E dun, yali i na ye a kɛnɛ kan wa?
1 Seere kɔrɔba dɔ ko: “A man ɲi yɛrɛ de ni mɔgɔ ye jamalajɛ don fɔlɔ jɛ!” A b’a fɛ ka mun fɔ? Jehowa ka jɛkuluba ye alako dumuniba nafama min dilan an ye, don fɔlɔ ye o daminɛ ye. (Esa. 25:6) An nali ka bɛn a daminɛ tuma ma, o b’a jira k’an bɛ sɔn Zaburu sɛbɛnbaga dusukunnataw ma, ko: “A fɔra ne ye tuma min na ko an ka taa Jehowa ka so la, o ye ne nisɔndiya.”—Zab. 122:1, NW.
2 Salon, kafoba ka jamalajɛ dɔw sen fɛ, n’o tun ye “Ala ka kiraya kuma” jamalajɛw ye, jama hakɛ min nana Jumadon na, o dɔgɔyara ni Sibiridon ni Karidon taw ye. O kɔrɔ ye ko Seerew kɛmɛ o kɛmɛ hakɛba ma nafa sɔrɔ jɛmukanw na minnu tun bɛ kiraya kuma ka miiriya kolomaw jira. U ye u balimakɛw ni balimamusow ka jɛɲɔgɔnya duman fana jɛ.
3 An ka baara kana an minɛ fo an tɛ fosi ɲɛsɔrɔ: A dɔ rɔ, dɔw tɛ na Jumadon na k’a masɔrɔ u t’a fɛ ka farati don u ka baara la. O bɛɛ n’a ta, Seere caman y’a kɔlɔsi k’u ka baaratigi tun bɛ sɔn k’u bila ka taa n’o tun sudara a la joona. Baaratigi dɔ kabakoyara tutigɛbaga dɔ ka cɛsiri fɛ, tutigɛbaga min tun t’a fɛ jɛkulu ka lajɛ si walima jamalajɛ si ka fɔ a kɔ; o ye baaratigi in bila ka tile kelen mumɛ kɛ jamalajɛ la.
4 I kan’a fɔ ko a mana kɛ cogo o cogo i ka baaratigi tɛna sɔn k’i bila ka taa, ani ko ka jamalajɛ don kelen jɛ, k’o tɛ baasi ye. I daŋaniyalenba k’i labɛn k’a ɲɛfɔ a ye ni Bibulu ye mun na ka taa jamalajɛ la, o ye i ka bato yɔrɔ koloma ye. (Heb. 10:24, 25) O kɔ, i ka dannaya kɛ Jehowa ka layiduw la, ka da a la k’i bɛ fari magoɲɛfɛn minnu deli, olu na di i ma n’i bɛ jɔyɔrɔ fɔlɔ di i magow ma alako ta fan fɛ.—Mat. 6:33 ; Heb. 13:5, 6.
5 “Ka ko fisamaw faranfasi k’u dɔn”, o nafa ka bon. (Fil. 1:10, 11, ABU; Zab. 27:4.) O b’an bila ka kɔn k’an labɛn walasa ka nafaba bɔ Jehowa ka nin fɛɛrɛ ɲɛnama in na. I k’i labɛn joona. E fana jɔlen ka to a kan ka ye jamalajɛ kɛnɛ kan a tile saba kuuru bɛɛ la.