Awirilikalo: Waati don ‘ka baara kɛ kosɛbɛ, k’an sɛbɛkɔrɔ-jija’
1 Dɔgɔkun minnu bɛ Hakilijigin don ɲɛ ani a kɔ, olu ye taasi waati de ye Jehowa ka mɔgɔw fɛ. Waati don k’an hakili jakabɔ fɛn kan, fɛn min timɛna Krista ka saya sababu fɛ. Ala ye jigiya min d’an ma Yesu joli bɔnnen sababu fɛ, an bɛ miiri o fana na ni ɲɛmajɔ ye. N’i y’i miiri salon Awirilikalo tile 19 ma, mun bɛ na i hakili la? I ye mɔgɔ minnu ye o su, yali i hakili bɛ se ka jigin olu la wa? An tun bɛ hakili ta fan fɛ hukumu nafamaba min kɔnɔ dun? Bibulu barokun sɛbɛ, ani delili minnu bɔra mɔgɔ dusukun na, olu ko dun bɛ cogo di? Ikomi Jehowa ni Yesu ye kanuya jira i fan fɛ, a dɔ rɔ i y’a ŋaniya k’i ka waleɲumandɔnba jira ka t’a fɛ. Ka taasi o cogo la, o bɛ nɔ jumɛn bila an na sisan?
2 A jɛlen don ko Jehowa ka mɔgɔw y’u ka waleɲumandɔn jira sira wɛrɛw fɛ minnu tɛ dan kuma dɔrɔn ma. (Kol. 3:15, 17) Salon Awirilikalo la kɛrɛnkɛrɛnnenya la, an kɛtɔ k’an jija ka dɔ fara an ka kɛtaw kan Krecɛn ka cidenyabaara la, an y’a ɲini ka waleɲumandɔn jira Jehowa ka kisili fɛɛrɛ tigɛlenw ko la. Tutigɛbaga farankanw hakɛ taara ba caman na, ka hakɛ cayalenba kɔrɔlenw tɛmɛ jamanaw na minnu bɛ Afiriki tilebin yan fan n’a cɛmancɛ yan fan na. Misali la, Togo jamana ye cayalenba kura sɔrɔ tutigɛbaga farankanw na. U kɛra 1778 ye. O hakɛ bonyana ni salon cayalenba ye ni 21 ye kɛmɛ o kɛmɛ na. Senegali tutigɛbaga farankanw kɛra 196 ye. U ye cayalenba kɔrɔlen tɛmɛ ni 17 ye kɛmɛ o kɛmɛ na. U ka cɛsiriw, ka fara Masaya weleweledala tɔw bɛɛ ta kan, o nana wolo cayalenba kuraw la lɛrɛw la, sɔn-ni-sɔn gafenin bilalenw la, ani segin-ka-bɔnyew la. Dɔ farala an ka nisɔndiya kan k’a ye ko Bibulu kalan kura kɛmɛ caman daminɛna, ko mɔgɔ minnu fana tun bɛ ye Hakilijigin lajɛ kɛnɛkan, ko cayalenba kura sɔrɔla olu hakɛ la.
3 Tiɲɛ na, an jigiya jɛlen b’an bila wale la. A bɛ iko ciden Pol y’a sɛbɛn cogo min na ko: “O de kosɔn an bɛ baara kɛ kosɛbɛ, k’an sɛbɛkɔrɔ-jija katuguni an ye an jigi da Ala ɲɛnama kan min ye mɔgɔw bɛɛ Kisibaga ye, janko dannabagaw ta.”— 1 Tim. 4:10, Traduction du monde nouveau, NW.
4 Nin Hakiligin don waati la, i bɛna jira cogo jumɛn na k’i y’i ka dannaya da Jehowa ka fɛɛrɛw kan ɲɛnamaya kama? Awirilikalo tɛmɛnen na, jamana caman na, cayalenbaw sɔrɔla Masaya weleweledalaw hakɛ la min ɲɔgɔn tun ma deli ka kɛ fɔlɔ. Ɲinan fana, yali an bɛna cayalenba kuraw sɔrɔ Awirilikalo la wa? An bɛ se k’o kuntilenna sɔrɔ. Nka, weleweledalaw bɛɛ, batiselenw ni batisebaliw ka kan k’u sen don baara la. Mɔgɔ kura caman bɛ cogow dafa, olu fana bɛ se k’u sen don baara la. O la sa, n’i bɛ ka kow labɛn walasa ka baara kɛ kosɛbɛ, k’i sɛbɛkɔrɔ-jija nin Awirilikalo la, i bɛ se ka mɔgɔ wɛrɛw dusu lamin cogo minnu na walasa u k’i bilasira foro baara la, i k’olu jateminɛ. Mɔgɔ kuraw ani minnu tɛ se kosɛbɛ wajuli la, olu fana b’o mɔgɔw la.
5 I ka dɔw dɛmɛ walasa u ka segin u ka baara la: N’i bɛ mɔgɔ dɔw dɔn minnu ma bɔ foro baara la kalo kelen, walima kalo fila kɔnɔ, i bɛ se ka dusu don olu kɔnɔ, k’a ɲini u fɛ u k’i bilasira foro baara la. Ni dɔw kɛra walekɛbaliw ye jɛkulu kɔnɔ, maakɔrɔw bɛna cɛsiri kɛrɛnkɛrɛnnen kɛ walasa ka taa bɔ u ye, ka dusu don u kɔnɔ u ka baara daminɛ ko kura Awirilikalo la.
6 An bɛɛ ka kan ka t’a fɛ ka Jehowa ka hakili senu ɲini walasa a ka dɔ fara an barika kan a ka baara la. (Luka 11:13) An ka kan ka mun kɛ walasa k’o hakili sɔrɔ? An ka kan ka Ala ka Kuma fiyɛlen kalan. (2 Tim. 3:16, 17) ‘Hakili bɛ min fɔ jɛkuluw ye,’ an ka kan k’o fana ‘lamɛn’ n’an bɛ dɔgɔkun lajɛ duuru la (Jir. 3:6, Layidu Kura) Mɔgɔ minnu basigilenw tɛ wajuli baara la, ani minnu ye walekɛbaliw ye, waati bɛnnen de ye sisan ye walasa k’olu dɛmɛ u k’u ka kalan kɛcogo ɲɛ ka t’a fɛ, ani k’a latigɛ ka kɛ lajɛw la tuma bɛɛ. (Zab. 50:23) N’an b’o kɛ tuma min na, an ɲɛmajɔlen ka to kosɛbɛ fana an yɛrɛ ka hakili ta fan fɛ nɛɛma na. O n’a ta o ta, fɛn wɛrɛ wajibiyalen don.
7 Ciden Pol y’a fɔ ko Ala bɛ a ka hakili senu di ‘mɔgɔw ma minnu b’a kanminɛ i n’a fɔ u ka kuntigi.’ (Kɛw. 5:32, NW) K’i ɲɛmajɔ ci fɛ ka “mɔgɔw waju, ani ka seereya kɛ ka dafa,” o sen bɛ o kanminɛni sugu la. (Kɛw. 1:8; 10:42) O la sa, hali ni tiɲɛ don k’an mago bɛ Ala ka hakili senu na walasa k’an barika bonya ka se ka wajuli kɛ, tiɲɛ don fana ko n’an b’a daminɛ ka jira Jehowa la k’an b’a fɛ k’an kodiya a ye, a bɛna an dɛmɛ kosɛbɛ tun. An bɛ o fɛn fɔlɔ minnu kɛ walasa k’a jira k’a ka di an ye ka Ala kanminɛ, o fɛnw nafa kana dɔgɔya an bolo abada.
8 I ka funankɛninw dɛmɛ: Bangebagaw, yali aw y’a kɔlɔsi k’aw ka denmisɛnninw b’a fɛ ka kuma mɔgɔ wɛrɛw fɛ tiɲɛ kan wa? Yali u b’aw bilasira foro baara la wa? Yali u ye misali ɲuman ye taamacogo ta fan fɛ wa? N’a bɛ o cogo la, mun na ka sigasiga? Aw ka kuma jɛkulu ka baara kulunin mɔgɔ dɔ la kelen fɛ walasa k’a lajɛ n’aw denw bɛ cogow dafa ka jate weleweledala ye Awirilikalo in na. (Notre Ministère gafe ɲɛw 99-100 lajɛ.) Aw ka sɔn a ma k’aw denw bɛ se ka niyɔrɔba kɛ Jehowa tanuni na nin Hakilijigin don waati la.— Mat. 21:15, 16.
9 Krecɛn denba dɔ tun bɛ dusu don a denmusonin kɔnɔ tuma bɛɛ a ka kuma mɔgɔ wɛrɛw fɛ Jehowa kan. Salon, tuma min na den tun bɛ ka wajuli kɛ a ba fɛ, a ye Wajibiya gafenin to cɛ dɔ bolo, k’a kɔnɔkow ɲɛfɔ a ye kuma surun na. Cɛ y’a ɲininka ko: “I si hakɛ ye joli ye?” A ko: “Wolonwula.” A balala cɛ la ka dennin ye a ka se ka sɛbɛn jira cogo ɲɛnama na ten. A nana kɛ ko cɛ tun ka dɔgɔ tuma min na, jɛɲɔgɔnya tun b’a ni Jehowa Seerew cɛ, nka o waati la, a tun ma tiɲɛ minɛ ɲɛnamaya sira ye n’a sɛbɛ ye. Dɔɔnin dɔrɔn o kɔfɛ, Bibulu kalan dɔ daminɛna cɛ, a muso n’a denmuso kun.
10 Funankɛnin caman ye weleweledalaw ye kaban, wa, n’u bɛ baara kɛ an fɛ foro baara la, an bɛ u ka jɛɲɔgɔnya diyabɔ. O funankɛninw bɛ se k’u filanw bila wale la, ka dusu don u kɔnɔ. Nka, Awirilikalo ye waati bɛnnen fana ye denbaya kelen-kelen bɛɛ kɔnɔmɔgɔw fɛ walasa u k’u cɛjuru kologɛlɛya, ka ɲɔgɔn sabati alako ta fan fɛ tuma min na u bɛ jɛ ka baara kɛ ɲɔgɔn fɛ baara senuma na. Dutigiw de kan k’u ka denbaya ɲɛminɛ o la.—Nta. 24:27.
11 I ka mɔgɔ kuraw dɛmɛ: I bɛ Bibulu kalan kɛ mɔgɔ kura minnu kun, a bɛ cogo di olu ko la? Yali olu fana bɛ se ka dɔ kɛ cɛsiri kɛrɛnkɛrɛnnen na nin Awirilikalo la wa? U ye min kalan Dɔnniya gafe masalakun 2, dakun 22 la, walima masalakun 11 dakun 14 na minkɛ, laala u y’u ŋaniya jira k’o fɛn kalannen fɔ mɔgɔ wɛrɛw ye. N’i bɛ ɲini ka se gafe laban ma, i labɛn ka kuma o ko kan ka jɛya tuma min na i bɛ masalakun 18, dakun 8 kɛ, n’o ye ko: ‘I ye min kalan, a dɔ rɔ, i kɔrɔtɔlen bɛ ka o lakali i baramɔgɔw an’i teriw ni mɔgɔ wɛrɛw ye. Laala i b’o kɛ kaban yɛrɛ iko Yesu cogo, o min tun bɛ kibaru duman fɔ mɔgɔ wɛrɛw ye ɲɔgɔnbɛnw senfɛ. (Luka 10:38, 39; Yuh. 4:6-15) Sisan, i ŋaniya ye ka dɔ fara o kan.’ Yali a bɛ ten fana mɔgɔw fɛ, i bɛ minnu kalan wa?
12 Yali i ka kalanden dalen bɛ Ala ka kuma na wa? Yali a bɛ Bibulu sariyakolow labato wa? A y’a ka ɲɛnamaya kɛcogo bɛn Ala ka namuw ma wa? A bɛ jɛkulu lajɛw matarafa wa? Yali a b’a fɛ ka baara kɛ Jehowa Ala ye wa? N’o don, mun na i tɛna dusu don a kɔnɔ a ka kuma maakɔrɔw fɛ walasa u ka se k’a lajɛ n’a bɛ cogow dafa ka kɛ weleweledala batisebali ye, ka baara kɛ i fɛ fana Awirilikalo la? (Notre Ministère gafe ɲɛw 98-100 lajɛ.) Jehowa ka jɛkuluba bɛna a kɔkɔrɔdon cogo min na a ka cɛsiriw la walasa a ka baara kɛ Jehowa ye, a bɛ se ka fɔlɔ k’o dɔn.
13 Tiɲɛ don ko ɲɛtaa ko la, kalanden dɔw ka teli ni dɔw ye. O la sa ka kɛɲɛ ni ɲɛbilakumaw ye min bɛ san 2000 Zuwɛnkalo An ka Masaya Cidenyabaara ɲɛ 4 na, a dakunw 5-6 la (nka ɲɛ 8 na Togo ni Kameruni bɔkow la), caman ye gafe filanan kalan kɛ mɔgɔw kun, mɔgɔ minnu tun ye magojira kɛ ka tɛmɛ, nka n’u mago tun bɛ dɛmɛ wɛrɛ la walasa u ka se ka fara an kan baara la. An jigi ka kɛ a kan tuma bɛɛ ko “a kɛra waati surun ko ye wo, walima waati jan ko ye” wo, k’o mɔgɔ kɔnɔnajɛlenw bɛna kɛ Krista ka kalanden lakikaw ye. (Kɛw. 26:29, NW) O la sa, i ye kalow da min kɛ k’o mɔgɔ suguw kalan, n’a bɛ se ka fɔ o ma ko “waati jan,” yali nin Hakilijigin don waati tɛna kɛ waati ɲuman ye o kalandenw bolo u k’u ka waleɲumandɔnba jira Krista ka kunmabɔsara ko la wa?
14 U bɛ dɛmɛ cogo min na walasa ka wajuli kɛ: Ka ɲɛsin kalandenw ma minnu bɛ cogow dafa walasa ka wajuli daminɛ, an bɛ se ka caman dege Yesu ka mɔgɔw degecogo fɛ n’an b’a lajɛ a tun b’a kɛ cogo min na. A ma jama ye dɔrɔn k’a fɔ a ka cidenw ye k’u ka kuma daminɛ. A y’i sinsin fɔlɔ wajulibaara nafa kan, ka tila ka dusu don u kɔnɔ u ka delili kɛ, o kɔ, ka fɛnba saba di u ma: baarakɛɲɔgɔn, wajulikɛyɔrɔ, ani ci min ka kan ka fɔ. (Mat. 9:35-38; 10:5-7; Mar. 6:7; Luka 9:2, 6) I bɛ se k’o ɲɔgɔn kɛ. O la sa, a bɛna kɛ ko bɛnnen ye i ka cɛsiri kɛrɛnkɛrɛnnen kɛ walasa ka tugu nin kuntilennaw nɔfɛ, n’i bɛna i woloden dɛmɛ tuma min na, walima kalanden kura dɔ, walima mɔgɔ wɛrɛ min ma baara si dantigɛli kɛ waati dɔ kɔnɔ:
15 A nafa jira: Wajulibaara nafa da o tigi hakili kan cogo ɲuman na. Walasa k’a jira a la jɛkulu bɛ ka baara min kɛ, ko kɛlen minnu sɔrɔla cidenyabaara la, i k’olu fɔ a ye. Yesu ye hakilila min jira Matiyu 9:36-38 la, i yɛrɛ fana k’o dankɛnɛmaya. Ka ɲɛsin mɔgɔ walekɛbali dɔ ma, walima mɔgɔ dɔ ma min bɛna kɛ weleweledala ye, dusu don a tigi kɔnɔ a ka Ala deli a yɛrɛ ka wajulibaara ko la, ani baara ɲɛtaa ko la diɲɛ kɔnɔ.
16 A tigi bila a ka miiri wajuli sira sugu caman na: A fɔ a ye ko a bɛ se k’a ka gafe kalan kulu kɔnɔmɔgɔw kunbɛn walasa ka wajuli kɛ du-ni-du. A jira a la k’a bɛ se ka baro kɛ a balimaw n’a dɔnbagaw fɛ, walima k’a bɛ se ka kuma a baarakɛɲɔgɔnw walima a kalandenɲɔgɔnw fɛ lafiɲɛwaati la tile fɛ. A bɛ se ka baro daminɛ mɔgɔ wɛrɛ fɛ foroba bolifɛn kɔnɔ n’a b’i mago don mobili kɔnɔmɔgɔw la. N’an y’a bɔ an yɛrɛ la ka kuma, tuma caman na o bɛ sira dayɛlɛ an ye ka seereya ɲuman kɛ. Tiɲɛ na cogo caman b’an bolo k’an jigiya fɔ tɔw ye “don o don.”— Zab. 96:2, 3.
17 O n’a ta o ta, n’a bɛ se k’a kɛ dɔrɔn, a ka fisa e ani weleweledala kura ma, aw ka baara kɛ ɲɔgɔn fɛ du-ni-du. N’i ye kuntilenna sigi ka dɔ fara i ka baara kan Awirilikalo kɔnɔna na, balimakɛ min bɛ wajulikɛyɔrɔw karati dili kunna, o ɲininka ni wajulikɛyɔrɔ bɛnnen dɔ bɛ sɔrɔ. N’a bɛ sɔrɔ, o bɛna cogow d’i ma i k’o baara ka ɲɛ. Misali la, a bɛ se ka kɛ k’i tilalen kɔ baara la, walima k’i to mobili kɔnɔ yɔrɔ wɛrɛw taali la, walima lajɛw taali n’a seginni na. O tuma na, i b’a ye ko mɔgɔ bɛ so dɔ kɔnɔ, mɔgɔ si tun tɛ min na fɔlɔ, walima i bɛ yɔrɔ dɔ ye magojira tun kɛra yɔrɔ min na. N’a bɛnnen don, bɔnye surun dɔ kɛ a kɛwaati la. O ko kɛli bɛna kɛ i bolo nisɔndiya sababu ye cidenyabaara la, katuguni i y’i ka baara dɔ kɛ k’a dafa.
18 Kuma labɛn min bɛna diya mɔgɔ ye: Ka kɛ a fɛ ka Masaya cikan fɔ, o ye fɛn dɔ ye, nka ka da i yɛrɛ la o fɔcogo la n’i ye kura ye o la, walima n’i m’o kɛ waati jan kɔnɔ, o ye fɛn dɔ wɛrɛ fana ye. Ka waati kɛ ka mɔgɔ kuraw ni walekɛbaliw dɛmɛ walasa u k’u labɛn, o ye waati kɛcogo nafama ye. Baara ka Lajɛw ani forobaara lajɛw bɛ se ka hakilila di minnu bɛ mɔgɔ dɛmɛ. Nka fɛn si tɛ yen min bɛ se ka bila yɛrɛlabɛn nɔ na.
19 I bɛ se ka mɔgɔ kuraw dɛmɛ u k’u labɛn baara kama cogo jumɛn na? Sɔn-ni-sɔn gafenin bɛ jira cogo min na, i ka daminɛ n’o ye. O jiracogo ka kan ka kɛ fɛn nɔgɔn ye, min ka surun fana. Mɔgɔ kuraw ɲininka u ka miiri kow ma minnu bɛ kibaruyaw kɔnɔ, n’u ye wajulikɛyɔrɔ mɔgɔw haminakow ye. O kɔfɛ, yɔrɔ dɔ jira sɔn-ni-sɔn gafenin kuraw kɔnɔ min b’o ko ɲɛfɔ. Aw k’o ɲɛjirali kɛ ɲɔgɔn fɛ. O kɔ dɔrɔn, aw ka baara kɛ n’o ye cidenyabaara la.
20 An ka dɔ fara an sekow kan yiriwali kama ka ɲɛsin sini ma: Mɔgɔ minnu nana salon Hakilijigin lajɛ la, olu tun ka ca ni mɔgɔ miliyɔn 14 ani ba kɛmɛ 8 ye diɲɛ bɛɛ kɔnɔ. Weleweledalaw hakɛ min jatera, o tun ka ca ni miliyɔn wɔɔrɔ ye. O kɔrɔ ye ko mɔgɔ miliyɔn seegin ani ba kɛmɛ seegin ɲɔgɔn ye magojira kɛ fo u nana o lajɛ kɛrɛnkɛrɛnnen na. U ye Bibulu kalansirabaw dɔ la kelen ɲɛfɔli lamɛn o yɔrɔ la. I b’a sɔrɔ u ye dɔw dɔn an cɛma, n’o ye nɔ bila u la cogo ɲuman na. O mɔgɔw la, caman bɛ kuma ɲuman fɔ an kan, k’u niyɔrɔ di diɲɛ baara kama, k’an lafasa fana mɔgɔ wɛrɛw ɲɛ na. O mɔgɔ bɛɛ lajɛlen ye kuluba ye min bɛna se ka fara an kan don nataw la. An bɛ se ka mun kɛ walasa k’u dɛmɛ u ka dɔ fara u ka ɲɛtaa kan?
21 Mɔgɔ kuraw fanba minnu nana Hakilijigin na, u y’o kɛ bawo an dɔ la kelen de y’u wele o la. Tuma caman i b’a sɔrɔ u bɛ mɔgɔ kelen ɲɔgɔn dɔn lamɛnbagaw cɛma. N’an ye mɔgɔ dɔ wele, n’o tigi nana, a wajibi b’an kan k’a kunbɛn koɲuman, k’a dɛmɛ a ka nafaba sɔrɔ kalan na. Ikomi so kɔnɔna bɛna fa, a dɛmɛ a ka sigiyɔrɔ dɔ sɔrɔ. I ka Bibulu singa a ma, ka dɔnkilida gafe lajɛ ɲɔgɔn fɛ. A bɛ se ka ɲininkali o ɲininkali kɛ, i k’olu jaabi. I bɛ magodon sɛbɛ min kɛ ka ɲɛsin a ma, o de bɛ se ka kɛ kunba ye min bɛ dɔ fara a ka magojira kan. A jɛlen don ko n’an ye mɔgɔ dɔ ye an tɛ min dɔn ka kɔrɔ, a wajibi b’an kelen-kelen bɛɛ kan k’o tigi kunbɛn ni nisɔndiya ye, ka kuma damadɔw fɔ a ye walasa an ka ɲɔgɔn dɔn.
22 Ka ye Hakilijigin lajɛ kɛnɛkan, o bɛ se ka nɔ ɲɛnama bila mɔgɔ dɔ miiricogo la. A nali lajɛ la, o bɛ se ka jira ko a bɛ min ɲinina, a m’o sɔrɔ yɔrɔ si la fɔlɔ. O bɛ se fana k’a jira k’an bɛ fɛn dɔ fɔr’a ye, a ka jate la, a ka kan ka min sɛgɛsɛgɛ kosɛbɛ tun. Fɛɛrɛ ɲumanba min tigɛra, n’o ye kunmabɔsara ye, o ɲɛfɔli bɛ se k’a to mɔgɔ dɔ ka Jehowa ka kanuya dɔn, dan tɛ kanuya min na, n’a tun tɛ fosi dɔn o ko la fɔlɔ. A bɛ se k’a ye ko an ni tɔw tɛ kelen ye, k’an kɔnɔ jɛlen don, k’an bɛ teriya sama mɔgɔ fɛ, k’an bɛ mɔgɔ kanu, k’an bɛ mɔgɔ bonya fana. A bɛ se ka jaw ni laada fu minnu ye egilisiw kɔnɔna na, u bɔlen tɛ cogo si la an ka Masaya Sow fɛ. Mɔgɔ kuraw bɛ se k’a kɔlɔsi ko mɔgɔ minnu bɛ lamɛnbagaw cɛma fana, k’olu jɔyɔrɔ tɛ kelen ye diɲɛ kɔnɔ, ko wari fana tɛ ɲini mɔgɔ fɛ. O kow yeli bɛ se ka kɛ sababuba ye walasa a ka segin ka na ko kura.
23 Hakilijigin kɔfɛ, mɔgɔ ka kan ka to baara sen kan walasa mɔgɔ kura minnu nana, olu kelen-kelen bɛɛ ka dɛmɛ sɔrɔ. N’i ye mɔgɔ kuraw wele Hakilijigin na, wajibi kɛrɛnkɛrɛnnen b’i kan. Sanni u ka taa, lajɛ minnu bɛ kɛ Masaya So kɔnɔ, i k’u ladɔnniya o la. Foroba jɛmu nata kumakun fɔ u ye. Jɛkulu ka Gafe Kalan min ka surun u ka so la kosɛbɛ, o yɔrɔ n’o kɛwaati fɔ u ye. O kɔ, Créateur gafe di u ma, k’a fɔ u ye ko Awirilikalo tile 30 dɔgɔkun barokun ye nin ye: “Ce qu’un livre peut vous apprendre sur le Créateur” (Kitabu bɛ se k’an kalan min na Dabaga ko la). (Créateur gafe tɛ sɔrɔ yɔrɔ min na, i ka baara kɛ yen ni gafe wɛrɛ ye.) Kun min na jɛkulu mumɛ bɛɛ labɛnnen bɛ ka taa jamalajɛ la, n’o bolodara ka kɛ yan ni dɔɔnin cɛ, i k’o ɲɛfɔ.
24 I labɛn ka teriya bɔnye dɔ kɛ u bara. I k’a jɛya a la ko sɛbɛnw b’u bolo minnu bɛna u dɛmɛ ka Bibulu kalansirabaw dɔn, n’o sɛbɛnw ye Wajibiya gafenin ni Dɔnniya gafe ye. N’u tɛ ka Bibulu kalan kɛ fɔlɔ, Bibulu kalan kofɔ u ye. A jira u la k’u bɛ se ka Les Témoins de Jéhovah gafenin kalan (n’o tɛ yen Unis pour faire la volonté de Dieu gafenin) min bɛ hakilila jɛlen di u ma an ka jɛkuluba labɛncogo kan. U wele u k’an ka Toute la communauté de nos frères videyow lajɛ (n’o fana tɛ yen, u ka Unis grâce à l’enseignement divin kasɛti lajɛ o nɔ na). I ka fɛɛrɛ kɛ walasa u ni jɛkulu mɔgɔ wɛrɛw ka ɲɔgɔn ye. Kalo nataw kɔnɔna na, i ka to ka taa bɔ u ye. U wele lajɛw la tuma min na kafo lakɔlɔsibaga bɛna bɔ jɛkulu ye, walima kafo jamalajɛ, walima don kɛrɛnkɛrɛnnen jamalajɛ bɛ kɛ tuma min na. Cogo di u ma k’a jira k’u yɛrɛ ‘labɛnnen don ɲɛnamaya banbali kama’.— Kɛw. 13:48.
25 Maakɔrɔw bɛ se ka min kɛ: Ka taɲɛ sɔrɔ cɛsiriba la cidenyabaara la Awirilikalo la, o bɛna bɔ kosɛbɛ maakɔrɔw la. N’i ye gafe kalan ɲɛminɛbaga ye, i bɛ se ka fɛn minnu kɛ walasa ka mɔgɔ kelen-kelen bɛɛ dɛmɛ i ka gafe kalan kulu la walasa a k’i sen don baara kɛrɛnkɛrɛnnenw na, i k’olu sɛbɛn. Yali funankɛnin, mɔgɔ kura, weleweledala basigibali, walima walekɛbali dɔ bilala i ka kulu la wa? A sɛgɛsɛgɛ walasa k’a dɔn ni bangebagaw, tutigɛbagaw, walima weleweledala wɛrɛw y’a bɔ u yɛrɛ la k’o mɔgɔw dɛmɛ. E yɛrɛ bɛ se ka dɛmɛ o dɛmɛ kɛ, i k’o kɛ. Balimamuso dɔ min tun kɛra weleweledala basigibali ye foro baara la san fila kɔnɔ, Awirilikalo tɛmɛnen na, a ye lɛrɛ min kɛ cidenyabaara la, o tun ka ca ni 50 ye. Mun nana n’o yɛlɛma ye? A k’o ye maakɔrɔw ka dɛndɛnni bɔnyew ye minnu y’a sabati.
26 Maakɔrɔw ni cidenyabaara magannaw ka kan ka baara kɛ ɲɔgɔn fɛ walasa k’a dɔn ni wajulikɛyɔrɔw, sɔn-ni-sɔn gafeninw, ni sɛbɛnw caman bɛ yen minnu bɛ bɔli kɛ kalo nata baara kama. Yali foro baara lajɛ dɔ wɛrɛw bɛ se ka boloda wa? N’a bɛ ten, lajɛ kɛrɛnkɛrɛnnen minnu bolodara, olu ka fɔ. Ka fara o bɛɛ kan, i ka jama deliliw, n’i ka kelenna deliliw la, a ɲini Jehowa fɛ a ka barika don an ka kalo baara la, n’o ye baaraba kalo ye Masaya baara la.—Rom. 15:30, 31; 2 Tes. 3:1.
27 Salon Awirilikalo la, jɛkulu dɔ la maakɔrɔw ye baaraba dusu don kosɛbɛ weleweledalaw kɔnɔ cidenyabaara la. Lajɛw la, dɔgɔkun o dɔgɔkun, u tun b’a ɲini weleweledalaw fɛ u k’a lajɛ delili kɔnɔ n’u tun tɛ se ka kɛ tutigɛbaga farankanw ye. Ko kelen-kelen bɛɛ la, cidenyabaara magannaw bɛɛ ani maakɔrɔw bɛɛ tun b’a fɔ ni nisɔndiya ye ko ka Awirilikalo kɛ kalo bɛɛ la fisaman ye. O nɔ kɛra min ye, o ye ko kɛmɛ o kɛmɛ na weleweledala 58 kɛra tutigɛbagaw ye o kalo la, maakɔrɔw ni cidenyabaara maganna bɛɛ tun b’o la.
28 Nisɔndiya min b’a la ka baara sɛbɛkɔrɔ-kɛ: Duba jumɛn b’a la ka ‘baara kɛ kosɛbɛ, k’an sɛbɛkɔrɔ-jija’ cidenyabaara la? (1 Tim. 4:10, NW) Ka ɲɛsin u ka jɛkulu ka kisɛya baara ma Awirilikalo tɛmɛnen na, maakɔrɔ minnu kofɔra sanfɛ la la, u y’a sɛbɛn ko: “Balimakɛw ni balimamusow b’a fɔ siɲɛ caman ko kabini tuma min na u y’a daminɛ ka baara kɛ kosɛbɛ foro cidenyabaara la, u y’a ye k’u kanuya bonyana kosɛbɛ ka ɲɛsin ɲɔgɔn ma, k’u surunyara ɲɔgɔn na kosɛbɛ tun.”
29 Awirilikalo tɛmɛnen na, an balimakɛ funankɛ lujuratɔ dɔ tun y’a ŋaniya k’a ta kɛ baara kɛrɛnkɛrɛnnen na o kalo la. A ye dɛmɛ min sɔrɔ ka bɔ a ba yɔrɔ an’an balimakɛw ni balimamusow fɛ, ka fara waati bolodacogo ɲuman kan, a sera ka tɔnɔ bɔ o kalo la a kɛlen tutigɛbaga farankan ye. A ye mun miiri o ko la? A ko: “A siɲɛ fɔlɔ de kɛra nin ye n ka ɲɛnamaya kɔnɔ ne ka n yɛrɛ ye iko cɛ barikama dɔ.”
30 Mɔgɔ minnu bolo bonyaba don ka kuma Jehowa ka Masaya ko la, siga si t’a la ko Jehowa bɛ duba kosɛbɛ o mɔgɔw ye. (Zab. 145:11, 12) N’an bɛ k’an ka Matigi ka saya hakilijigin kɛ, an b’a faamu ko ka nɔrɔ Ala la, o bɛ na ni duba minnu ye, olu bɛna caya ka t’a fɛ don nataw la. Ciden Pol tun samanɛn bɛ kosɛbɛ baraji nɔfɛ, n’o ye ɲɛnamaya banbali ye. Nka, a tun b’a dɔn k’o tɛ fɛn ye a tun bɛ se ka sigi dɔrɔn ka min kɔnɔ k’a sɔrɔ a ma fosi kɛ, k’a jigi da o kan ten. A y’a sɛbɛn ko: ‘O de kosɔn ne bɛ baara kɛ kosɛbɛ ka n sɛbɛkɔrɔ-jija ka kɛɲɛ n’a ka baara kɛcogo ye min bɛ baara kɛ ne kɔnɔ ni sebagayaba ye.’ (Kol. 1:29, NW) Yesu sababu fɛ, Jehowa ye fanga di Pol ma walasa a ka cidenyabaara kɛ min bɛ mɔgɔw kisi. A bɛ se k’o ɲɔgɔn fana kɛ an ye bi. Yali e fana bɛna o ɲɔgɔn dɔn nin Awirilikalo la wa?
[Box on page 3]
E bɛ se ka dusu don jɔn kɔnɔ ka wajuli kɛ Awirilikalo la?
I den wa?
Bibulu kalanden dɔ wa?
Mɔgɔ dɔ min kɛra walekɛbali ye wa?