Yali Uti bɛna kɛ kalo kɛrɛnkɛrɛnnen ye wa?
1 San 1963 kɛra san kɛrɛnkɛrɛnnen ye Jehowa ka jamakulu fɛ. Yali aw b’a dɔn kun min na wa? O san de la, diɲɛ bɛɛ kɔnɔ weleweledalaw hakɛ ye miliyɔn kelen sɔrɔ. N’aw tun bɛ tiɲɛ kɔnɔ o waati la, an nisɔndiyara cogo min na ka mɔgɔ caman in ɲɔgɔnna sɔrɔ minnu tun bɛ Masaya cikan weleweleda, aw hakili bɛ se ka jigin o la! Sisan, o weleweledalaw caman ɲɔgɔnna de bɛ Ameriki jamana kelenpe dɔrɔn kɔnɔ. An ka mara jamanaw la, an nisɔndiyalen don ka weleweledalaw 1214 sɔrɔ u kɔnɔ. Nka, kalo o kalo, an cɛla, mɔgɔ 50 tɛ dantigɛli kɛ u niyɔrɔ ko la cidenyabaara la.
2 An ka sɔn gɛlɛya ma: Utikalo kɔnɔna na, an bɛna an seko kɛ ka se ka weleweledala hakɛ cayalenba 836 sɔrɔ Senegali ani 178 Mali la. N’an ka cɛsiriw ye taɲɛ sɔrɔ, Utikalo bɛna kɛ kalo kɛrɛnkɛrɛnnen ye sa! Yali an bɛ se k’o kuntilenna sɔrɔ wa? Ɔwɔ, n’an bɛɛ b’an niyɔrɔ kɛ. Hakilina dɔw filɛ nin ye.
3 N’aw bɛ taa yɔrɔ jan na aw ka sɛgɛnbɔwaati la Utikalo la, aw k’aw hakili to a la ka waati dɔ kɛ cidenyabaara la sanni aw ka taa. A’ ye sɛbɛndenninw, gafeninw, walima sɔn-ni-sɔn gafeninw hakɛ dɔw ta aw bolo walisa aw bɛ mɔgɔ minnu bɛn aw ka sɛgɛnbɔwaati kɔnɔna na, aw ka se ka seereya kɛ u ye. Aw bɛ taa bɔ yɔrɔ min na, ni jɛkulu dɔ bɛ o kɛrɛfɛ, laala, aw bɛ se ka waati dɔ kɛ cidenyabaara la n’o sigida weleweledalaw ye.
4 N’aw man kɛnɛ, walima n’aw dɛsɛlen don, hali o yɛrɛ la aw bɛ se k’aw niyɔrɔ kɛ cogo nafaman na cidenyabaara la. Dɔgɔtɔrɔw, furakɛlaw walima mɔgɔ wɛrɛ minnu bɛna bɔ aw ye, aw bɛ se ka seereya kɛ olu ye. A dɔ rɔ, aw bɛ se ka seereya kɛ ni batakiw ye walima nɛgɛjuru sira fɛ.
5 A kɛra cogo o cogo, aw kana ɲinɛ k’aw ka foro baara dantigɛli sɛbɛn bila joona kalo laban na walisa aw ka se ka jate weleweledalaw ye Utikalo la.
6 Bonya min b’an bolo, an ka nɔrɔ o la: Cidenyabaara ye “kalifa ɲuman” dɔ de ye. (2 Tim. 1:14, LK) Bonya min dira an ma ka kibaru duman fɔ, o ko ka bonya an bolo. (1 Tes. 2:4) Jehowa ye fɛn o fɛn kɛ an ye, n’an y’o jateminɛ, o ka kan k’an bila ka taa’ fɛ k’an niyɔrɔ kɛ o baara bɛɛ la nafaman in na san kuuru bɛɛ. An man kan k’a to fɛn si k’an bali ka waajuli kɛ tuma bɛɛ. An ka Utikalo in kɛ kalo kɛrɛnkɛrɛnnen ye Jehowa ka baara la. An jɔlen ka to a kan ka seereya kɛ ale ko la kalo o kalo!—Zab. 34:1.