kɛra yɔrɔ caman na walasa k’an ka baara degun. Nka, an ka kanuya ɲuman bɛ k’an ka barika bonya; o la, iko cidenw y’a fɔ cogo min na, anw fana b’a fɔ ko: “An ye ko minnu ye ka u mɛn, an tɛ se ka to olu fɔbali ye. . . . Wajibi don an ka Ala kan minɛ ka tɛmɛn mɔgɔw ta kan.” (Kɛw. 4:20: 5:29) K’a sɔrɔ wajulibaara juguw bɛ k’a kɛlɛ, a bɛ to ka yiriwa diɲɛ yɔrɔ bɛɛ la.
6 An ka Jehowa kanuni b’i n’a fɔ tasuma min b’an wajibiya k’a ka ɲumanya kow fɔ. (Jer. 20:9; 1 Piɛ. 2:9) O la sa, an na to ka ‘a ka kɛwalew lakali siyaw cɛma . . . katuguni a ye ko ɲumanbaw kɛ’.—Esa. 12:4, 5, La Sainte Bible en Bambara, 1961, ABU.