Denmisɛnw—Aw ye an nisɔndiya kun ye!
1 Denmisɛn cɛmaw n’a musomaw, yali aw bɛ Jehowa ka cikan dɔn, cikan min b’a jira k’aw sen bɛ jɛkulu ka baaraw la wa? (Dut. 31:12; Zab. 127:3) O ye nisɔndiyako ye dɛ k’aw sɔrɔ an kɛrɛ fɛ ka Jehowa bato ɲɔgɔn fɛ! Aw b’an dusu ɲagali n’aw sigilen bɛ yɔrɔ kelen na lajɛw la ani n’aw bɛ lamɛnni kɛ ni ɲɛmajɔ ye. Aw b’an nisɔndiya kɛrɛnkɛrɛnnenya la n’aw b’a lajɛ ka kuma n’aw yɛrɛ ka daɲɛw ye. Jɛkulu kuuru bɛɛ bɛ nisɔndiya n’aw b’aw ka baarakɛtaw kɛ Ala-ka-marako Cidenyabaara Kalan na, n’aw b’aw kɔrɔtɔ ka fara an kan foro baara la, ani n’an b’a mɛn k’aw ye seereya kɛ ni ja gɛlɛya ye aw kalanden ɲɔgɔnw an’aw karamɔgɔw ye.—Zab. 148:12, 13.
2 An b’a fɛ aw ka dɔn k’aw b’an kunnawolo n’an ɲɛ b’aw ka cogo ɲumanw ni aw yecogo ɲuman ni aw taamacogo saniyalen na an’aw ka bonya la ka ɲɛsin mɔgɔkɔrɔbaw ma. An ka nisɔndiya ka bon kɛrɛnkɛrɛnnenya la n’aw b’a jira k’aw b’aw ‘hakili to aw Dabaa la’ aw kɛtɔ ka kuntilenna sigi aw yɛrɛ ye Alako ta fan fɛ.—Ekil. 12:3; Zab. 110:3.
3 Aw k’aw kuntilennaw fɔ an ye: Denmisen cɛma dɔ min si ye san seegin ye, o y’a fɔ kafoba lakɔlɔsibaga ye ko: ‘A fɔlɔ, n’ b’a fɛ ka batɛmu ta. O kɔ, n’ b’a fɛ ka dɛmɛ don jɛkulu kɔnɔ n’ kɛtɔ ka baara kɛ kan labonyalan yɔrɔ la, ka kumanan latɛmɛ, k’a kɛ mɔgɔw kunbɛnbaga dɔ ye. N’ b’a fɛ fana ka dɛmɛ don sɛbɛnw sɔrɔyɔrɔ la, ka kalanjɛ kɛ gafe kalanw ani La Tour de Garde kalanw na. O kɔfɛ, n’ b’a fɛ ka kɛ cidenyabaara maganna ye, ka tila ka kɛ maakɔrɔ ye. N’ b’a fɛ fana ka kɛ tutigɛbaga ye ani ka taa tutigɛbaga kalan na. O bɛɛ kɔfɛ sa, n’ b’a fɛ ka taa Betɛl la ka kɛ kafo walima kafoba lakɔlɔsibaga ye.’ A ye waleɲumandɔn ɲuman jira dɛ ka ɲɛsin bonya ma, bonya min ye ka baara kɛ Ala ye!
4 Komi aw bɛ ka balikuya ka taa’ fɛ farikolo ni hakili ta fan fɛ, an b’an ɲagali k’a ye k’aw y’aw kuntilennaw sɔrɔ. (A’ y’a suma ni Luka 2:52 ye.) San o san aw ɲɔgɔn waa caman bɛ kɛ weleweledalaw ye minnu ma batise. U bɛ tila k’u senkolaya batɛmu kama iko Jehowa ka maganna yɛrɛdilenw. An ka nisɔndiya bɛ bonya tuma min na an b’a ye k’aw y’aw kuntilenna sɔrɔ ka kɛ tutigɛbaga farankan ye walima yɛrɛ ka don tuma-bɛɛ baara la. Tiɲɛ na, denmisɛnw, aw y’an ka nisɔndiya ye ani dakabana tanuli kun ye ka ɲɛsin an sankolola Fa ma. Jehowa ka duba aw ye kosɛbɛ!—Nta. 23:24, 25.