An ka Kibaru Duman wajuli kɛ ni daŋaniyaba ye

¹  San kɛmɛ fɔlɔ daminɛ na, Yesu ye ci bila a nɔfɛmɔgɔw kan u ka Masaya kibaru duman wajuli kɛ, ka “siya bɛɛ kɛ kalandenw ye.” (Matiyu 24:14; 28:​19, 20) Jehowa Seerew y’o cikan in ta u sɛbɛ la, fo san kɛmɛ 20 nan laban na, an ka Krecɛn balimaya kɔnɔ, an cayara ni kalandenw 5 600 000 ye jamana 234 na. O ye tanuniba ye dɛ an sankolola Fa ma!

² An donna sisan san kɛmɛ 21 nan na. An Kɛlɛɲɔgɔn b’a ɲini k’an ka baara fɔlɔ bali, n’o ye Masaya wajuli ni kalanden kɛli baara ye. A bɛ baara kɛ ni fɛn minnu ye walasa k’an hakili sonya, k’an ka waati ta, ani k’an barika ban, o ye digiliw ye diɲɛ bɛ minnu da an kan, an haminakow, ani ko wɛrɛ minnu nafa man bon kosɛbɛ. Sanni an ka to diɲɛ k’a fɔ an ye fɛn min nafa ka bon diɲɛlatigɛ la, a ka jɛya an yɛrɛ bolo Ala ka kuma fɛ ko ka Jehowa sago kɛ, o de nafa ka bon ni fɛn bɛɛ ye. (Rom. 12:⁠2) O kɔrɔ ye ka tugu Sɛbɛnniw ka kuma na ka ‘Ala ka kuma fɔ tuma bɛnnen ni tuma bɛnbali la, k’i ka baara kɛ k’a dafa.’​—⁠2 Tim. 4:​2,5

³ Daŋaniyaba labonya i la: Krecɛnw cogo ka kan ka kɛ nin ye: “U dafalen jɛyalen ka to Ala sago ko bɛɛ la.” (Kol. 4:12) “Daŋaniya” ye daɲɛ ye min b’a jira ko “mɔgɔ dɔ dalen bɛ kosɛbɛ fɛn dɔ la, walima k’a jɛyalen bɛ kosɛbɛ fɛn dɔ la, walima k’a bɛ cogo la iko mɔgɔ daŋaniyalen.” Ikomi an ye Krecɛnw ye, an ka kan ka da mun na, walima ka daŋaniya mun ko la? Ko Ala ka kiraya kuma jɛlen don, wa k’an ni waati laban ka surun kosɛbɛ sisan. I n’a fɔ ciden Pol, an ka kan ka da a la kosɛbɛ fana ko kibaru duman ye “Ala ka sebagaya ye ka dannabaa bɛɛ kisi.”​—⁠ Rom. 1:⁠16.

⁴ Mɔgɔ juguw ni mɔgɔ lafilibaga minnu lafililenw don, Sitanɛ bɛ baara kɛ n’olu ye walasa u ka nɔ bila tɔw la, k’u lafili. (2 Tim. 3:13) Ikomi an lasɔmina o la, an bɛ fɛɛrɛw tigɛ walasa ka dɔ fara an ka daŋaniya kan, n’o ye ko an ta de ye tiɲɛ ye. Sanni an ka to diɲɛ jɔrɔnankow ka dɔ bɔ an ka timinandiya la, an ka t’a fɛ ka Masaya ka nafaw bila jɔyɔrɔ fɔlɔ la. (Mat. 6:​33, 34) An kana miiri fana ko an ni diɲɛ laban tɔ ka jan. Laban surunyara. (1 Piɛ. 4:⁠7) Seereya min kɛra jamana dɔw la kaban, n’an y’o jateminɛ, a bɛ kɛ an kɔnɔ ko kibaru duman ma nafaba sɔrɔ. Nka, lasɔmini baara ka kan ka t’a fɛ.​—⁠ Eze. 33:​7-9.

⁵ An ka waati janfalen in na, ɲininkaliba minnu bɛ yen, u ye ninnu ye: ‘Yesu ye ci min fɔ, n’o ye ka kalandenw kɛ, yali n y’o ci ta n sɛbɛ la wa? Ni n bɛ ka kibaru duman fɔ, yali n b’a jira ko n daŋaniyalen b’a la tigitigi ko Masaya ye ko lakika ye wa? Yali n jɔlen b’a kan ka baaraba kɛ o kisili baara in na ka kɛɲɛ ni n seko ye wa?’ Ikomi an b’a dɔn k’an ni waati laban ka surun kosɛbɛ, an ka kan k’an jan to an yɛrɛ la, an ka wajuli baara la, ani kalandenw kɛli baara la. N’an y’o kɛ, o bɛna an kisi. Mɔgɔ minnu b’an lamɛn, o bɛna olu fana kisi. (1 Tim. 4:16) Ikomi an ye cidenyabaarakɛlaw ye, an bɛ se ka dɔ fara an ka daŋaniya kan cogo di?

⁶ An ka Tesalonikekaw ladege: K’a to a hakili bɛ a balimakɛw ka baara la minnu bɛ Tesalonike, Pol y’a fɔ u ye ko: “An ka kibaru duman ma se aw ma kuma gansan na, nka a sera aw ma sebagaya fana na ani Ni (“hakili”, NW) Senu na, an jɛyalen tun bɛ a la. An kɛra aw cɛma cogo min na aw kosɔn aw yɛrɛ y’a dɔn. Aw kɛra an ladegebagaw ye ani Matigi ladegebaga fana ye, k’a masɔrɔ aw sɔnna Ala ka kuma ma tuma min na, aw tɔɔrɔla o kosɔn kojugu. Hali o, aw nisɔndiyara kosɛbɛ hakili senu barika la.” (1 Tes. 1:​5, 6) Ɔwɔ Pol ye Tesalonikekaw ka jɛkulu fo k’a masɔrɔ u ye wajuli kɛ ni cɛsiri ani daŋaniyaba ye hali ni tɔɔrɔba tun b’u kan. Mun y’a to u sera k’o kɛ? O bɔra kosɛbɛ timinandiya ni daŋaniya la, u ye o minnu ye ciden Pol n’a baarakɛɲɔgɔnw na. O ye nɔ ɲuman bila u la. Cogo di ten?

⁷ Ciden Pol n’a taamaɲɔgɔnw ka ɲɛnamayaw y’a jira ko Ala ka hakili senu tun bɛ u kan, wa k’u tun bɛ min fɔ, k’u tun dalen bɛ o la n’u dusukun bɛɛ ye. Sanni u ka se Tesalonike, Pol ni Silasi ye tɔɔrɔba sɔrɔ Filipe. K’a sɔrɔ u kiri yɛrɛ ma tigɛ, u fila bɛɛ gosira, ka don kaso la, k’u senw don jirikuru fana na, min dilankun tun ye ka mɔgɔw ɲangi. Hali k’a sɔrɔ u ye nin kɔrɔbɔli in sɔrɔ, o ma dɔ bɔ u ka timinandiya la kibaru duman ta fan fɛ. Ikomi Ala y’a sen don a ko la, o de y’a to u bilala. O de fana nana ni kasokɔlɔsila n’a ka denbaya ka yɛlɛmali ye, ka sira fana dayɛlɛ walasa o balimakɛw ka t’a fɛ u ka cidenyabaara la.​—⁠ Kɛwalew 16:​19-34.

⁸ Ala ka hakili senu barika la, Pol tun nana Tesalonike. O yɔrɔ la, a ye baara kɛ walasa k’a yɛrɛ ta, wa k’a yɛrɛ di kosɛbɛ fana tiɲɛ kalanni baara ma Tesalonikekaw ye. A ma kibaru duman fɔli dabila ko kelen kelen bɛɛ la. (1 Tes. 2:⁠9) Pol ye wajuli kɛ ni daŋaniyaba ye. O ye nɔba bila o yɔrɔ mɔgɔw la fo u dɔw y’u ka bolibato diinɛ kɔrɔ bila, k’a kɛ Jehowa, Ala lakika ka baarakɛlaw ye.​—⁠ 1 Tes. 1:​8-10.

⁹ Tɔɔrɔ ma dannatigi kuraw bali u ka kibaru duman wajuli kɛ. Ikomi u tun kisɛyara u ka dannako kuraw fɛ, wa k’u tun daŋaniyalen b’a la fana ko duba banbaliw tun bɛna kɛ u ta ye, o fɛnw ye Tesalonikekaw bila u ka tiɲɛ weleweleda. U tun sɔnna o tiɲɛ ma ni nisɔndiyaba ye. O jɛkulu ye baara kɛ fo u ka limaniya n’u ka timinandiya kibaru nana se Maseduwane yɔrɔ dɔw la ani Akayi yɛrɛ la. O de y’a to tuma min na Pol y’a ka bataki fɔlɔ ci Tesalonikekaw ma, u ka baara ɲumanw tun dɔnnen don kaban. (1 Tes. 1:⁠7) U kɛra misali ɲumanba ye dɛ!

¹⁰ Ala kanuya ni mɔgɔw kanuya de b’u bila wale la: I n’a fɔ Tesalonikekaw, an bɛ se ka daŋaniyaba sɔrɔ cogo di bi n’an bɛ kibaru duman wajuli kɛ? Pol y’a sɛbɛn o ko la ko: “An hakili tɛ bɔ aw ka dannaya ka kɛwale la, ani aw ka kanuya baara la” (1 Tes. 1:​3, NW ) A jɛlen don ko kanuyaba tun b’u dusukun na ka ɲɛsin Jehowa Ala ma, ani mɔgɔw ma u bɛ minnu waju. O kanuya kelen de ye Pol n’a taamaɲɔgɔnw bila u kana dan ‘ka Ala ka kibaru duman dama di Tesalonikekaw ma, nka fo u yɛrɛ niw.’​—⁠1 Tes. 2:⁠8.

¹¹ O cogo kelen na fana, an ka kanuyaba ka ɲɛsin Jehowa ma, ani ka ɲɛsin an mɔgɔɲɔgɔn ma, o de b’an bila ka baaraba kɛ k’a dafa wajuli baara la, Ala y’o min di an ma ka kɛ. K’o kanuya sugu to an na, an b’a dɔn ko Ala ye sangatigiya min di an kelen kelen bɛɛ ma, o ye ka kibaru duman jɛnsɛn. Ala ye fɛn minnu bɛɛ kɛ an ye walasa ka na n’an ye “ɲɛnamaya sɛbɛ” yɔrɔ la, n’an taasira koɲuman o la ni waleɲumandɔn ye, o bɛna an bila k’o dakabanatiɲɛw fɔ tɔw ye. An yɛrɛw dara o tiɲɛw na n’an dusukun bɛɛ ye.​—⁠ 1 Tim. 6:⁠19.

¹² Ikomi an cɛsirilen de bɛ to wajuli la, kanuya min b’an na ka ɲɛsin Jehowa ma, ani ka ɲɛsin mɔgɔw ma, o ka kan ka bonya ka t’a fɛ. N’a kɛra ten, o bɛna dusu don an kɔnɔ ka dɔ fara an ka baara kan, da-ni-da baara la, ani seereya ɲɛ tɔw la minnu dira an ma. An bɛna cogow sɔrɔ kow fana na walasa ka senfɛ seereya kɛ an balimaw, an sigiɲɔgɔnw, ani an dɔnbagaw fɛ. An bɛ kibaru duman min fɔ mɔgɔw ye, hali n’u fanba bɛ se ka ban o la, hali n’u dɔw bɛna u cɛsiri ka Masaya weleweledali kɛlɛ, o bɛɛ n’a ta an bɛ nisɔndiya an kɔnɔ. Mun na? Bawo an b’a dɔn ko an y’an seko damajira kɛ walasa ka seereya kɛ Masaya ko la, ani ka tɔw dɛmɛ u ka kisi sɔrɔ. Jehowa bɛna duba an ye an ka cɛsiriw la fana walasa an ka mɔgɔ dusukun tilennenw sɔrɔ. Hali ni diɲɛlatigɛ digiliw b’an kan ka caya tuma min na, ni Sitanɛ b’a ɲini k’an ka nisɔndiya tiɲɛ, an bɛna se k’an ka daŋaniyaba n’an ka timinandiya mara walasa ka seereya kɛ tɔw ye. N’an kelen-kelen bɛɛ b’an seko kɛ, o bɛna kɛ sababu ye jɛkulu barikamaw ni jɛkulu cɛsirilenw ka sigi, i n’a fɔ Tesalonike ta.

¹³ An kana baara dabila abada kɔrɔbɔli la: N’an bɛ kɔrɔbɔli caman na tuma min na, an wajibiyalen don ka daŋaniya sɔrɔ. (1 Piɛ. 1:​6, 7) Yesu y’a fɔ ka jɛya a ka kalandenw ye ko n’u tugura a kɔ, ko ‘siyaw bɛna u kɔniya a tɔgɔ kosɔn.’ (Mat. 24:⁠9) Pol ni Silasi ye o ko sugu dɔn k’u to Filipe. Maana min ɲɛfɔlen bɛ Kɛwalew tilayɔrɔba 16 la, o b’a jira ko Pol ni Silasi filila kaso la, yɔrɔ min bɛ fo kasobon ɲɛkɔnɔna. U senw donna jirikuruw la. Tuma caman na kasobonba tun bɛ iko dukɛnɛ sugu dɔ, walima bɔlɔnbɔlɔnnin dɔ, bon misɛnnin caman da bɔlenw bɛ min kan k’a lamini. Yeelen ni fiɲɛ tun bɛ don o bon ninnu kɔnɔ. Nka Pol ni Silasi bilara bon min na, n’o tun bɛ fo kasobon ɲɛkɔnɔna na, yeelen tun tɛ don yen, wa fiɲɛ min bɛ don, o tun tɛ bɛrɛ fana ye. Pol ni Silasi bilara yɔrɔ jugu min na, o kasa tun bɛ bɔ, dibi ni funteni tun bɛ yen. U tun ka kan k’o kow bɛɛ kun. Yali i bɛ se ka miiri u ka dusukasi ma wa, u ye dusukasi min sɔrɔ k’a ye k’u senw donna jirikuruw la lɛrɛ caman kɔnɔ kasobon na, ani k’u kɔ bɔsilenw n’a jolimanw ye gosili fɛ?

¹⁴ Hali k’o kɔrɔbɔliw to sen na, Pol ni Silasi tora kantigiya la. Daŋaniya min tun bɛ u dusukun na, u y’o jira. O kɛra sababu fana ye walasa ka fanga di u ma ka baara kɛ Jehowa ye kɔrɔbɔli mana kɛ fɛn o fɛn ye. U ka daŋaniya ko jɛyalen don tilayɔrɔba 16 tilayɔrɔdennin 25 la, a fɔra o yɔrɔ min na ko Pol ni Silasi tun bɛ “Ala deli ka Ala tanuli donkili da.” Hali n’u tun bɛ kasobon ɲɛkɔnɔna na, u tun jɛyalen b’a la ko Jehowa sɔnna u la fo u tun y’u kan kɔrɔta ka donkili da fo o kasodenɲɔgɔn tɔw tun bɛ se k’u kan mɛn. Bi bi in na fana, an ka kan k’o daŋaniya sugu jira n’an ka limaniya bɛ ka kɔrɔbɔli caman kun.

¹⁵ Sendonbaga bɛ ka kɔrɔbɔli minnu da an kan, u ka ca. Dɔw ta ye tɔɔrɔ ye ka bɔ u ka denbaya yɔrɔ. An balima caman ni gɛlɛyaw bɛ ɲɔgɔn na sariya ko la. An bɛ se ka kɛlɛ sɔrɔ ka bɔ diinɛ mɔgɔ murutilenw yɔrɔ. Wariko hamiw ni dahirimɛ sɔrɔcogo fana jɔrɔ bɛ mɔgɔw la. Denmisɛnninw fana ka kan k’u filanw ka digiliw kun lakɔli la. An bɛ se k’o kɔrɔbɔli ninnu bɛɛ kun ka ɲɛ cogo di? An mago bɛ mun de la walasa ka daŋaniya jira?

¹⁶ An mago bɛ fɛn fɔlɔ min na, n’a jɔyɔrɔ ka bon ni fɛn bɛɛ ye, o ye ka teriyasira to an ni Jehowa cɛ, teriyasira min ka ɲi kosɛbɛ. Tuma min na Pol ni Silasi tun bɛ u ka kasobon kɔnɔna na, u ma o waati kɛ k’u makasi u ka cogo kan, walima k’u yɛrɛ hinɛ minɛ. O yɔrɔnin bɛɛ la, u y’u ɲɛsin Ala ma delili la, k’a tanu ni donkili ye. Mun na? Bawo teriyasira tun bɛ u n’u sankolola Fa cɛ, teriyasira min tun ka ɲi. U y’a faamu k’u tun bɛ ka tɔɔrɔ k’a sababu kɛ tilennenya ye, wa k’u ka kisi tun bɛ Jehowa de bolo.​—⁠ Zab. 3:⁠8.

¹⁷ N’an fana bɛ kɔrɔbɔli la, an ka kan k’an ɲɛsin Jehowa ma. Ikomi an ye Krecɛnw ye, Pol bɛ dusu don an kɔnɔ ko ‘fɛn o fɛn ko bɛ an na, k’an k’o ɲini Ala fɛ; ko Ala ka hɛrɛ min bɛ tɛmɛn mɔgɔw ka miiriliw bɛɛ kan, o na aw dusukunw ni aw ka miiriliw mara.’ (Fil. 4:​6, 7) A bɛ mɔgɔ dusu saalo k’a dɔn ko Jehowa tɛna an kelen to kɔrɔbɔliw la dɛ! (Esa. 41:10) N’an bɛ baara kɛ a ye ni daŋaniya lakika kɔni ye, Jehowa bɛ to an fɛ kudayi.​—⁠ Zab. 46:⁠7.

¹⁸ Walasa ka daŋaniya jira, fɛn nafama wɛrɛ min bɛ se k’an dɛmɛ, o ye k’an ɲɛgannen to Jehowa ka baara la. (1 Kɔr. 15:58) Pol ni Silasi filila kaso la bawo u tun ɲɛgannen don kibaru duman wajuli la. Yali u ye wajuli dabila ka sababu kɛ kɔrɔbɔliw ye wa? Ayi. K’u to kaso la, u taar’a fɛ ka wajuli kɛ. U bilalen kɔfɛ, u taara Tesalonike ka don Yahutuw ka Alabatoso kɔnɔ, ka ‘kuma Kitabu ko la, k’a ɲɛfɔ u ye k’a jɛya.’ (Kɛw. 17:​1-3) Ni dannayaba b’an na ka ɲɛsin Jehowa ma, n’an daŋaniyalen bɛ a la ko an ta de ye tiɲɛ ye, fɛn fosi tɛna se ka ‘an fara ka bɔ Ala ka kanuya la min bɛ an Matigi Krista Yesu la.’​—⁠Rom. 8:​35-39.

¹⁹ Daŋaniyaba misaliw an ka waati la: An ka waati fana na, misali ɲuman caman bɛ yen. I n’a fɔ Pol ni Silasi, o mɔgɔw ye daŋaniyaba jira. An balimamuso dɔ min kisira ka bɔ Auschwitz nimatɔɔrɔ daga la, a kumana an balimakɛw n’an balimamusow ka limaniya n’u ka daŋaniya yigiyɔgɔbaliw kan o yɔrɔ la. A ko: “Don dɔ la, ɲininkali kɛtuma dɔ senfɛ, jalatigi dɔ nana ne ma ni bolokurun ye. A pɛrɛnna ko: ‘An bɛna mun kɛ ni aw mɔgɔ ninnu ye? N’an y’aw minɛ, o tɛ aw jɔrɔ. N’an y’aw bila kaso la, o t’aw hami hali dɔɔnin. N’an y’aw bila nimatɔɔrɔ daga la, o t’aw kɔnɔgan. N’an y’aw ɲangi ni saya ye, aw jɔlen bɛ to iko ni fɛn fosi ma kɛ. An bɛna mun kɛ n’aw ye?’ ” An balimaw ye limaniya min sɔrɔ o cogo gɛlɛnw na, k’o ye, o bɛ dusu don mɔgɔ kɔnɔ kosɛbɛ dɛ! U y’u ɲɛsin tuma bɛɛ Jehowa ma walasa a k’u dɛmɛ k’o kow kun.

²⁰ An balimakɛ caman ye daŋaniya min jira siya kɔniya kɔnɔ san laban ninnu na, siga t’a la k’an hakili b’o la. Hali k’a sɔrɔ farati tun bɛ u ka kow la, an balimakɛ minnu ye ɲɛmɔgɔw ye, u y’u mago don balimakɛw ni balimamusow la walasa u ka balo hakili ta fan fɛ. U bɛɛ t’a fɛ ni daŋaniyaba ye ka da a la ko ‘kɛlɛkɛminɛn fɛn o fɛn dilanna u kama, ko nafa si tɛna kɛ u la.’​—⁠Esa. 54:⁠17.

²¹ An balimakɛw n’an balimamuso caman minnu furuɲɔgɔn tɛ Seere ye, olu fana ye limaniyaba ni muɲuliba jira. Ka bɔ Gadelupe, an balimakɛ dɔ ye kɔdonniba dɔ kun ka bɔ a furumuso yɔrɔ min tun tɛ Seere ye. Walisa k’a dusu faga, k’a bali ka taa lajɛw la, a tun tɛ tobili kɛ a ye, a tun t’a ka finiw kɔ, a tun t’u pase, wa fini minnu yɔrɔ dɔw tun faralenw don, a tun t’olu fana kala. Waati jan kɔnɔ a tun tɛ kuma a fɛ. Ikomi balimakɛ ye daŋaniyaba jira n’a dusukun bɛɛ ye ka baara kɛ Jehowa ye, k’a ɲɛsin a ma delili la walasa a k’a dɛmɛ, a sera k’o kow bɛɛ kun. Fo tuma jumɛn? Fo san 20 ɲɔgɔn, o min kɔfɛ a muso dusukun yɛlɛmana dɔɔnin dɔɔnin. O ko bɛɛ kɔfɛ, a sera ka nisɔndiya sɔrɔ bawo a muso sɔnna Ala ka Masaya jigiya la.

²² Walasa k’a laban, an kana ɲinɛ an balimakɛw n’an balimamusow funankɛw ka daŋaniyaba kɔ, minnu bɛ taa lakɔli la don o don, n’u ka kan k’u filanw ka digiliw ni ko wɛrɛw kun. Lakɔli ka digiliw ko la, Seere npogotiginin dɔ ko: “N’i bɛ lakɔli la, mɔgɔ kelen kelen bɛɛ b’a dusu don i kɔnɔ k’i muruti dɔɔnin. Lakɔlidenw b’i bonya ka t’a fɛ n’i bɛ fɛn dɔ kɛ min b’a jira k’i tɛ siran kuntigiw ɲɛ.” O ye digili ye funankɛw da la dɛ! U jɔlen ka kan ka to a kan k’u kologɛlɛya dusukun ni hakili la walasa ka kɔrɔbɔliw kun.

²³ An ka funankɛ caman sera k’u ka kantigiya mara kɔrɔbɔliw la. A misali dɔ ye an balimamuso funankɛ dɔ ye min sigilen bɛ Faransi. Don dɔ, tilelafana dumunen kɔfɛ, kamalennin dɔw y’a ɲini k’a diyagoya walasa k’a da susu, nka a ye Ala deli, a y’a kologɛlɛya fo kamalennin ninnu y’a to yen ka taa. Kɔfɛ, u dɔ la kelen seginna ka na, k’a fɔ a ye ko a ma dan si sɔrɔ a la ikomi a y’a jagɛlɛya. A sera ka seereya ɲuman di Masaya ko la. Jehowa ye sariyakolo kɔrɔtalenba minnu sigi mɔgɔw ye, mɔgɔ minnu b’a fɛ k’u niyɔrɔ sɔrɔ a ka dubaw la, a y’o fana ɲɛfɔ a ye. Lakɔli bɛ senna kalo minnu na, o kɔnɔna na a y’a ka dannakow ɲɛfɔ a ka kalasi kɔnɔmɔgɔw bɛɛ ye.

²⁴ O ye bonyaba ye dɛ ka se ka jate mɔgɔw fɛ, Jehowa bɛ nisɔndiya sɔrɔ ka mɔgɔ minnu ta walasa k’a sago fɔ ni daŋaniyaba ye! (Kol. 4:12) Ka fara o kan, cogo ɲumanba de b’an bolo k’an ka kantigiya jira tuma min na an b’an jugu ka kɔrɔbɔli kɔrɔ, n’a bɛ iko waraba, n’o ye Sitanɛ Sendonbaga ye. (1 Piɛ. 5:​8, 9) An kana ɲinɛ abada ko Jehowa bɛ baara kɛ ni Masaya cikan ye walasa ka na ni kisi ye an ma, an minnu b’a wajuli kɛ, ani mɔgɔw ma, mɔgɔ minnu b’an lamɛn. An ka ko latigɛlenw na, ani an ka don o don taamacogo la, an k’a jira ko an ye Masaya bila jɔyɔrɔ fɔlɔ la. An ka t’a fɛ ka kibaru duman wajuli kɛ ni daŋaniyaba ye.