Ɲininkaliw Jaabi

◼ An ka kan ka sɛbɛn jumɛnw kalan ni mɔgɔ kuraw ye sanni u ka batɛmu ta?

Sanni dɔ k’a yɛrɛ latɛmɛ Jehowa ma ani ka batise, o tigi ka kan ka dɔnniya jɔnjɔn sɔrɔ. (Yuh. 17:3) A mago bɛ kunnafoni minnu na, a n’olu sɔrɔ n’a ye nin sɛbɛn fila ninnu bɛɛ kalan: Ala bɛ mun wajibiya an ma? gafenin ani Dɔnniya min bɛ na ni ɲɛnamaya banbali ye gafe. Tuma caman na, Wajibiya gafenin fɔlɔ de bɛ kalan. Nka, ni kalan daminɛna ni Dɔnniya gafe ye, Wajibiya gafenin na kalan gafe bannen kɔfɛ. Kun jumɛn na?

Wajibiya gafenin bɛ Bibulu jujɔ kalanw bakurubafɔ. Ni kalan fɔlɔla ale la, a na kalanden lafaamuya ka ɲɛ Jehowa ka wajibiko kolomaw la minnu bɛ se k’a dɛmɛ k’a ko diya a ye. Ni kalan labanna ale la, a na kɛ Dɔnniya gafe kɔnɔfɛn kalannenw kan seginnkanni ɲuman ye. I mana’ daminɛ ni sɛbɛn o sɛbɛn ye, i ka kalanden dusu lamin walisa a ka tɛmɛsira kofɔlenw ɲini, k’a hakili jakabɔ u kan. I k’i jija k’i sinsi jaw kan, bawo u ye dɛmɛlan ɲumanbaw ye, kalan ko la.—San 1997 Zanwuyekalo tile 15 La Tour de Garde lajɛ, a ɲɛ 16-17.

Bibulu kalanden mana tila sɛbɛn fila ninnu kalanni na, a dɔ rɔ, a bɛna se ka maakɔrɔw ka ɲininkaliw bɛɛ jaabi, ɲininkali minnu bɛna kɛ ale la a ka batɛmu labɛn tuma la. O la sa, kun t’a la ka sɛbɛn wɛrɛ kalan ni kalanden ye bilen, nka karamɔgɔ na taa’ fɛ k’a mago don a ka ɲɛtaaw la.—San 1996 Zanwuyekalo tile 15 La Tour de Garde lajɛ, a ɲɛ 14, 17.