Yali aw ɲɛ bɛ mɔgɔ yecogo dɔrɔn de la wa?
1 An ka cidenyabaara senfɛ jama la, n’an ɲɛ kɛra mɔgɔ dɔw yecogo la siɲɛ fɔlɔ la, laala o bɛ se k’an bila filan-filan na, k’an bali o cogo la ka kibaru duman fɔ u ye. Misali la, i na mun kɛ n’i bɛnna ni cɛ dɔ ye min bɔlen bɛ mɔgɔ farin fɛ, janko n’a bɛ to ka siga i la tuma bɛɛ n’i bɛ taa bɔ a sigiɲɔgɔn ye min ye mago jira kɛ ka ɲɛsin tiɲɛ kuma ma? O ko ɲɔgɔnna kɛra an balimamuso tutigɛbaga dɔ la. A y’a latigɛ k’i magɛrɛ cɛ la ka kuma a fɛ. Cɛ ye goman kɛ k’a kunbɛn. Nka, kabako, a tilara ka Bibulu ka cikan lamɛn, o kɔ, ka sɔn kalan ma ni kɔnɔnadiya ye. Ikomi balimamuso ma cɛ minɛ a yecogo ma, o nɔ kɛra sira dayɛlɛli ye o cɛ n’a furumuso ye ka tiɲɛ kalan.
2 Balimamuso wɛrɛ fɔlɔla ka siran kamalen kunsigiba tigi dɔ yecogo ɲɛ, nka a taara’ fɛ ka seereya surun kɛ a ye a taa o taa a ka feereyɔrɔ la. A ka cɛsiri ye nɔ bɔ, wa sisan kamalen in ye seere batiselen ye. Mun de bɛna an bali ka kɔrɔtɔ k’a fɔ ko kaarisa tɛna lamɛnni kɛ?
3 Yesu ka misali ladege: Yesu tun b’a dɔn k’a tun bɛna a ka ɲɛnamaya di bɛɛ kelen-kelen ye. O la sa, tɔw yecogo m’a kɔnɔnafili. Hali tɔgɔ ɲuman tun tɛ mɔgɔ minnu na, Yesu y’a ye k’olu tun bɛ se ka yɛlɛma ni diyanye ye, ni dɛmɛ bɛnnen ni dusulamin tun dira u ma. (Mat. 9:9-13) A y’a ɲini ka nafolotigiw ni faantanw dɛmɛ cogo kelen na. (Mat. 11:5; Mar. 10:17-22) An bɛ mɔgɔ minnu bɛn cidenyabaara senfɛ, an man kan k’u minɛ u yecogo ma. N’o kɛra, laala an ɲɛ tɛna kɛ fɛn na min bɛ se ka kɛ dusukun ɲuman taamasyɛn ye. (Mat. 7:1; Yuh. 7:24) Mun bɛ se k’an dɛmɛ ka tugu Yesu ka misali ɲumanba la?
4 An ka Bibulu kalan senfɛ, an nana a ye ko Ala ka Kuma bɛ ni sebagaya ye min bɛ se ka miiri cogo ni taama cogo ni mɔgɔya kuraya. (Efe. 4:22-24; Heb. 4:12) O la sa, an ka kan ka seereya kɛ bɛɛ ye ni hakili ɲuman tigiya ye, ka fɛn tɔw to Jehowa bolo, Ale min bɛ mɔgɔ dusukun filɛ.—1 Sam. 16:7; Kɛw. 10:34, 35.
5 An k’an jija ka kibaru duman fɔ mɔgɔ sifa bɛɛ ye, k’a sɔrɔ a ma kɛ ni mɔgɔlawoloma ye, u yecogo kosɔn. O cogo la, an na caman kɛ sumantigɛ baaraba la nin laban don ninnu na.—1 Tim. 2:3, 4.