Bangebagaw, a’ ye kɛwale ɲumanw don aw denw jogo la
1 Delinako ɲumanw tɛ na u yɛrɛma ten, wa, u tɛ bala ka kɛ mɔgɔ la. Ka kɛwale ɲumanw don denw jogo la, o bɛ waati ta. Ka bɔ Angilɛkan na, daɲɛ min bayɛlɛmana bamanankan na k’a kɛ “k’a don” ye, o kɔrɔ ye ka fɛn “di dɔɔnin-dɔɔnin,” walima “ka kɛ sababu ye a ka don dɔɔnin dɔɔnin iko ni ji bɛ ka toni-toni.” O la, timinandiya wajibiyalen bɛ bangebagaw ma walasa u k’u denw ‘lamɔ ni Jehowa ka kololi n’a ka laadiliw ye.’—Efe. 6:4.
2 Ãw k’o daminɛ kabini u denmisɛnma: Denmisɛnninw bɛ se ka ko kuraw dege cogo min na, ani k’u kɛ, o ye kabako ye. K’a sɔrɔ a ka gɛlɛn tuma caman balikuw bolo ka kan kura dɔ dege, denmisɛnnin minnu ma se lakɔli taa ma fɔlɔ, olu bɛ se ka kan fila, walima saba dege ɲɔgɔn fɛ. I kana miiri abada k’i den ka dɔgɔ kojugu fɛnw degeli ma minnu bɛna kɛ a bolo delinako ɲumanw ye. Ni Bibulu tiɲɛ kumaw degeli bɛ daminɛ joona, ani n’o bɛ t’a ɲɛ, san damadɔw kɔnɔ den hakili bɛna fa ni dɔnniya ye min bɛna ‘hakilitigiya di a ma walasa a ka kisi.’—2 Tim. 3:15.
3 Aw ka foro baara kɛ aw delinako ɲuman dɔ ye: Kɛwale ɲuman min ka kan don den jogo la a ka degeli sanw kɔnɔna na, o ye Ala ka Masaya kibaru duman wajuli baara kɛli ye tuma bɛɛ. Bangebaga caman b’o daminɛ tuma min na u denw ka dɔgɔ. U b’u ta u fɛ du-ni-du baara la. Ni bangebagaw sen bɛ wajuli baara la tuma bɛɛ, o bɛ kɛ sababu ye denw ka dɛmɛ sɔrɔ walasa u ka nafa don cidenyabaara la, ani k’u timinandiya o la. Bangebagaw bɛ se k’a jira u denw na u bɛ se ka seereya kɛ foro baara ɲɛ kelen-kelen bɛɛ la cogo min na.
4 Denmisɛnninw tɔgɔ sɛbɛnni Ala-ka-marako Cidenyabaara Kalan na, o bɛ u dɛmɛ fana. O kalan b’u dege u ka kɛcogo ɲumanw sɔrɔ kalan na, ka kalanjɛ kɛ ni faamuyali ye. Baro bɛ kɛ cogo min na Bibulu kan, ani segin-ka-bɔnyew ni Bibulu kalan bɛ ɲɛminɛ cogo min na, o kalan bɛ u dege o fɛnw na. O degeli sugu bɛ se k’u bila u ka kɛ tutigɛbagaw ye, ka bonya kɛrɛnkɛrɛnnen wɛrɛw sɔrɔ baara la. Nisɔndiya bɛ Bɛtɛldenw ani tungafɛciden caman na n’u hakili bɛ jigin u ka Ala-ka-marako Kalan daminɛ tuma na. U bɛ o mafilɛ iko fɛɛrɛ min y’u dɛmɛ ka dege kɛcogo ɲumanw na.
5 An bɛɛ bɛ iko bɔgɔ Dagadilanna Jehowa bolo. (Esa. 64:8) Ni bɔgɔ kɛnɛ don kosɛbɛ, a baara ka nɔgɔ kosɛbɛ fana. Nka ni bɔgɔ bɛ ka ja ka t’a fɛ, a baara fana bɛ gɛlɛya ka t’a fɛ. A bɛ ten fana mɔgɔ ko la. N’u ka dɔgɔ tuma min na, u latilenni ka nɔgɔ kosɛbɛ, wa, n’u si ka dɔgɔ kosɛbɛ, o baara bɛ nɔ min to, o fana bɛ fisaya kosɛbɛ. U denmisɛnma de ye u dege waati ye, sanni u ka kɔgɔlenya sɔrɔ koɲuman walima kojugu kama. I n’a fɔ bangebaga minnu b’u mago don u denw na, aw k’a daminɛ joona ka kɛwale ɲumanw don aw denw jogo la Krecɛn cidenyabaara ko la walasa u ka kɛ u delinakow ye.