Nafa b’an bɛɛ la walisa baara ka kɛ k’a dafa
1 Yesu Krista ka kalandenw kelen-kelen bɛɛ ka kan k’a faamu k’u bɛ cɛsiri minnu kɛ walisa k’u sen don Masaya waajuli baara la, ani k’a kɔkɔrɔmadondo, k’o nafa ka bon kosɛbɛ. Yesu tun b’a dɔn k’a ka kalandenw tun na Masaya denw di hakɛw la minnu tɛ kelen ye (Mat. 13:23). Hali k’a sɔrɔ waajuli baara fanba bɛ kɛ tutigɛbagaw caman ka baara gɛlɛnw de sababu fɛ, mɔgɔ timinandi minnu bɛ taa’ fɛ ka nɔɔrɔ da Ala kan u kɛtɔ ka denw caman di u seko la, olu ka kan ka fo.—Yuh. 15:8.
2 Cɛsiriw faralen ɲɔgɔn kan, o bɛ caman kɛ: Yesu tun y’a kiraya fɔ k’a ka kalandenw bɛɛ ka cɛsiriw faralen ɲɔgɔn kan, k’o bɛna wolo baaraw la minnu ka bon kosɛbɛ ni ale taw ye (Yuh. 14:12). An bɛ se ka min kɛ, n’an yɛrɛw kunkankow bɛ dan sigi o la, walima n’u b’an yamaruya ka waati caman kɛ Masaya waajuli la, o bɛɛ n’a ta, nafa bɛ an bɛɛ la walisa baara ka kɛ k’a dafa. O bɛ bɛn ni Pol ka fɔta ye ko: “Farikolo bɛɛ bɛ jiidi ka dɔ fara a yɛrɛ kan kanuya la, a labɛnnen ni a tugutugulen ɲɔgɔn na ni tugu yɔrɔw bɛɛ kelen kelen ka dɛmɛni ye, ka kɛɲɛ ni a yɔrɔw bɛɛ ka baara dama ye.”—Efe. 4:16.
3 Dɔw hakili la u ka cɛsiriw tɛ nɔba bɔ. O bɛɛ n’a ta, fɛn min nafa ka bon Jehowa ɲɛ na, o ye an ka baara kɛ n’an ni bɛɛ ye. An bɛ fɛn kelen o kelen kɛ a ye, o ye fɛn nafama ye, wa a b’o jate.—A suma ni Luka 21:1-4 ye.
4 An ka taa’ fɛ ka baara kɔkɔrɔmadondo: Bonya bɛ an kelen-kelen bɛɛ bolo k’an niyɔrɔ kɛ min ye nilifɛnw kɛli ko ye diɲɛ fan bɛɛ baara ko la. Dɔw fana bɛ se k’u niyɔrɔ kɛ ni farikolo baara ye u kɛtɔ ka Masaya baara kɔkɔrɔmadondo. An kelen-kelen bɛɛ ka kan k’an cɛsiri ka kuma labɛnnenw koɲuman fɔ lajɛw la, ani k’an niyɔrɔ kɛ Ala-ka-marako Cidenyabaara Kalan na. An kɛtɔ ka siraw sɔrɔ ka tɔw dusu lamin, an bɛ dɔ kɛ jɛkulu ka alako la cogo nafama na, ani an bɛ dɔ fara jɛkulu ka se kan walisa baara min kalifara a ma, a ka se k’o kɛ k’a dafa.
5 Tiɲɛ na, nafa bɛ an bɛɛ la walisa baara ka kɛ k’a dafa. Mɔgɔ si kan’a miiri ko mɔgɔ mago tɛ o tigi la walisa baara ka kɛ. An kɛtɔ ka baara kɛ Jehowa ye, an ka cɛsiriw faralen ɲɔgɔn kan, cɛsiribaw ani cɛsiri fitininw, o b’an kelenpe dɔrɔn de faranfasi iko Ala batobaga lakikaw (Mal. 3:18). An kelen-kelen bɛɛ bɛ se k’an niyɔrɔ kɛ yɛrɛ de walisa ka Jehowa bonya ani ka tɔw dɛmɛ ka ale dɔn ani ka baara kɛ a ye.