KALANSEN 42
Bibulu bɛ mun fɔ cɛganaya walima musoganaya ani furu ko la?
Mɔgɔ dɔw ka laadaw la, dɔw b’a miiri ko mɔgɔ tɛ se ka kɛ hɛrɛ la ni a ma furu kɛ. K’a sɔrɔ mɔgɔ furulenw bɛɛ tɛ hɛrɛ la, wa cɛganaw ni musoganaw bɛɛ tɛ hɛrɛ la. Tiɲɛ ye min ye, o ye ko Bibulu b’a fɔ ko cɛganaya wo musoganaya wo ani furu wo, olu bɛɛ ye nilifɛnw ye ka bɔ Jehova yɔrɔ.
1. Cɛganaya walima musoganaya nafa dɔw ye jumɛnw ye?
Bibulu b’a fɔ ko: “Minnu ma furu kɛ ani muso cɛ salenw, ne b’a fɔ ko a ka ɲi olu ma ka to i ko ne.” (1 Kɔrɛntekaw 7:8, 32, 33 kalan.) Sira jumɛnw fɛ a “ka ɲi” mɔgɔ ma a kana furu kɛ? Cɛganaw ani musoganaw mago tɛ a la ka u janto furuɲɔgɔn magoɲɛfɛnw na. O de kama u ka kow bɛ u yɛrɛ bolo. U dɔw bɛ se ka fɛn caman kɛ Jehova ka baara la, misali la, u bɛ se ka fɛn nafama dɔw kɛ i n’a fɔ ka taa jamana wɛrɛ la walasa ka kibaru duman waajuli kɛ. Min yɛrɛ nafa ka bon n’a bɛɛ ye, o ye ko u bɛ se ka waati caman ta ka u magɛrɛ Jehova la.
2. Ka furu kɛ sariya sira kan, o nafa dɔw ye jumɛnw ye?
Nafa bɛ cɛganaya walima musoganaya la cogo min na, nafa bɛ furu fana la o cogo kelen na. Bibulu b’a fɔ ko: “Mɔgɔ fila ka fisa ni mɔgɔ kelen ye”. (Waajulikɛla 4:9) O kuma ye tiɲɛ ye kɛrɛnkɛrɛnnenya la krecɛnw bolo, minnu bɛ Bibulu sariyakolow waleya u ka furu kɔnɔ. Furuɲɔgɔn minnu bɛ furu kɛ sariya sira kan, olu bɛ u kan di ɲɔgɔn ma ka ɲɔgɔn kanu, ka ɲɔgɔn bonya ani ka mandiya jira ɲɔgɔn na. O de kama tuma caman na, o furuɲɔgɔnw bɛ u yɛrɛ ye lakana kɔnɔ ka tɛmɛn cɛw ni musow kan minnu bɛ ɲɔgɔn kan ten dɔrɔn. Ani o furu sugu de ye yɔrɔ ɲuman ye denw lamɔli kama.
3. Jehova hakilina ye mun ye furu ko la?
Tuma min na Jehova ye furu fɔlɔ siri, a y’a fɔ ko: “Cɛ na a fa ni a ba bila ka nɔrɔ a muso la”. (Jenɛse 2:24) Jehova b’a fɛ cɛ ni a muso ka ɲɔgɔn kanu ani ka nɔrɔ ɲɔgɔn na u si tɔ bɛɛ la. A bɛ sɔn furusa ka kɛ fɛn kelen dɔrɔn de kosɔn, o ye ni furuɲɔgɔnma kelen ye jatɔya kɛ. O ko sugu la, Jehova bɛ yamaruya di furuɲɔgɔn ma, min ma jatɔya kɛ, a k’a latigɛ n’a bɛ furusa kɛ walima n’a tɛ furusa kɛ.a (Matiyu 19:9) Jehova tɛ jɛ n’a ye krecɛnw ka muso caman furu.—1 Timote 3:2.
DƆ FARA I KA DƆNNIYA KAN
A kɛra ko i ye cɛgana walima musogana ye walima ko i furulen don, an k’a lajɛ i bɛ se ka hɛrɛ sɔrɔ cogo min na ani ka Jehova nisɔndiya.
4. Baara kɛ ni i ka cɛganaya walima musoganaya nilifɛn ye cogo ɲuman na
Yesu tun bɛ cɛganaya walima musoganaya jate nilifɛn ye. (Matiyu 19:11, 12) Matiyu 4:23 kalan, o kɔ aw ka baro kɛ nin ɲininkali kan:
Yesu ye baara kɛ ni a ka cɛganaya nilifɛn ye cogo di walasa ka baara kɛ a Fa ye ani ka mɔgɔ wɛrɛw dɛmɛ?
Krecɛn minnu ma furu kɛ, olu bɛ se ka nisɔndiya sɔrɔ u kɛtɔ ka baara kɛ ni u ka cɛganaya walima u ka musoganaya ye iko Yesu y’a kɛ cogo min na. A’ye WIDEYO lajɛ, o kɔ aw ka baro kɛ nin ɲininkali kan:
Krecɛnw bɛ se ka baara kɛ ni u ka cɛganaya walima u ka musoganaya ye ka fɛn nafama jumɛnw kɛ?
I tun bɛ nin dɔn wa?
Bibulu tɛ san hakɛ dɔ di furu ka kan ka kɛ min na. Nka a bɛ dusu don funankɛninw kɔnɔ u ka jɔ fɔlɔ fo u ka funankɛninya waati ka tɛmɛn ka sɔrɔ ka furu kɛ. O ye waati ye min na cɛnimusoya nege barika bonya kojugu bɛ se ka latigɛli ɲuman kɛli gɛlɛya funankɛninw bolo.—1 Kɔrɛntekaw 7:36, NWT.
5. I furuɲɔgɔn sugandi ni hakilitigiya ye
Ka i furuɲɔgɔn sugandi, o ye latigɛliw bɛɛ la nafamaw dɔ la kelen ye i bɛna min kɛ don dɔ la. Matiyu 19:4-6, 9 kalan, o kɔ aw ka baro kɛ nin ɲininkali kan:
Mun na krecɛn man kan ka girin ka don furu la?
Bibulu bɛ se ka i dɛmɛ i k’a dɔn jogo ɲuman minnu bɛ mɔgɔ kɛ furuɲɔgɔn ɲuman ye. Min nafa ka bon n’a bɛɛ ye, o ye ka furuɲɔgɔn ɲini min bɛ Jehova kanu.b 1 Kɔrɛntekaw 7:39 ani 2 Kɔrɛntekaw 6:14 kalan. O kɔ aw ka baro kɛ nin ɲininkaliw kan:
Mun na an ka kan ka furu an krecɛn ɲɔgɔnw dɔrɔn de ma?
E hakili la, Jehova bɛ kɛ cogo di ni an y’a sugandi ka furu mɔgɔ ma min tɛ a kanu?
Bagan fila, minnu tɛ bagan sugu kelenw ye hali dɔɔnin, ni olu sirila ɲɔgɔn na baara kama, u fila bɛɛ bɛna tɔɔrɔ. O cogo kelen na, krecɛn min bɛ furu dannabali ma, o bɛna gɛlɛya caman sɔrɔ
6. Furu ye iko Jehova b’a ye cogo min na
Israɛl-kɔrɔ la, cɛ dɔw tun bɛ u musow furu sa u yɛrɛ nafaw kosɔn. Malaki 2:13, 14, 16 kalan, o kɔ aw ka baro kɛ nin ɲininkali kan:
Mun na Jehova bɛ furusa bɛnbali koniya?
Jatɔya ani furusa bɛ tɔɔrɔ caman lase furuɲɔgɔn ma min ma fosi kɛ ani denmisɛnw fana ma
A’ye WIDEYO lajɛ, o kɔ aw ka baro kɛ nin ɲininkali kan.
Ni i furulen bɛ mɔgɔ ma min tɛ Jehova kanu, i bɛ se ka mun de kɛ walasa i ka furu ka ɲɛ?
7. Jehova ka sariyakolow waleya i ka furu kɔnɔ
A bɛ se ka kɛ ko cɛsiribaw de ka kan ka kɛ walasa ka Jehova ka sariyakolow waleya furu kɔnɔ.c Nka mɔgɔ minnu bɛ o cɛsiribaw kɛ, Jehova bɛ duba olu ye. A’ye WIDEYO lajɛ.
Heburuw 13:4 kalan, o kɔ aw ka baro kɛ nin ɲininkaliw kan:
Jehova ye sariyakolo minnu di furu ko la, yala e hakili la, olu bɛnnen don wa? Mun na e sɔnnen bɛ o ma walima mun na e ma sɔn o ma?
Jehova b’a ɲini krecɛnw fɛ u k’u ka furuw siri ani ka u ka furuw sa faamaw ɲɛ kɔrɔ ka d’a kan jamana caman kɔnɔ, gofɛrɛnɛmanw bɛ o de ɲini. Tite 3:1 kalan, o kɔ aw ka baro kɛ nin ɲininkali kan:
Ni i furulen don, yala i dalen b’a la ko i ka furu sirila iko gofɛrɛnɛman bɛ o ɲini i fɛ cogo min na wa?
MƆGƆ DƆ BƐ SE KA NIN ƝININKALI KƐ: “Mun na ka furu siri mɛri la? Yala furuɲɔgɔnw tɛ se ka sigi ɲɔgɔn kun ten dɔrɔn?”
I bɛ o tigi jaabi cogo di?
BAKURUBAFƆLI
Cɛganaya walima musoganaya ani furu, olu bɛɛ ye nilifɛnw ye ka bɔ Jehova yɔrɔ. Cɛganaw wo musogana wo ani mɔgɔ furulenw wo, olu bɛɛ bɛ se ka nisɔndiya ani wasa sɔrɔ ni u bɛ u ka ɲɛnamaya kɛ ka kɛɲɛ ni Jehova sago ye.
Seginnkanni
Mɔgɔ bɛ se ka baara kɛ ni a ka cɛganaya walima a ka musoganaya ye cogo ɲuman na cogo di?
Mun na Bibulu b’a fɔ ko an ka furu an krecɛn ɲɔgɔnw dɔrɔn de ma?
Fɛn kelen jumɛn de kosɔn Bibulu bɛ sɔn furusa ma?
NINNU LAJƐ
Wideyo kunkurunnin fila lajɛ minnu bɛ se ka i dɛmɛ ka latigɛli ɲumanw kɛ mɔgɔ siralabɔli furu kama ani furu ko la.
A lajɛ kun min na balimakɛ dɔ b’a miiri ko Jehova ye fɛn minnu di ale ma, ko olu nafa ka bon kosɛbɛ ka tɛmɛn fɛnw kan a ye minnu to yen.
Sani mɔgɔ ka furusa kɛ walima ka fara a furuɲɔgɔn na waatinin kɔnɔ, a ka kan k’a hakili jagabɔ fɛn minnu kan fɔlɔ, olu dɔw ye jumɛnw ye?
a Kunnafoni 4nan lajɛ cɛ ni a muso farali ko la ni jatɔya ma kɛ.
b Mɔgɔ dɔw ka laadaw la, bangebagaw de bɛ u denkɛw walima u denmusow furuɲɔgɔnw sugandi. N’a bɛ ten cogo la, bangebaga kanumanw bɛna u den di furuɲɔgɔn min ma, u tɛ o tigilamɔgɔ ka nafolotigiya walima a jɔyɔrɔ lajɛ fɔlɔ. Nka u b’a lajɛ de n’a tigilamɔgɔ bɛ Jehova kanu.
c Ni i sigilen bɛ mɔgɔ dɔ kun k’a sɔrɔ furu tɛ aw ni ɲɔgɔn cɛ, ka bɔ o tigi kun walima ka furu kɛ ni o tigi ye, o ye latigɛli ye i yɛrɛ ka kan ka min kɛ.