Tutigɛbagaya

Ni an bɛ kuntilennaw sigi an yɛrɛ la alako ta fan fɛ, an bɛ o kɛ ni hakilitigiya ye. (1 Kɔrɛntekaw 9:26) Waati min tora sani nin diɲɛ ka ban, o waati ma jan bilen, nka kuntilennaw bɛ an dɛmɛ an ka baara kɛ ni o waati ye ni hakilitigiya ye. (Efesekaw 5:15, 16) Aw b’a fɛ ka kuntilenna minnu sigi aw yɛrɛ la san kura baaraw kama, aw bɛ se ka kuma olu kan aw ka denbaya ka Alabato la. Barokun minnu bɛ kuma kuntilenna sugu caman kan, olu bɛ nin lajɛ sɛbɛn in kɔnɔ walasa ka aw dɛmɛ. Aw bɛ se ka miiri o barokunw kan ani ka delili kɛ u ko la.—Yakuba 1:5.

Misali la, yala aw ka denbaya kɔnɔmɔgɔw bɛɛ bɛ se ka u bolow di ɲɔgɔn ma walasa hali n’a kɛra mɔgɔ kelen ye, o ka se ka kɛ tutigɛbaga basigilen ye denbaya kɔnɔ? Ni i ma d’a la ko i bɛna se ka tutigɛbaga basigilenw ka lɛrɛw dafa, kuma ni tutigɛbaga wɛrɛw ye minnu ka ko cogoyaw ni i taw ye kelen ye. (Ntalenw 15:22) Laala yɛrɛ, aw ka denbaya ka Alabato la, i bɛ se ka ɲininkali dɔw bila tutigɛbaga dɔ la. O la, i bɛ se ka kow bolodacogo minnu kɛ, i ka olu sɛbɛn. Ni i delila ka kɛ tutigɛbaga ye waati tɛmɛnnenw na, miiri k’a filɛ ni i ka ko cogoyaw b’a to i ka se ka kɛ tutigɛbaga ye tuguni sisan.

Yala aw ka denbaya kɔnɔmɔgɔ dɔw bɛ se ka kɛ tutigɛbaga farankanw ye kalo kelen walima kalo damadɔw kɔnɔ wa? Ni fanga bɛrɛ tɛ i la, i bɛ se ka kɛ tutigɛbaga farankan ye i kɛtɔ ka to ka waajuli kɛ waati kunkurunnin kɔnɔ don o don. Ni i tɛ se ka waati caman kɛ waajuli la dɔgɔkun kɔnɔ bawo i bɛ baara kɛ walima i bɛ taa lakɔli la don o don dɔgɔkun tilew bɛɛ kɔnɔ fo k’a bɔ wikɛni na, o la sa, laala i bɛ se ka kalo dɔ sugandi konzew kɔnɔna na walima kalo dɔ, wikɛni duuru bɛ min kɔnɔ. I y’a latigɛ ka kɛ tutigɛbaga farankan ye waati min na ani i ye o kow kɛcogo boloda cogo min na, olu sɛbɛn kalandiriye dɔ kɔnɔ.—Ntalenw 21:5.

NIN WIDEYO LAJƐ: AW KA KƐ . . . TUTIGƐBAGA JAGƐLƐNW YE, O KƆ AW KA NIN ƝININKALI JAABI:

• Balimamuso Aamand ka ko b’a jira cogo di ko mɔgɔ minnu bɛ sarakaw kɛ walasa ka kɛ tutigɛbagaw ye, ko Jehova bɛ olu kanu ani ko a b’a janto u la?