An ka an yɛrɛ di ni diyanye ye baara ɲuman bɛɛ kama

¹ Fɛn min sera ka kalan Jehowa Seerew ko la, o filɛ nin ye: “A bɛna gɛlɛya ka diinɛ jɛkulu wɛrɛ sɔrɔ min mɔgɔw b’u magan ni cɛsiri ye ka Jehowa Seerew bɔ.” Mun na Jehowa Seerew jijalen don baara la ni diyanye ye tan?

² O kun dɔ ye k’u kɔrɔtɔlen don. Yesu tun b’a kala ma k’a tun tɛ na to dugukolo kan kudayi k’a ka baara dafa o kan. (Yuh. 9:⁠4) Bi, k’a sɔrɔ Ala Denkɛ bɛ ka sigi fɛn bɛɛ kunna a juguw cɛma, Jehowa ka baarakɛlaw b’a faamu k’u ka kan k’u ka baara dafa waati dantigɛlen kɔnɔna na. O de kosɔn u b’u yɛrɛw di baara senuman kama ni diyanye ye. (Zab. 110:1-3) Ikomi suman ladonni ni baarakɛla caman ka kan, u tɛ se ka sumaya. (Mat. 9:37, 38) O la sa, u b’u gɛlɛya ka Yesu ladege, ale min ye misali dafalen ye sabu a y’i timinandiya a ka baara la ni diyanye ye.—Yuh. 5:17.

³ Kun wɛrɛ min kama Jehowa Seerew bɛ baara kɛ Jehowa ye n’u ni bɛɛ ye, o ye danfara ye min bɛ u ka dugukolo kan jɛkuluba ni diinɛ jɛkulu tɔw cɛ. Diinɛ caman tɛ waati ni cɛsiri bɛrɛ ɲini u ka diinɛdenw fɛ. U ka dannayakow nɔ bɛrɛ tɛ ye u ka don o don diɲɛnatigɛ la, walima u tɛ nɔ yɛrɛ to a la; u tɛ nɔ to u ni tɔw cɛ siraw la, walima u kuntilennaw la. Ikomi dannaya lakika t’u la, u b’a wajibiya u karamɔgɔw ma u ka ‘kuma nugulenw fɔ’ u ye, k’a f’u ye ko u ka kɔkanna walew bɛ bɔli kɛ. (Esa. 30:10) U ka diinɛ ɲɛmɔgɔw wajibiyalen don ka ‘u tulow diyanyekow fɔ’, o cogo la ka mɔgɔw to kunsalenya ni salaya lahalaya la alako ta fan fɛ.—2 Tim. 4:3.

⁴ O ye danfaraba ye olu ni Jehowa Seerew cɛ! Fɛn o fɛn sirilen don Ala ka bato la, o bɛ cɛsiri ni baara wajibiya. Don o don, ani an ka kɛtaw bɛɛ la, an bɛ balo ka kɛɲɛ n’an ka dannayakow ye. Tiɲɛ don, tiɲɛsira bɛ nisɔndiyako caman lase an ma, nka, an ka kan ka “kɛlɛbaw” fana kɛ n’an b’a fɛ k’a ka wajibilakow dafa. (I ka 1 Tesalonikekaw 2:2 lajɛ.) Don o don diɲɛnatigɛ kunkankow bɛ mɔgɔw fanba bolo degun. O bɛɛ n’a ta, o haminakow kana an bali ka Masaya bila jɔyɔrɔ fɔlɔ la!—Mat. 6:33.

⁵ Fɛn min kalifara an ma Jehowa ka baara la, o nafa ka bon kosɛbɛ, wa, kɔrɔtɔko don, fo o b’an bila ka waati ‘kunmabɔ’, hali n’o bɛ kuntilenna wɛrɛw sa, ani cogo bɛnnen na, k’o waati don alako baaraw la. (Efe. 5:16) Ikomi an b’a dɔn k’a ka di Jehowa ye an ka nɔrɔ ale la, ka jɛn an yɛrɛw kɔ ni diyanye ye, o dɔnniya de b’an bila ka to k’an magan an ka baara la. An bɛ nafa minnu sɔrɔ kabini sisan, ani ɲɛnamaya jigiya minnu b’an ɲɛ, olu b’an bila k’a latigɛ ka ‘baaraba kɛ ani ka kɛlɛ kɛ’ ka t’a fɛ, Masaya kama.—1 Tim. 4:10.

⁶ Ka nɔrɔ Ala la ani k’i yɛrɛ di: Bi mɔgɔw fanba bɛ bololafɛnw ani u ka nafa bila fɛn wɛrɛw bɛɛ kunna. Olu bolo, fɛn fɔlɔ min ka kan ka ɲini, o ye baloko, minnifɛn ni fɛɛrɛbɔ ye. (Mat. 6:31) Nka, magoɲɛfɛnw t’u bɔ. U kuntilenna ye ka diɲɛnatigɛ diyabɔ fo ka se a dan na, ani ‘ka fɛn caman mara san caman ɲɛ, ka sigi ɲɛsuma na, ka dumuni kɛ, ka minni kɛ, k’u ɲɛnajɛ’. (Luka 12:19) Minnu bɛ taa diinɛ lajɛw la, u ka diinɛ mana yɛrɛkun magan fɛn o fɛn ɲini u fɛ, u b’o filɛ tuma caman na iko u jo tiɲɛni. Ka jɛn fɛn ɲini kuntilennaw kɔ, walima k’i yɛrɛ minɛ u la dɔɔnin dɔrɔn, ani ka jɛn fariladiya ko dɔw kɔ, o hakilila yɛrɛ bɛ u ɲigin. Ikomi u tɛ miiri fɛn wɛrɛ la u yɛrɛw kɔ, jɛn-n-yɛrɛ-kɔ ye ko kɛbali ye olu bolo, hakilimayako tɛ.

⁷ Danfara bɛ an ka kow yecogo n’u ta cɛ. Ala ka Kuma b’an kɔrɔta kosɛbɛ, fo an bɛ Ala ka miiriyaw kɛ an ta ye ka tɛmɛ hadamadenw taw kan. (Esa. 55:8, 9) An ka diɲɛnatigɛ la, an bɛ tugu kuntilennaw la minnu ka fisa kosɛbɛ ka tɛmɛ farisogokow kan. Jehowa ka masabaya lajɛyali ani a tɔgɔ saniyali ye koɲɛw bɛɛ la belebelebaw ye dunuya mumɛ la. O koɲɛw ka bon fo ‘Jehowa ɲɛna, siyaw bɛɛ bɛ jate fufafu ye”. (Esa. 40:17) O la sa, k’a ɲini ka balo k’a sɔrɔ an m’an mago don Ala sago la, o ye nalonmaya ye.—1 Kɔr. 3:19.

⁸ Hali ni bololafɛn dɔw tigiya wajibiyalen don, ani hali ni nafa bɛ dɔ wɛrɛw la walasa ka Masaya kunkan baaraw kɔkɔrɔdon, an b’a faamu tiɲɛ yɛrɛ la k’u tɛ jate “ko fisamaw” fɛ. (Fil. 1:10.) An nɔrɔlen bɛ sariyakolo la min bɛ 1 Timote 6:8 kɔnɔ k’an bɛ dan sigi an yɛrɛw ye bololafɛnw ko ta fan fɛ, ani an b’an janto k’an ɲɛjɔ n’an dusukun bɛɛ ye ‘fɛn yebaliw la minnu ye badaa fɛnw ye’.—2 Kɔr. 4:18.

⁹ N’an bɛ t’a fɛ k’an miiriyaw ni Ala taw kɛ kelenw ye, an tɛna jɔrɛ kosɛbɛ bololafɛnw ko la. Jehowa ye fɛn minnu kɛ an ye kaban, ani a ye dakabana duba minnu layidu ta an ye, an mana olu lajɛ, an bɛ sɔn ni diyanye ye a ka ɲinifɛn bɛɛ ma. (Mar. 10:29, 30) An ka ɲɛnamaya yɛrɛ ye ale de ta ye. An ka ɲɛnamaya n’an ka sini sirilen bɛ a ka makari n’a ka kanuya de la. An bɛ fɛn o fɛn kɛ a ka baara la, ikomi o ye ‘an bilakun’ ye, an dusukunnata ye ko a wajibiyalen don an k’an yɛrɛkun di a ma. (Luka 17:10) Fɛn o fɛn mana ɲini an fɛ Jehowa ka baara siratigɛ la, an nisɔndiyalen don k’o kɛ, bawo an b’a dɔn k’an na ‘suman caman tigɛ’.—2 Kɔr. 9:6, 7.

¹⁰ Bi, mago jɔra baarakɛlaw la minnu jɛnnen don u yɛrɛw kɔ ni diyanye ye: Kabini a daminɛ na, Krecɛn jɛkulu donna baaraba waati la. A tun kɛra wajibi ye ka seereya kɛ kosɛbɛ ka kɔn Jerusalɛm binni ɲɛ, kristatile san 70 nan na. O tun ye waati ye, waati min kɔnɔna na Yesu ka kalandenw ka baara kɛra “kuma fɔli baara dɔrɔn ye”. (Kɛw. 18:​5, Layidu Kura) Baara jɛnsɛnni teliman kosɔn, a tun kɛra wajibi ye ka weleweledala caman ni karamɔgɔw kalan walasa u ka dɛmɛ don baara la. A tun kɛra wajibi fana ye ka cɛ dɔw sɔrɔ, cɛ minnu tun bɛ se kuma na faamaw fɛ, ani cɛ laadiri minnu tun bɛ se k’u janto fari magoɲɛfɛnw dalajɛli n’u tilatilali la. (Kɛw. 6:1-6; Efe. 4:11) N’u damadɔw tun bɛ ɲɛmɔgɔya la, u fanba ma u yɛrɛ jira. O bɛɛ n’a ta, u bɛɛ ye ‘barita kɛ ni barika ye’, u jɛra ka baara kɛ ɲɔgɔn fɛ n’u dusukun bɛɛ ye walasa baara ka dafa.—Luka 13:24.

¹¹ San kɛmɛ-kɛmɛ minnu tugura o la, olu kɔnɔna na, a ma kɛ wajibi ye ka baaraba kɛ diɲɛ mumɛ la. Nka, Masaya baara kurayara kosɛbɛ tuma min na Yesu sigira fanga la san 1914 na. A daminɛ na, mɔgɔ damadɔw de tun b’a kala ma ko mago bɛna jɔ mɔgɔw la minnu jɛnnen bɛ u yɛrɛw kɔ Masaya kosɔn, ɔwɔ, mɔgɔ miliyɔn caman minnu bɛna u yɛrɛw di baara kama ni diyanye ye dugukolo mumɛ kan.

¹² Bi, jɛkuluba bɛ ɲɛsigibaara caman ko ɲɛnabɔ, a ka nafolomafɛnw bɛ don ɲɛsigibaara minnu dafɛ fo ka se u dan na. Masaya baara b’a la ka taa ɲɛ yɔrɔ caman na. Ikomi an bɛ ko latigɛ waati la sisan, an b’a fɛ k’an yɛrɛw di ani k’an ka nafolomafɛnw bɛɛ kɛ ka ci dafa, ci min kalifara an ma. An bɛ se ka sigi ni baaraba ye, k’a da sisan kow sigicogo juguman laban surunyali kan. Wele bilalen bɛ Jehowa ka baarakɛlaw bɛɛ ye walasa u k’u yɛrɛw di ni diyanye ye suman tigɛ baara nafama kama.

¹³ Mun de ka kan ka kɛ? Tiɲɛ yɛrɛ la, an bɛ se k’a fɔ ko ‘caman bɛ yen ka kɛ Matigi ka baara la’. (1 Kɔr. 15:58, NW.) Yɔrɔ caman na, suman mɔna, nka, baarakɛlaw ka dɔgɔ. A ɲininen b’an fɛ an k’an ta kɛ n’o ye k’an tɔgɔla wajulikɛyɔrɔ baara ni laadiriya ye, ani fana ka sɔn gɛlɛya dɔ la, n’o ye ka yɛlɛma yɔrɔ la min mago bɛ dɛmɛ na.

¹⁴ Dakabanako don k’a ye ko Seerew b’u yɛrɛw di ni diyanye ye dugukolo fan bɛɛ la ka baara sugu bɛɛ kɛ. U b’u sen don batokɛyɔrɔw jɔli la fu; u bɛ u mɔgɔɲɔgɔnw mago ɲɛ jamalajɛw la; kasaaraw kɔfɛ, u b’u ta kɛ mɔgɔw magɛnni na; u bɛ na tuma bɛɛ k’u ka jɛkulu tɔgɔla Masaya So jɛya, ani o ɲɔgɔnna. Fɛn min ye nin yɔrɔ laban in ye, aw k’aw hakili to a la ko nafa b’a la ka batoso jɛlen to lajɛw bɛɛ kɔfɛ, ani ka fɛnw bɛɛ bila u nɔ na. Mɔgɔ min bɛ baara misɛnw kɛ, o tigi b’a jira k’a ye Yesu ka kumaw faamu kosɛbɛ, min bɛ sɔrɔ Luka 16:10 kɔnɔna na, ko: “Min ye dannamɔgɔ ye ko fitinin ko la, o ye dannamɔgɔ ye koba fana ko la. Min ye tilenbali ye ko fitininw ko la, o ye tilenbali ye koba fana ko la.”

◼ Baara min bɛ kɛ an ka jɛkulu kɔnɔ, an k’o kɔkɔrɔdon: Tiɲɛ don, baara min bɛ kɛ jɛkulu kɔnɔ, o ye jɛkuluba ka baara niyɔrɔ dɔ dama ye baara min labɛnnen bɛ diɲɛ bɛɛ la ani min baarakɛsiraw bɛ bɔ “jɔnkɛ dannamɔgɔ hakilima” yɔrɔ; nka weleweledalaw hakɛ dɔ fana bɛ sɔrɔ a kɔnɔ. (Mat. 24:45) O la sa, Seere kelen-kelen bɛɛ b’a fɛ ka baara min kɛ ni diyanye ye, walima a bɛ se ka min kɛ, jɛkulu ka baara dulonnen bɛɛ o de la. O la, jɛkulu ka baara ye ka kibaru duman weleweleda a ka wajulikɛyɔrɔ la, ka mɔgɔw kɛ kalandenw ye ani k’u barika bonya alako ta fan fɛ. Dɔ bɛ an bɛɛ bolo k’a kɛ. An bɛ se fana ka kuntilennaw sigi an yɛrɛw ye, kelennakalan ko la Bibulu kan, k’an ta kɛ lajɛw senfɛ, ani ka mɔgɔw kɔkɔrɔdon minnu mago bɛ dɛmɛ na jɛkulu kɔnɔ. Nin kow bɛɛ bɛ cogo di an ma k’a jira ko an ye diyanyebagatɔw ye.

◼ Ɲɛmɔgɔya jɔyɔrɔ bɛ minnu na, olu ye ɲɛjiralaw ye: Jehowa ye jɛkulu kɔlɔsili kalifa maakɔrɔw ma. (Kɛw. 20:28) Cɛw de don minnu ye o jɔyɔrɔ ɲini u kɛlen k’u gɛlɛya ka mankutu wajibiyalenw dafa. (1 Tim. 3:1) A bɛ se ka fɔ ko se bɛ balimakɛw bɛɛ ye ka mankutuw dafa walasa ka bila jɔyɔrɔbaw la. Balimakɛ caman bɛ yiriwa alako ta fan fɛ. U ka kan ka t’a fɛ ka kɔgɔ ten jɛkulu maakɔrɔw ka bilasirali sababu fɛ min bɛ kɛ ni kanuya ye. U ka kan ka kɛ Bibulu ani Bibulu kan sɛbɛnw kalanbaga timinandiw ye. U kɛtɔ k’u majigin maakɔrɔw ye minnu sigira hakili senu fɛ, k’u ka limaniya ladege, ani ka mankutuw baara u la, mankutu minnu ɲininen don lakɔlɔsibagaw fɛ, u bɛ se k’u ŋaniya ɲuman jira.—Heb. 13:7, 17.

◼ A’ ye waati dafalen cidenyabaara daminɛ: Jɛkuluw sigi kun fɔlɔ ye ka kibaru duman weleweleda. (Mat. 24:14) Mɔgɔ minnu ka kisɛ, olu mana dɔ fara u ka cɛsiriw kan ka kɛ tutigɛbagaw ye, o nɔ bɛ kɛ duba caman ye! Tuma caman na, o bɛ na ni min ye, o ye ka yɛlɛma don u balo cogo la. N’u b’a fɛ ka t’a ɲɛ o baara kɛrɛnkɛrɛnnen in na, laala, u ka kan ka t’a fɛ ka yɛlɛmaw don u balo cogo la. O bɛɛ n’a ta, minnu nɔrɔlen bɛ u ka o koɲuman na, n’o ye u ka tutigɛbagaya ye, n’u t’a bila san kelen walima san fila kɔnɔ dusutiɲɛ tɛmɛta kosɔn, siga si t’a la ko olu na duba sɔrɔ ka bɔ Jehowa yɔrɔ. A kɛra dala kuma fɛ wo, walima walew la wo, maakɔrɔ kanubaganciw ani Krecɛn mɔlen wɛrɛw bɛ se ka tutigɛbagaw dɛmɛ ka dɔ fara u ka cidenyabaara dondala kan. Denmisɛn minnu bɛ tutigɛbagaya cidenyabaara daminɛ u ka lakɔli kalan bannen kɔfɛ, olu ye hakili ɲuman tigiw ye dɛ! O kuma kelen bɛ se ka fɔ balikuw ko la minnu bɛ kɛ tutigɛbaga basigilenw ye, ni dɔ bɔra u ka dahirimɛ ɲini baaraw girinya la dɔrɔn. Krecɛn yɛrɛdilen min b’a ta kɛ ten suman tigɛ baara la, Jehowa bɛ ka min lateliya, o tigi na wasaba sɔrɔ.—Esa. 60:22

◼ An k’an sen don lajɛkɛyɔrɔw jɔli n’u ladonni na: Sɛbɛ la, Masaya So kura kɛmɛ-kɛmɛw ni jamalajɛ so dɔw jɔra kaban. Wa, fɛn min ye kabako ye, o ye ko an balimakɛw n’an balimamusow de bɛ baara fanba kɛ; u b’a bɔ u yɛrɛw la k’u ka waati n’u seko di ni diyanye ye. (1 Ti. Kib. 28:21) Mɔgɔ ba caman b’a bɔ u yɛrɛw la ka o sow ladon; baara fɛn o fɛn mana kalifa u ma, u b’o kɛ. (2 Ti. Kib. 34:8) Ikomi o baara in ye baara senuma ɲɛ dɔ ye, mɔgɔ minnu b’u sen don a la, olu bɛ u yɛrɛw di ni dusukun ɲuman ye. U bɛ baara min kɛ, u t’a ɲini ka sara minɛ o la, i n’a fɔ u sigilen tɛ n’a ye ka sara minɛ du ni du wajuli la, u ka jɛkuluw la foroba jɛmuw la, walima kafo ni kafoba ka jamalajɛw senfɛ baara la. Batokɛyɔrɔw ɲɛbila baaraw labɛnni ani u waleyali tuma la, o balima dɛmɛdonbagaw bɛ baara kɛ fu ka Jehowa tanu. U bɛ dɛmɛ don walasa ka sɛbɛnw lafa sariya sira la, ka jatebɔw kɛ, ka fɛnw sɔngɔ tɛrɛmɛ, mago bɛna jɔ jɔliminɛnw hakɛ min na, k’o jateminɛ, an’o ɲɔgɔnna. Jehowa ka o baarakɛla kantigiw tɛ wariko doni wɛrɛ si da jɛkuluw kan, wa, u t’a ɲini cogo si la ka nafoloko nafa bɔ u ka baara kɛlenw na, katuguni u ka dɔnkow bɛɛ, an’u ka nafolomafɛnw dilen don Jehowa ma. Walasa yɔrɔ jɔli ɲɛsigi baaraw ka sira sɔrɔ, an mago bɛ baarakɛla timinandiw la minnu b’u magan u ka baara la ‘n’u ni bɛɛ ye, i n’a fɔ u b’a kɛ Jehowa ye’.—Kol. 3:23.

¹⁵ A laban na, Jehowa ka baarakɛlaw b’u yɛrɛ di ni diyanye ye cogo min na, mun b’o kɛ a danma fɛn ye? Dili hakili min b’u la, o de b’a kɛ. U tɛgɛ labilali bɛ tɛmɛ wari walima bololafɛnw caman nili kan; ‘u b’u yɛrɛw di ni diyanye ye’. (Zab. 110:3, NW) Tiɲɛ yɛrɛ la, an yɛrɛbakun dili Jehowa ma, o kɔrɔ y’o de ye. Ladiyalifɛn kɛrɛnkɛrɛnnen b’an bolo. Ɔwɔ, an ka baara ka di mɔgɔw ye, u b’a fɔ an ye; o bɛ ‘an ka nisɔndiya caya’, ani ‘an bɛ suman caman tigɛ’. (Kɛw. 20:35; 2 Kɔr. 9:6; Luka 6:38) Mɔgɔ “min bɛ nili kɛ ni ɲagali ye, o de ko ka di Ala ye” an sankolo la Fa Jehowa, an ka Koɲumankɛlaba. (2 Kɔr. 9:7) A n’an kɛmɛ-kɛmɛ sara ni duba banbaliw ye. (Mal. 3:10; Rom. 6:23) O la sa, ni jɔyɔrɔw kofɔra aw ye Jehowa ka baara la, yali aw n’aw yɛrɛw di ni diyanye ye wa, ka welekan laminɛ iko Esayi y’a kɛ cogo min na ko: “Ne, i ka ne ci”?—Esa. 6:8.

Annuaire ko la. . .

Ikomi tuma dɔw la balimaw b’u ka nisɔngoya jira k’a fɔ k’u tɛ Annuaire sɔrɔ ka bɛn san daminɛ ma, an b’a fɛ k’a ɲɛfɔ u ye mun kosɔn o tɛ se ka kɛ. Hali n’a dilanni jatelen don i n’a fɔ ko fɔlɔ, o dulonnen bɛ diɲɛ mumɛ dantigɛli sɛbɛnw sɔrɔli n’u kafoli la ɲɔgɔn kan Brooklyn fɛ. Ka fara o kan, u mana ban dilan na, Annuaire gafew tɛ se ka ci yɔrɔ bɛɛ la siɲɛ kelen.

A tun latigɛra tuma min na ka don tɛmɛsiraw n’u walanwalanni kumaw kɛ u dan ma, Examinons les Ecritures chaque jour gafenin kɔnɔ, kunnafoni nata bɔra san 1985 Zuluyekalo la, ko: “Nin yɛlɛma ye ko nafama ye min ye Tɔn ka baara bolodalen kɔnɔfɛn ye, baara bolodalen min ye ka kalan kelen labɔ kan caman na waati kelen na. K’a ta san 1986 Zanwuyekalo ma, an na kɛ kelenw ye diɲɛ yɔrɔ bɛɛ la don tɛmɛsira kelen sɛgɛsɛgɛli ko la. Siga si t’a la ko nin fɛɛrɛ kura in na caman kɛ an ka Krecɛn kelenya kologɛlɛyali la. Don tɛmɛsiraw bɛ gafenin kura min kɔnɔ, o bɛ se ka dilan ka kɔn Annuaire ɲɛ, ani ka tilatila jamana caman ka jɛkuluw la ka bɛn waati ma, walasa bɛɛ ka se baara kɛ n’a ye kabini san kura daminɛ na.”

O la sa, Annuaire sɔrɔli san tɔ kɔnɔna na, o man kan ka kɛ balannako walima nisɔngoyako ye. A sɛgɛsɛgɛli sirilen tɛ Zanwuyekalo tile fɔlɔ la cogo si la. San mumɛ baara dantigɛli min bɛ sɔrɔ a kɔnɔ, o bɛ kɔn ka bɔ La Tour de Garde kɔnɔ. Nka, a kɔnɔko lakalitaw kalanna san daminɛ na wo, walima kalo damadɔw o kɔfɛ wo, o n’a ta o ta, u bɛ mɔgɔ dusulamin kosɛbɛ.