Yali i bɛ u tɔgɔ dɔn wa?
1 Dolo minnu bɛ sankolo la, Jehowa Ala bɛ u bɛɛ tɔgɔ dɔn. (Zab. 147:4) Yesu Krista bɛ a ka kalandenw bɛɛ tɔgɔ dɔn. (Yuh. 10:3, 14) I balimakɛw ni i balimamuso minnu bɛ jɛkulu kɔnɔ, yali i bɛ u bɛɛ tɔgɔ dɔn wa, walima i bɛ u yelen dɔrɔn de dɔn? Ni an bɛ ka jɛkulu ka lajɛ dɔ ɲɛminɛ, yali an bɛ balimakɛw wele u tɔgɔ la wa, walima an bɛ u wele dɔrɔn “balimakɛ” walima “balimamuso”? Lajɛw la, ni an bɛ ka mɔgɔ kura dɔ jira balimaw la, yali an bɛ tɛmɛ dɔw la bawo an tɛ u tɔgɔ dɔn wa? Mɔgɔ joli bɛ jɛkulu kɔnɔ an bɛ minnu fo dɔrɔn an kɛtɔ k’a fɔ ko: “Balimakɛ e ni ɲɔgɔn tuma” walima “balimamuso e ni ɲɔgɔn tuma?”
2 Hakilila damadɔw filɛ nin ye minnu b’i dɛmɛ walisa i ka se ka i balimakɛw ni i balimamusow tɔgɔ to i kɔnɔ. Mɔgɔ minnu ma u yɛrɛbakun di Jehowa ma fɔlɔ, nin hakililaw bɛ se k’i dɛmɛ walisa i hakili ka jigin olu fana tɔgɔ la. Dɔgɔkun o dɔgɔkun, i jija ka na Masaya So la joona, sanni lajɛw ka daminɛ, ani u bannen kɔ fana, i ka to yen walisa e ni balimaw ka se ka kuma ɲɔgɔn fɛ. A kɛ i delinako ye ka nin fana kɛ: I bɛ mɔgɔ minnu yelen dɔn, k’a sɔrɔ i tɛ u tɔgɔ dɔn, i ka u kelen walima u fila tɔgɔ dege. I bɛ se k’olu dɔ la kelen tɔgɔ sɛbɛn sɛbɛnfura kan. Ka mɔgɔ tɔgɔ sɛbɛnnen ye, o bɛna i dɛmɛ walisa o tɔgɔ ka to i kɔnɔ. I ka taa i yɛrɛ jira o tigi la k’i tɔgɔ fɔ a ye, walima i k’o tigi tɔgɔ ɲininka balimakɛ dɔ fɛ, o kɔ fɛ, i ka taa baro daminɛ a fɛ. A ta a tɔgɔ ma k’a fo. Aw ka baro kɔnɔna na fana, i ka to k’a ta a tɔgɔ ma. A tigi to i hakili la walisa ni a tɔgɔ welela yɔrɔ o yɔrɔ la, i hakili ka jigin a la. Aw ka baro kɔnɔna na, a ɲini ka fɛn dɔ dɔn balimakɛ kan, i n’a fɔ a bɛ yɔrɔ min na, ani a bɛ taa jɛkulu ka gafe kalan min na. Ko minnu kɛra waajuli sen fɛ, ni a bɛ olu ɲɛfɔ, i ka olu lamɛn. O kɔ fɛ, e fana ka i taw fɔ a ye.
3 An bɛɛ ka nin kow to an kɔnɔ, ka an cɛsiri kɛrɛnkɛrɛnnenya la walisa ka an balimakɛw ni an balimamusow tɔgɔ dɔn, k’a ɲini k’u dɛmɛ. Walisa ka mɔgɔ kura tɔgɔ dɔn, a kɛcogo ɲuman dɔ filɛ. I ka taa o tigi ma, k’a fɔ: “Ne tɔgɔ ko ———. E dun? A tɔgɔ dɔnnen kɔ, i bɛ se ka baro kɛ ka t’a fɛ, cogo la min bɛ nisɔndiya lase a ma, k’a jira a la ko a kunbɛnnen don koɲuman Masaya So la.
4 Jehowa Ala ani Krista Yesu ma ɲinɛ abada tɔgɔw kɔ, fo ni u y’a dabɔ a kama. Hali ni anw ni olu tɛ se ka suma abada ɲɔgɔn ma, an kɔni bɛ se ka an ka jɛkulu kɔnɔmɔgɔw bɛɛ tɔgɔ dɔn. O bɛna caman kɛ walisa hakilila ɲuman min bɛ denbaya kɔnɔmɔgɔ ni ɲɔgɔn cɛ, o hakilila ɲɔgɔn ka yiriwa jɛkulu kɔnɔ.